నెక్స్ట్ జనరేషన్ సైబర్ డిఫెన్స్కు అమరావతి హబ్గా రూపుదిద్దుకుంటోంది..
సీ-డాట్ భాగస్వామ్యంతో అమరావతిలో అత్యాధునిక టెస్ట్ బెడ్ ఏర్పాటు..
అమరావతి దేశంలోనే అత్యాధునిక సాంకేతిక కేంద్రంగా వేగంగా ఎదుగుతోందని ముఖ్యమంత్రి నారా చంద్రబాబు నాయుడు తెలిపారు. ప్రపంచ టెలికమ్యూనికేషన్ మరియు ఇన్ఫర్మేషన్ సొసైటీ దినోత్సవం సందర్భంగా ఆయన సోషల్ మీడియా వేదిక ‘ఎక్స్’ ద్వారా స్పందిస్తూ, దేశంలో తొలి క్వాంటం-సెక్యూర్ కమ్యూనికేషన్స్ టెస్ట్ బెడ్ అమరావతిలో ఏర్పాటు కానుండటం పట్ల ఆనందం వ్యక్తం చేశారు.
భారత ప్రభుత్వ సమాచార మంత్రిత్వ శాఖకు చెందిన సీ-డాట్ (C-DOT), అమరావతి క్వాంటం వ్యాలీ భాగస్వామ్యంతో ఎస్ఆర్ఎం యూనివర్సిటీ, అమరావతిలో ఈ టెస్ట్ బెడ్ను ఏర్పాటు చేయనున్నట్లు సీఎం వెల్లడించారు. ఈ ప్రాజెక్టు ద్వారా కమ్యూనికేషన్ మరియు సైబర్ భద్రత రంగాల్లో కీలకమైన పరిశోధనలు, ప్రయోగాలు నిర్వహించేందుకు అవకాశం కలుగుతుందని చెప్పారు.
సురక్షితమైన సమాచార మార్పిడి, విశ్వసనీయమైన డిజిటల్ మౌలిక సదుపాయాలు, సైబర్ రక్షణ వ్యవస్థలు దేశ భవిష్యత్తుకు ఎంతో కీలకమని చంద్రబాబు పేర్కొన్నారు. ప్రస్తుతం టెలికమ్యూనికేషన్, ఐటీ, క్వాంటం టెక్నాలజీ రంగాల్లో అమరావతి కేంద్రంగా అభివృద్ధి జరుగుతోందని తెలిపారు. గత ఏప్రిల్ 14న ప్రారంభించిన క్వాంటం కంప్యూటింగ్ రిఫరెన్స్ ఫెసిలిటీ తర్వాత ఈ రంగంలో మరిన్ని కీలక అడుగులు పడుతున్నాయని చెప్పారు.
అమరావతిలో ఏర్పాటు కానున్న ఈ క్వాంటం-సెక్యూర్ కమ్యూనికేషన్స్ టెస్ట్ బెడ్ ద్వారా క్వాంటం కమ్యూనికేషన్ హార్డ్వేర్, ఫోటోనిక్ మరియు ఆప్టికల్ సిస్టమ్స్, ఆధునిక ఎన్క్రిప్షన్ టెక్నాలజీలు, సురక్షిత నెట్వర్క్ వ్యవస్థలపై పరిశోధనలు జరగనున్నాయి. అలాగే నెక్స్ట్ జనరేషన్ సైబర్ డిఫెన్స్ సొల్యూషన్ల అభివృద్ధికి ఇది కీలక వేదికగా మారనుందని సీఎం అభిప్రాయపడ్డారు.
ఈ తరహా సాంకేతిక వేదికలు అమరావతికి జాతీయ, అంతర్జాతీయ స్థాయిలో ప్రత్యేక గుర్తింపును తీసుకువస్తాయని చంద్రబాబు విశ్వాసం వ్యక్తం చేశారు. “మేక్ ఇన్ ఇండియా” లక్ష్యాలకు అనుగుణంగా స్వదేశీ సాంకేతికతల అభివృద్ధికి ఇది తోడ్పడుతుందని చెప్పారు. భవిష్యత్తు టెక్నాలజీలకు కేంద్రంగా అమరావతి నిలవబోతోందని, డీప్ టెక్, అడ్వాన్స్డ్ మాన్యుఫ్యాక్చరింగ్, ఫ్రంటియర్ టెక్నాలజీలకు ఇది ప్రధాన హబ్గా రూపుదిద్దుకుంటోందని వివరించారు.
అలాగే ఈ ప్రాజెక్టు ద్వారా ఏపీ విద్యార్థులు, పరిశోధకులు, స్టార్టప్లు, యువ ఆవిష్కర్తలకు కొత్త అవకాశాలు లభిస్తాయని సీఎం తెలిపారు. ప్రపంచ భవిష్యత్తును మార్చే సాంకేతికతల రూపకల్పనలో యువత భాగస్వాములు కావడానికి ఇది గొప్ప వేదికగా మారుతుందని అన్నారు. క్వాంటం-సెక్యూర్ కమ్యూనికేషన్స్ టెస్ట్ బెడ్ ఏర్పాటులో భాగస్వాములవుతున్న శాస్త్రవేత్తలు, పరిశోధకులు, అధ్యాపకులు, విద్యార్థులు మరియు సంస్థలకు సీఎం చంద్రబాబు అభినందనలు తెలియజేశారు.
