2027లో అరుదైన సూర్యగ్రహణం.. 6 నిమిషాలకుపైగా చీకటిలో ప్రపంచం
పగలు చీకటిగా మార్చనున్న 2027 ఖగోళ అద్భుతం..
2027 ఆగస్టు 2న ప్రపంచం ఒక అరుదైన ఖగోళ అద్భుతాన్ని చూడబోతోంది. ఆ రోజు మధ్యాహ్న సమయంలో సూర్యుడు పూర్తిగా కనుమరుగై, పగలు క్షణాల్లోనే చీకటిగా మారనుంది. అమెరికా అంతరిక్ష పరిశోధనా సంస్థ నాసా (NASA) వెల్లడించిన వివరాల ప్రకారం, ఇది 21వ శతాబ్దంలోనే అత్యంత ఎక్కువసేపు కనిపించే సంపూర్ణ సూర్యగ్రహణంగా నిలవనుంది.
నాసా గాడర్డ్ స్పేస్ ఫ్లైట్ సెంటర్ లెక్కల ప్రకారం ఈ గ్రహణం గరిష్టంగా 6 నిమిషాలు 23 సెకన్ల పాటు కొనసాగుతుంది. భూమిపై ఇంతసేపు సంపూర్ణ సూర్యగ్రహణం చివరిసారిగా 1991లో కనిపించగా, మళ్లీ ఇలాంటి అవకాశం 2114లో మాత్రమే రానుందని శాస్త్రవేత్తలు చెబుతున్నారు. దీంతో 2027 గ్రహణం అరుదైన ఖగోళ సంఘటనగా గుర్తింపు పొందింది.
ఈ గ్రహణం ఎక్కువసేపు కనిపించడానికి ప్రధాన కారణం చంద్రుడు భూమికి అత్యంత సమీప దూరమైన “పెరిజీ” స్థితిలో ఉండటమే. ఆ సమయంలో చంద్రుడు పెద్దగా కనిపిస్తూ సూర్యుడిని పూర్తిగా కప్పేస్తాడు. అదే సమయంలో గ్రహణం కనిపించే ప్రాంతాల్లో సూర్యుడు నేరుగా తలపై ఉండటం వల్ల సంపూర్ణ చీకటి మరికొంతసేపు కొనసాగుతుంది.
ఈ అరుదైన గ్రహణం ప్రధానంగా ఉత్తర ఆఫ్రికా ప్రాంతాల్లో స్పష్టంగా కనిపించనుంది. స్పెయిన్ దక్షిణ భాగం నుంచి ప్రారంభమై మొరాకో, అల్జీరియా, ట్యునీషియా, లిబియా, ఈజిప్ట్ మీదుగా సౌదీ అరేబియా, యెమెన్ వరకు చంద్రుని నీడ ప్రయాణించనుంది. స్పెయిన్లోని టరిఫా ప్రాంతంలో 4 నిమిషాల 39 సెకన్లు గ్రహణం కనిపిస్తే, లిబియాలోని బెంగాజీ వద్ద 6 నిమిషాలు 7 సెకన్లు, ఈజిప్ట్లోని లక్సోర్ వద్ద 6 నిమిషాలు 19 సెకన్ల పాటు సంపూర్ణ గ్రహణం కొనసాగనుంది.
ప్రత్యేకంగా ఉత్తర ఆఫ్రికా ఎడారి ప్రాంతాల్లో ఆగస్టు నెలలో మేఘాలు చాలా తక్కువగా ఉండటం ఖగోళ ప్రేమికులకు అదృష్టంగా మారింది. వాతావరణ నిపుణుడు జే అండర్సన్ తెలిపిన వివరాల ప్రకారం, ఈజిప్ట్లోని లక్సోర్ ప్రాంతంలో ఆగస్టులో మేఘావరణం కేవలం 0.7 శాతమే ఉంటుందని చెప్పారు. అయితే మేఘాల కంటే ఎడారి ధూళి కొంత ఇబ్బంది కలిగించే అవకాశం ఉందన్నారు.
గ్రహణ సమయంలో అక్కడి ఉష్ణోగ్రతలు ఒక్కసారిగా తగ్గిపోవచ్చని కూడా శాస్త్రవేత్తలు అంచనా వేస్తున్నారు. సాధారణంగా 43 డిగ్రీల సెల్సియస్ వరకు ఉండే ఎడారి వేడి, సూర్యకాంతి ఆగిపోవడంతో ఒక్కసారిగా చల్లబడుతుందని చెబుతున్నారు.
ఈ గ్రహణాన్ని ప్రత్యక్షంగా చూడబోయే వారి సంఖ్య కూడా భారీగానే ఉండనుంది. టైమ్ అండ్ డేట్ డాట్ కామ్ అంచనా ప్రకారం, సంపూర్ణ గ్రహణం కనిపించే మార్గంలో సుమారు 8.89 కోట్ల మంది నివసిస్తున్నారు. ఇది 2024లో ఉత్తర అమెరికాలో కనిపించిన సూర్యగ్రహణం కంటే మూడు రెట్లు ఎక్కువ.
గ్రహణ సమయంలో “బైలీస్ బీడ్స్”, “డైమండ్ రింగ్” వంటి అద్భుత దృశ్యాలు కనిపించనున్నాయి. చంద్రుని అంచుల మధ్య నుంచి చివరి సూర్యకిరణాలు వెలువడే క్షణాలను బైలీస్ బీడ్స్ అంటారు. అనంతరం వజ్రంలా మెరుస్తూ కనిపించే కాంతి “డైమండ్ రింగ్ ఎఫెక్ట్”గా ప్రసిద్ధి చెందింది.
చంద్రుడు పూర్తిగా సూర్యుడిని కప్పిన వెంటనే సూర్యుని చుట్టూ తెల్లటి కాంతివలయంలా కనిపించే “కరోనా” ప్రత్యక్షమవుతుంది. ఆ సమయంలో ఆకాశం చీకటిగా మారి నక్షత్రాలు, గ్రహాలు కూడా స్పష్టంగా కనిపించే అవకాశం ఉంటుంది.
అయితే శాస్త్రవేత్తలు ప్రజలకు జాగ్రత్తలు కూడా సూచిస్తున్నారు. సంపూర్ణ గ్రహణం సమయంలో మాత్రమే కళ్లతో నేరుగా చూడవచ్చని, మిగతా సమయాల్లో తప్పనిసరిగా ప్రత్యేక సోలార్ గ్లాసెస్ ఉపయోగించాలని హెచ్చరిస్తున్నారు. చిన్న కాంతి కిరణం కూడా కళ్లకు హాని కలిగించే ప్రమాదం ఉందని చెబుతున్నారు. 2027 తర్వాత వచ్చే సంపూర్ణ సూర్యగ్రహణం 2028 జూలై 22న కనిపించనుంది. అయితే అది తక్కువసేపే కొనసాగుతుందని నాసా తెలిపింది.
