కార్మికులు, కర్షకులే దేశ ఆర్థిక వ్యవస్థకు పునాది..
వారి కష్టం లేకుండా ఏ రంగం కూడా ముందుకు సాగదు..
అమరావతి: అంతర్జాతీయ కార్మిక దినోత్సవం (మేడే) సందర్భంగా రాష్ట్ర వ్యవసాయ శాఖ మంత్రి కింజరాపు అచ్చెన్నాయిడు కార్మికులు, కర్షక సోదరులకు హృదయపూర్వక శుభాకాంక్షలు తెలిపారు. దేశ అభివృద్ధిలో కార్మికుల పాత్ర ఎంతో గొప్పదని, వారి కష్టం లేకుండా ఏ రంగం కూడా ముందుకు సాగదని ఆయన స్పష్టం చేశారు.
ఈ సందర్భంగా మంత్రి మాట్లాడుతూ, కూలీలు, కార్మికులు, రైతులే దేశ ఆర్థిక వ్యవస్థకు బలమైన స్తంభాలని పేర్కొన్నారు. పరిశ్రమల అభివృద్ధి, వ్యవసాయ రంగ పురోగతి, నిర్మాణ రంగ విస్తరణ— ఇవన్నీ కార్మికుల శ్రమ ఫలితమేనని అన్నారు. వారి కష్టానికి తగిన గౌరవం, గుర్తింపు రావాలని ప్రభుత్వం కట్టుబడి ఉందని చెప్పారు.
కార్మికుల సంక్షేమం కోసం రాష్ట్ర ప్రభుత్వం పలు కీలక చర్యలు తీసుకుంటోందని మంత్రి వివరించారు. కార్మికులకు భద్రత, ఆరోగ్య పరిరక్షణ, ఉపాధి అవకాశాల పెంపు, కనీస వేతనాల అమలు వంటి అంశాల్లో ప్రత్యేక దృష్టి పెట్టినట్లు తెలిపారు. ముఖ్యంగా అసంఘటిత రంగ కార్మికులకు సామాజిక భద్రత కల్పించేందుకు కొత్త పథకాలు తీసుకొస్తున్నామని వెల్లడించారు.
రైతుల గురించి ప్రస్తావిస్తూ, “రైతులే దేశానికి అన్నదాతలు” అని మంత్రి పేర్కొన్నారు. వారి శ్రేయస్సు ప్రభుత్వానికి అత్యంత ప్రాధాన్యతగా ఉందని, మెరుగైన ధరలు, సాగుకు అవసరమైన సాయం, ఆధునిక సాంకేతికత అందించడంలో ప్రభుత్వం నిరంతరం కృషి చేస్తోందని తెలిపారు.
ప్రస్తుత పరిస్థితుల్లో కార్మికుల హక్కులను కాపాడటం చాలా అవసరమని, సమాజం మొత్తం వారి శ్రమను గౌరవించాల్సిన బాధ్యత ఉందని ఆయన అన్నారు. ప్రతి కార్మికుడి జీవన ప్రమాణం మెరుగుపడేలా ప్రభుత్వం అన్ని విధాలుగా చర్యలు తీసుకుంటుందని స్పష్టం చేశారు.
మేడే రోజు కార్మికుల త్యాగాలు, కష్టాలను గుర్తు చేసుకునే ప్రత్యేక సందర్భమని, వారి సంక్షేమం కోసం అందరూ కలిసికట్టుగా పని చేయాలని మంత్రి పిలుపునిచ్చారు. రాష్ట్ర అభివృద్ధి పథంలో కార్మికులు, కర్షకులు భాగస్వాములై ముందుకు సాగాలని ఆకాంక్షించారు. సురక్షితంగా, గౌరవంగా జీవించే కార్మిక సమాజం నిర్మాణమే ప్రభుత్వ లక్ష్యమని మంత్రి అచ్చెన్నాయుడు వెల్లడించారు.
