ఒకప్పుడు చిన్న రాకెట్ కోసం అమెరికాపై ఆధారపడిన భారత్, ఇప్పుడు అదే అమెరికా తయారైన భారీ కమ్యూనికేషన్ ఉపగ్రహాన్ని తన సొంత భూమి నుంచి నింగిలోకి ప్రయోగించేందుకు సిద్దమవుతోంది. భారత అంతరిక్ష పరిశోధనా సంస్థ (ఇస్రో) ఈ చరిత్రాత్మక ప్రయోగాన్ని త్వరలో నిర్వహించబోతుంది.
ఇస్రో ఛైర్మన్ వి. నారాయణన్ చెన్నైలో జరిగిన కార్యక్రమంలో ప్రకటించారు, రాబోయే రెండు నెలల్లో 6,500 కిలోల బరువు కలిగిన ఈ అమెరికా కమ్యూనికేషన్ శాటిలైట్‌ను భారత రాకెట్ ద్వారా ప్రయోగిస్తామని. ఈ సందర్భంగా, గతంలో భారత అంతరిక్ష ప్రస్థానంలో జరిగిన అద్భుతమైన పురోగతిని ఆయన గుర్తు చేసుకున్నారు.
"సుమారు ఆరు దశాబ్దాల క్రితం మనం అమెరికా నుంచి ఒక చిన్న రాకెట్‌ను అందుకున్నాం. కానీ ఇప్పుడు, అదే అమెరికా తయారైన భారీ ఉపగ్రహాన్ని మన రాకెట్‌తో మన భూమి నుంచి ప్రయోగించబోతున్నాం. ఇది మన ప్రగతికి గొప్ప సాక్ష్యం" అని నారాయణన్ పేర్కొన్నారు.
1963లో ఇస్రో స్థాపించినప్పుడు, భారత్ సాంకేతికంగా అభివృద్ధి చెందిన దేశాల కంటే వెనుకబడిన దేశంగా ఉండేది. అప్పట్లో అమెరికా అందించిన చిన్న రాకెట్ ప్రయోగంతోనే భారత అంతరిక్ష కార్యక్రమానికి ముద్ర పడింది. 1975లో కూడా అమెరికా శాటిలైట్ డేటాతో భారతదేశంలోని వేల గ్రామాల్లో టెలివిజన్ ద్వారా 'మాస్ కమ్యూనికేషన్' ప్రయోగం విజయవంతమైంది.
ఇటీవల జూలై 30న, ఇస్రో-నాసా సంయుక్తంగా రూపొందించిన నైసర్ (నాసా-ఇస్రో సింథటిక్ అపెర్చర్ రాడార్) ఉపగ్రహాన్ని జీఎస్‌ఎల్‌వి-ఎఫ్16 రాకెట్ ద్వారా విజయవంతంగా ప్రయోగించడం, ప్రపంచ అంతరిక్ష రంగంలో భారత సత్తాను మరోసారి సాక్ష్యపరిచింది. నాసా శాస్త్రవేత్తలు కూడా ఇస్రో పనితీరును ప్రశంసించారు.
గత 50 ఏళ్లలో, శాటిలైట్ టెక్నాలజీ లేకపోయినా, ఇస్రో అద్భుత ప్రగతిని సాధించి, ఇప్పటివరకు 34 దేశాల 433 ఉపగ్రహాలను విజయవంతంగా ప్రయోగించి, అంతరిక్ష వాణిజ్యంలో విశేష గుర్తింపు పొందింది.
