సికింద్రాబాద్ రైల్వే స్టేషన్ ఆధునీకరణ పనుల నేపథ్యంలో ప్రయాణికులకు దక్షిణ మధ్య రైల్వే అధికారులు కీలక మార్గదర్శకాలు విడుదల చేశారు. ఈ పనుల కారణంగా కొన్ని ప్రధాన రైళ్లను చర్లపల్లి, లింగంపల్లి వంటి ఇతర స్టేషన్ల నుంచి నడుపుతున్నారు. అయితే సికింద్రాబాద్ మీదుగా కొన్ని దూర ప్రాంత రైళ్లు కొనసాగుతుండగా, ప్రస్తుతం ప్రయాణికులను ప్రధానంగా ప్లాట్ఫాం నంబర్ 10 నుంచి అనుమతిస్తున్నారు. ప్రయాణికులకు గందరగోళం తలెత్తకుండా స్పష్టమైన సూచనలు జారీ చేశారు.
సంక్రాంతి ప్రయాణికుల రద్దీ దృష్ట్యా పలు మార్గాల్లో ప్రత్యేక రైళ్లను కూడా ప్రకటించారు. సికింద్రాబాద్ స్టేషన్లో( secunderabad station) 17 బుకింగ్ కౌంటర్లు, 20 ఆటోమేటిక్ టికెట్ వెండింగ్ మెషిన్లు అందుబాటులో ఉన్నాయి. అలాగే ‘రైల్ వన్’ మొబైల్ యాప్ ద్వారా అన్రిజర్వ్డ్ టికెట్లను డిజిటల్ చెల్లింపులతో బుక్ చేస్తే 3 శాతం రాయితీ ఇస్తున్నట్లు అధికారులు తెలిపారు. ఈ రాయితీ జనవరి 14 నుంచి జూలై 14 వరకు అమల్లో ఉంటుంది.
ప్రయాణికుల భద్రత, సౌకర్యాల కోసం స్టేషన్లో టీటీఈలు, ఆర్పీఎఫ్ బృందాలు, సీసీటీవీ నిఘా ఏర్పాటు చేశారు. డివిజనల్ హెడ్క్వార్టర్స్లో వార్ రూమ్ను కూడా ప్రారంభించారు. స్టేషన్ ఆధునీకరణ కారణంగా తాత్కాలికంగా పార్కింగ్ నిలిపివేయగా, ప్లాట్ఫాం-10 వద్ద బేస్మెంట్ పార్కింగ్ను వినియోగించుకోవాలని సూచించారు. అలాగే బోయిగూడ ప్రవేశ మార్గంలో యాక్సెస్ కంట్రోల్ తొలగించి ప్రయాణికుల కదలికను వేగవంతం చేశారు. హైటెక్ సిటీ, చర్లపల్లి, లింగంపల్లి స్టేషన్లలో పలు రైళ్లకు తాత్కాలిక అదనపు స్టాపేజీలు కల్పించారు.
సికింద్రాబాద్ స్టేషన్లో ప్రస్తుతం ఏ ప్లాట్ఫాం నుంచి ప్రయాణికులను అనుమతిస్తున్నారు?
ప్రస్తుతం ప్రధానంగా ప్లాట్ఫాం నంబర్ 10 నుంచి ప్రయాణికులను అనుమతిస్తున్నారు.
అదనపు రైలు స్టాపేజీలు ఎక్కడ కల్పించారు?
హైటెక్ సిటీలో 16 రైళ్లకు, చర్లపల్లి స్టేషన్లో 11 రైళ్లకు, లింగంపల్లిలో 10 రైళ్లకు తాత్కాలిక స్టాపేజీలు కల్పించారు.
