ఐఆర్సీటీసీ (IRCTC) సంక్రాంతి సెలవులను దృష్టిలో పెట్టుకుని కర్ణాటక పర్యటన కోసం ప్రత్యేకంగా 5 రోజుల టూర్ ప్యాకేజీని ప్రకటించింది. ఈ ప్యాకేజీ హైదరాబాద్లోని కాచిగూడ రైల్వే స్టేషన్ నుంచి ప్రారంభమవుతుంది. రైలు ప్రయాణం, హోటల్ బస, దర్శన ప్రదేశాల సందర్శనతో పాటు సౌకర్యవంతమైన ఏర్పాట్లు ఇందులో ఉండటంతో ప్రయాణికులకు ఇది మంచి అవకాశంగా మారింది.
ఈ టూర్లో భాగంగా తొలి రోజు సాయంత్రం కాచిగూడ స్టేషన్ నుంచి మైసూర్ ఎక్స్ప్రెస్ ద్వారా ప్రయాణం ప్రారంభమవుతుంది. రాత్రంతా రైలు ప్రయాణం అనంతరం రెండో రోజు ఉదయం మైసూర్కు చేరుకుంటారు. అక్కడి నుంచి రోడ్డుమార్గంలో కూర్గ్కు ప్రయాణం కొనసాగుతుంది. కూర్గ్ చేరుకున్న తర్వాత హోటల్లో చెక్-ఇన్ చేసి విశ్రాంతి తీసుకునే అవకాశం కల్పిస్తారు.
కూర్గ్లో ఉన్న సమయంలో ప్రయాణికులు చెజ్జి వాటర్ ఫాల్స్, ఓంకారేశ్వర ఆలయం వంటి ప్రముఖ ప్రదేశాలను సందర్శిస్తారు. మూడో రోజు ఉదయం భాగమండల, తలకావేరి వంటి పుణ్యక్షేత్రాలకు తీసుకెళ్లి, అనంతరం రాజా సీట్ వంటి ప్రకృతి సౌందర్యం కలిగిన ప్రాంతాలను చూపిస్తారు. ఈ మొత్తం పర్యటన కూర్గ్ అందాలను ఆస్వాదించేలా రూపొందించారు.
నాలుగో రోజు హోటల్ నుంచి చెక్అవుట్ అయిన తర్వాత మైసూర్ వైపు తిరుగు ప్రయాణం ప్రారంభమవుతుంది. మార్గమధ్యలో కావేరి నిసర్గధామ, టిబెటన్ మానెస్టరీ, బృందావనం గార్డెన్స్ వంటి ప్రముఖ పర్యాటక ప్రాంతాలను సందర్శిస్తారు. ఈ రోజు మొత్తం సాంస్కృతిక, ప్రకృతి వైభవాన్ని చూసేలా ప్లాన్ చేశారు.
ఐదో రోజు ఉదయం చాముండి హిల్స్, మైసూర్ ప్యాలెస్ దర్శనం అనంతరం తిరుగు రైలు ప్రయాణం ఉంటుంది. ఈ ప్యాకేజీ 3ఏసీ క్లాస్లో అందుబాటులో ఉండగా, సింగిల్, డబుల్, ట్రిపుల్ షేరింగ్ విధానాల్లో ధరలు నిర్ణయించారు. రైలు ప్రయాణం, వసతి, పర్యటనలు అన్నీ ఒకే ప్యాకేజీలో ఉండటంతో కర్ణాటక టూర్కు ఇది చక్కటి అవకాశంగా ఐఆర్సీటీసీ పేర్కొంది.
