ఆంధ్రప్రదేశ్ ప్రభుత్వం అమలు చేస్తున్న మద్యం విధానం వల్ల పక్క రాష్ట్రాల్లో మద్యం అమ్మకాలు తగ్గుతున్నట్లు ఆ రాష్ట్రాల అధికారులు పేర్కొంటున్నారు. ఏపీలో నాణ్యమైన, నియంత్రిత మద్యం అందుబాటులో ఉండడంతో, ఇప్పటి వరకు ఇతర రాష్ట్రాల నుంచి దొంగచాటుగా మద్యం తీసుకురావాల్సిన అవసరం పూర్తిగా తగ్గిపోయిందని అంటున్నారు. ఇది రాష్ట్రంలో అక్రమ రవాణా, నకిలీ మద్యం సరఫరాకు చెక్ వేసిందని అధికారులు అభిప్రాయపడుతున్నారు.
ఇటీవల మంత్రి కొలుసు పార్థసారథి (Parthasarathi) మాట్లాడుతూ, గత ప్రభుత్వంలో విషపూరిత మద్యం కారణంగా వేలాది మంది అమాయకుల ప్రాణాలు కోల్పోయారని, అది ఎంతో బాధాకరమని తెలిపారు. ఆ సమయంలో మద్యం సరఫరా నియంత్రణ లేకపోవడం, నాణ్యతపై నిర్లక్ష్యం కారణంగా ఎన్నో కుటుంబాలు దుర్గతికి గురయ్యాయని గుర్తు చేశారు. కానీ ప్రస్తుత ప్రభుత్వం నాణ్యమైన మద్యం, కఠిన నియంత్రణలతో ప్రజల ప్రాణాలను కాపాడే దిశగా పనిచేస్తోందని స్పష్టం చేశారు.
అంతేకాదు, గతంలో మద్యం అమ్మకాలపై డిజిటల్ పేమెంట్స్ (Digital Payments) కాకుండా నగదు లావాదేవీలే ఎక్కువగా జరిగాయని, ఆ నగదును సొంత ప్రయోజనాల కోసం డెన్లకు తరలించారని ఆయన ఆరోపించారు. ప్రజల నుంచి దోచుకున్న ఆ డబ్బుతోనే ఎన్నికల్లో ఓట్లు కొనే ప్రయత్నాలు చేశారని మండిపడ్డారు.
ప్రస్తుతం జరుగుతున్న మద్యం కుంభకోణంపై ప్రత్యేక దర్యాప్తు బృందం (సిట్) పారదర్శకంగా విచారణ చేస్తోందని, ఎవరు తప్పు చేసినా చట్టం కప్పచెప్పదని మంత్రి స్పష్టం చేశారు. బాధ్యులెవరికైనా శిక్ష తప్పదని ఆయన హెచ్చరించారు.
ఈ సందర్భంగా కొలుసు పార్థసారథి వ్యాఖ్యానిస్తూ, “ఏపీ మద్యం పాలసీ దేశంలోని అనేక రాష్ట్రాలకు ఆదర్శంగా మారుతోంది. పక్కరాష్ట్రాలే ఇది మంచి విధానమని గుర్తిస్తున్నాయి. ప్రజల ఆరోగ్యం, భద్రతకు ప్రధాన ప్రాధాన్యత ఇవ్వడమే మా లక్ష్యం,” అని తెలిపారు.
