- లండన్ ప్లానింగ్ డైరెక్టర్తో కీలక భేటీ…
ఆంధ్రప్రదేశ్ రాజధాని అమరావతిని ప్రపంచస్థాయి నగరంగా తీర్చిదిద్దడమే లక్ష్యంగా రాష్ట్ర పురపాలక శాఖ మంత్రి పి. నారాయణ నేతృత్వంలోని ఉన్నత స్థాయి బృందం ప్రస్తుతం లండన్లో పర్యటిస్తోంది. ప్రపంచంలోనే అత్యంత ప్రణాళికాబద్ధంగా నిర్మితమైన నగరాల్లో ఒకటైన లండన్ యొక్క మాస్టర్ ప్లాన్, రవాణా వ్యవస్థ మరియు మౌలిక వసతులను క్షుణ్ణంగా పరిశీలించి, వాటిని అమరావతిలో ఎలా అమలు చేయవచ్చనే అంశంపై ఈ పర్యటన సాగుతోంది.
లండన్ పర్యటనలో భాగంగా మంత్రి నారాయణ 'సిటీ ఆఫ్ లండన్ కార్పొరేషన్' ప్లానింగ్ అండ్ డెవలప్మెంట్ డైరెక్టర్ గిన్ రిచర్డ్స్ (Gwyn Richards) తో సమావేశమయ్యారు. లండన్ నగరం ఎలా అభివృద్ధి చెందింది? భవిష్యత్తు అవసరాలకు అనుగుణంగా ప్రణాళికలు ఎలా మారుతున్నాయి? అనే విషయాలను గిన్ రిచర్డ్స్ వివరించారు. లండన్ నగర నిర్మాణాన్ని ఒక చిన్న నమూనా (Miniature) ద్వారా ప్రతిబింబించే కేంద్రాన్ని మంత్రి సందర్శించారు. నగరంలోని ఎత్తైన భవనాలు, రోడ్లు, మరియు థేమ్స్ నది పరివాహక ప్రాంతాల అభివృద్ధిని మంత్రి బృందం నిశితంగా పరిశీలించింది.
మధ్యాహ్నం మంత్రి నారాయణ బృందం ప్రసిద్ధ బాటర్సీ పవర్ స్టేషన్ (Battersea Power Station) ను సందర్శించింది. ఒకప్పుడు బొగ్గుతో విద్యుత్ ఉత్పత్తి చేసి, మూతపడిన ఈ భారీ పవర్ స్టేషన్ను లండన్ అధికారులు ఇప్పుడు ప్రపంచ స్థాయి పర్యాటక మరియు వాణిజ్య కేంద్రంగా మార్చేశారు. పాత నిర్మాణాలను పడగొట్టకుండా, వాటిని ఆధునిక అవసరాలకు అనుగుణంగా ఎలా మార్చవచ్చనే కోణంలో ఇక్కడి ఏర్పాట్లను మంత్రి పరిశీలించారు. పర్యాటకులను ఆకర్షించేందుకు ఇక్కడ ఏర్పాటు చేసిన షాపింగ్ మాల్స్, ఆఫీసు స్పేస్లు మంత్రిని విశేషంగా ఆకట్టుకున్నాయి.
మంత్రి నారాయణ వెంట పురపాలక శాఖ ముఖ్య కార్యదర్శి సురేష్ కుమార్, అమరావతి గ్రోత్ అండ్ ఇన్ఫ్రాస్ట్రక్చర్ కార్పొరేషన్ ఎండి శ్రీనివాస్ తదితరులు ఉన్నారు. అమరావతిలో నిర్మించబోయే ఐకానిక్ భవనాలు, మెట్రో రవాణా వ్యవస్థల రూపకల్పనలో ఈ లండన్ పర్యటన అనుభవాలు ఎంతగానో ఉపయోగపడతాయని అధికారులు భావిస్తున్నారు.
