శీతాకాలంలో శరీర రోగనిరోధక శక్తిని పెంచే ఆహారాల్లో ఉసిరికాయ ఒకటి. నిపుణుల మాటల్లో ఉసిరికాయలో విటమిన్–C అధికంగా ఉండటం వల్ల జలుబు, దగ్గు, గొంతునొప్పి వంటి సమస్యలు తగ్గుతాయి. చాలామంది ఉసిరికాయను పచ్చడి, పులిహోర లేదా నేరుగా తింటారు. అయితే చలికాలానికి ప్రత్యేకంగా ఉసిరికాయ రసం ఎంతో ఉపయోగకరంగా ఉంటుందని వైద్యులు సూచిస్తున్నారు.
ఈ ఉసిరికాయ రసాన్ని ముఖ్యంగా జలుబు, దగ్గుతో బాధపడుతున్న వారు తీసుకుంటే మంచి ఫలితాలు కనిపిస్తాయి. రోజూ ఒకసారి ఈ రసాన్ని తాగితే శరీర వేడి పెరిగి, శ్వాస సంబంధ సమస్యలు కూడా తగ్గుతాయని చెబుతున్నారు. ఇంట్లో ఉన్న సరళమైన పదార్థాలతో చాలా సులభంగా ఈ రసాన్ని తయారు చేసుకోవచ్చు.
ఉసిరికాయ రసం తయారీకి కావాల్సినవి: నాలుగు ఉసిరికాయలు, పావు కప్పు నానబెట్టిన కందిపప్పు, టీ స్పూన్ మిరియాలు, టీ స్పూన్ జీలకర్ర, ఒక టమాటా, కరివేపాకు, వెల్లుల్లి, అల్లం, ఒక పచ్చిమిర్చి, కొద్దిగా పసుపు, ఉప్పు, అలాగే తగినన్ని నీళ్లు. ముందుగా కందిపప్పును నానబెట్టాలి. ఉసిరికాయలను చిన్నచిన్న ముక్కలుగా కట్ చేసి, మిరియాలు, జీలకర్ర, టమాటా ముక్కలతో కలిపి మిక్సీలో పేస్టులా చేసుకోవాలి.
తరవాత ఒక పాన్‌లో నూనె వేడిచేసి అందులో ఆవాలు, జీలకర్ర, ఇంగువ వేసి తాళింపు చేయాలి. వెంటనే కరివేపాకు, పచ్చిమిర్చి, అల్లం వేసి బాగా వేయించాలి. ఇప్పుడు ముందుగా తయారు చేసిన ఉసిరికాయ పేస్టును అందులో వేసి కొద్దిగా పసుపు, ఉప్పు కలపాలి. తగినన్ని నీళ్లు పోసి బాగా కలిపి మరిగించాలి.
చివరిగా నానబెట్టిన కందిపప్పును వేసి 3 నిమిషాలు ఉడికించాలి. రసం ముద్దగా అయ్యాక పై నుంచి కొత్తిమీర చల్లి దింపేయాలి. ఇలా చేస్తే చలికాలానికి ప్రత్యేకంగా సరిపోయే రుచికరమైన, ఆరోగ్యప్రదమైన ఉసిరికాయ రసం సిద్ధమవుతుంది.
