- "కర్నూలుకు హైకోర్టు బెంచ్": ఇచ్చిన హామీని నెరవేర్చే దిశగా అడుగులు వేస్తున్న కూటమి ప్రభుత్వం..
- Politics: పాత భవనాల స్థానంలో అత్యాధునిక హంగులు: రాయలసీమ వాసులకు చేరువగా న్యాయ సేవలు..
Rayalaseema AP government: రాయలసీమ సమగ్ర అభివృద్ధిపై ఆంధ్రప్రదేశ్ కూటమి ప్రభుత్వం ప్రత్యేక దృష్టి సారించింది. గత ఎన్నికల సమయంలో ముఖ్యమంత్రి నారా చంద్రబాబు నాయుడు ఇచ్చిన హామీ మేరకు కర్నూలులో హైకోర్టు బెంచ్ ఏర్పాటు ప్రక్రియను ప్రభుత్వం వేగవంతం చేసింది. అమరావతి రాజధానిగా చట్టబద్ధత పొందడాన్ని రాయలసీమ ప్రజలు హర్షిస్తున్న తరుణంలో, వారికి మరింత చేరువగా న్యాయ సేవలను అందించేందుకు అనువైన ప్రదేశాలను అధికారులు క్షుణ్ణంగా పరిశీలిస్తున్నారు. అందరికీ ఆమోదయోగ్యంగా ఉండేలా, రవాణా సౌకర్యాలు మెరుగ్గా ఉన్న ప్రాంతంలోనే ఈ బెంచ్ ఏర్పాటు చేయాలని ప్రభుత్వం భావిస్తోంది. కర్నూలు నగరంలోనే హైకోర్టు బెంచ్ ఏర్పాటు చేస్తామని రాష్ట్ర మంత్రి భరత్ స్పష్టం చేయడంతో, స్థానిక యంత్రాంగం ప్రభుత్వ మరియు కొన్ని ప్రైవేట్ భవనాలను ప్రాథమికంగా తనిఖీ చేసింది.
ఈ అన్వేషణలో భాగంగా సుమారు వంద ఎకరాల విస్తీర్ణంలో ఉన్న పాత ఏబీసీ (ABC) క్వార్టర్లను అధికారులు ప్రధానంగా పరిశీలించారు. ప్రస్తుతం ఇవి శిథిలావస్థకు చేరుకోవడంతో, వీటిని కూల్చివేసి అదే స్థలంలో అత్యాధునిక హంగులతో హైకోర్టు బెంచ్ భవనాన్ని నిర్మించే ప్రతిపాదనలను ప్రభుత్వం సిద్ధం చేస్తోంది. గత వైఎస్సార్ కాంగ్రెస్ పార్టీ ప్రభుత్వంపై విమర్శలు గుప్పిస్తూ, ఐదేళ్ల అధికారంలో ఉండి కర్నూలును 'న్యాయ రాజధాని' చేస్తామంటూ జగన్ మోహన్ రెడ్డి ప్రజలను మోసం చేశారని కూటమి నేతలు మండిపడ్డారు. మాటలు చెప్పడమే తప్ప, గత ప్రభుత్వం కర్నూలులో కనీసం ఒక్క ఇటుక కూడా పేర్చలేదని, కేవలం రాజకీయ ప్రయోజనాల కోసమే రాయలసీమ సెంటిమెంట్తో ఆడుకున్నారని ఆరోపించారు. కూటమి ప్రభుత్వం మాత్రం ఇచ్చిన మాట ప్రకారం రాయలసీమకు న్యాయం చేస్తూ, త్వరితగతిన హైకోర్టు బెంచ్ పనులు పూర్తి చేస్తామని భరోసా ఇచ్చారు.
