ప్రతిష్టాత్మక బుల్లెట్ రైలు ప్రాజెక్ట్‌పై కేంద్ర రైల్వే శాఖ మంత్రి అశ్విని వైష్ణవ్ కీలక వివరాలను వెల్లడించారు. దేశంలోనే తొలి బుల్లెట్ రైలు సేవలు ముంబై-అహ్మదాబాద్ మధ్య త్వరలో ప్రారంభం కానున్నాయని ఆయన ప్రకటించారు. ఈ హై-స్పీడ్ రైలు అందుబాటులోకి వస్తే, ముంబై, అహ్మదాబాద్ నగరాల మధ్య ప్రయాణ సమయం కేవలం 2 గంటల 7 నిమిషాలకు తగ్గిపోతుందని ఆయన తెలిపారు.
మంత్రి అశ్విని వైష్ణవ్ అయోధ్య ఎక్స్‌ప్రెస్, రేవా-పుణె ఎక్స్‌ప్రెస్, జబల్‌పూర్-రాయ్‌పూర్ ఎక్స్‌ప్రెస్ రైళ్లను వర్చువల్‌గా ప్రారంభించిన సందర్భంగా మీడియాతో మాట్లాడారు. బుల్లెట్ రైలు ప్రాజెక్ట్ పనులు శరవేగంగా జరుగుతున్నాయని, ఈ రైలు గంటకు 320 కిలోమీటర్ల వేగంతో దూసుకుపోతుందని వివరించారు.
ఈ ప్రాజెక్ట్‌లో భాగంగా 508 కిలోమీటర్ల పొడవైన హై-స్పీడ్ రైల్ కారిడార్ నిర్మాణం జరుగుతోందని, ఇది ముంబైలోని బాంద్రా కుర్లా కాంప్లెక్స్ నుంచి గుజరాత్‌లోని వాపి, సూరత్, వడోదర, అహ్మదాబాద్ వంటి ప్రధాన నగరాలను కలుపుతుందని ఆయన పేర్కొన్నారు.
గుజరాత్‌లో భవిష్యత్తులో రాబోయే కొన్ని రైల్వే ప్రాజెక్టుల గురించి కూడా ఆయన ప్రస్తావించారు. ఇందులో పోర్‌బందర్-రాజ్‌కోట్ మధ్య కొత్త రైలు, రణవావ్ స్టేషన్‌లో రూ.135 కోట్లతో కోచ్ మెయింటెనెన్స్ కేంద్రం, పోర్‌బందర్‌లో రైల్వే ఫ్లైఓవర్, రెండు గతి శక్తి కార్గో టెర్మినళ్లు వంటివి ఉన్నాయని తెలిపారు.
గత 11 ఏళ్లలో ప్రధాని నరేంద్ర మోదీ ఆధ్వర్యంలో దేశవ్యాప్తంగా 34,000 కిలోమీటర్ల మేర కొత్త రైల్వే ట్రాక్‌లను నిర్మించామని, ఇది రోజుకు సగటున 12 కిలోమీటర్లకు సమానమని మంత్రి గుర్తుచేశారు. రైళ్ల రాకపోకలకు అంతరాయం లేకుండా 1,300 రైల్వే స్టేషన్లను ఆధునీకరించడం భారతీయ రైల్వే చరిత్రలో ఒక మైలురాయి అని ఆయన కొనియాడారు.
వందే భారత్, అమృత్ భారత్, నమో భారత్ వంటి ఆధునిక రైళ్లను ప్రవేశపెట్టామని, తక్కువ ధర టిక్కెట్లతో అత్యాధునిక సౌకర్యాలున్న 8 అమృత్ భారత్ రైళ్లకు ప్రజల నుంచి అద్భుతమైన స్పందన వస్తోందని ఆయన అన్నారు. గుజరాత్‌తో పాటు మధ్యప్రదేశ్, ఛత్తీస్‌గఢ్‌లలో కూడా డబుల్ ఇంజన్ ప్రభుత్వాల సహకారంతో రైల్వే ప్రాజెక్టులు వేగవంతమవుతున్నాయని అశ్విని వైష్ణవ్ వివరించారు.
