ఆంధ్రప్రదేశ్ ప్రభుత్వం తిరుపతి సమీపంలో చెత్త నుంచి విద్యుత్ ఉత్పత్తి చేసే పవర్ ప్లాంట్ ఏర్పాటు చేసే యోచనను మళ్లీ ముందుకు తీసుకొచ్చింది. ఈ ప్రాజెక్ట్‌ను మొదటిసారిగా 2016లో ప్రతిపాదించారు. అప్పట్లో రూ.100 కోట్ల వ్యయంతో 12 మెగావాట్ల సామర్థ్యంతో ఈ ప్లాంట్ ఏర్పాటు చేయాలని నిర్ణయించారు. జిందాల్ కంపెనీతో ఒప్పందం కూడా కుదిరింది. అయితే సరైన స్థలం లభించక ప్రాజెక్ట్ ఆగిపోయింది. ఇప్పుడు తిరిగి రాష్ట్ర ప్రభుత్వం, స్వచ్ఛాంధ్ర కార్పొరేషన్ సాయంతో ఈ ప్రాజెక్ట్‌ను మళ్లీ ప్రారంభించే దిశగా అడుగులు వేస్తోంది. జూలైలో ప్రభుత్వం తిరుపతి క్లస్టర్ పరిధిలో 33 ఎకరాల స్థలాన్ని గుర్తించాలని ఆదేశాలు ఇచ్చింది. పురపాలక శాఖ మంత్రి నారాయణ ఈ విషయంలో అధికారులు వేగంగా చర్యలు తీసుకోవాలని సూచించడంతో సన్నాహాలు ప్రారంభమయ్యాయి.
ఈ ప్రాజెక్ట్ పూర్తయితే తిరుపతి నగరంలో చెత్త సమస్యకు పెద్దఎత్తున పరిష్కారం లభిస్తుంది. చెత్తను విద్యుత్తుగా మార్చే ఈ సాంకేతికత పర్యావరణానికి అనుకూలంగా ఉంటుంది. ప్లాంట్‌లో చెత్తను ముందుగా తూకం వేసి, లోహాలు, ప్లాస్టిక్, టైర్లు, గాజు వంటి మండని పదార్థాలను వేరు చేస్తారు. మిగిలిన మండదగిన చెత్తను ప్రత్యేక నిల్వ కేంద్రంలో ఉంచి, అక్కడ తడి తగ్గిన తర్వాత బాయిలర్‌లోకి పంపిస్తారు. బాయిలర్‌లో మండినప్పుడు ఉత్పత్తి అయ్యే ఆవిరి శక్తిని విద్యుత్తుగా మారుస్తారు. ఆ విద్యుత్తును ఏపీఎస్పీడీసీఎల్‌ గ్రిడ్‌కి అనుసంధానం చేస్తారు.
ఈ ప్రక్రియలో పర్యావరణానికి హాని లేకుండా వాయువులను శుద్ధి చేసే ఫ్లూగ్యాస్ క్లీనింగ్ సిస్టమ్‌ను ఉపయోగిస్తారు. స్లాక్డ్ లైమ్‌, యాక్టివేటెడ్ కార్బన్‌ వంటి పదార్థాలతో వాయువులను శుద్ధి చేసి 65 మీటర్ల ఎత్తులో ఉన్న పొగగొట్టం ద్వారా బయటకు వదులుతారు. చెత్త కాలిన తర్వాత మిగిలే 14 శాతం ఫ్లైయాష్‌ను రోజుకు 7,500 ఇటుకల తయారీలో ఉపయోగించవచ్చు. దీంతో చెత్త సమస్యను పరిష్కరించడంతో పాటు, నిర్మాణ రంగానికి కూడా సహకారం లభిస్తుంది.
ఈ ప్లాంట్ 12 మెగావాట్ల సామర్థ్యంతో ఉండనుంది. రోజుకు 600 మెట్రిక్ టన్నుల చెత్త అవసరం అవుతుంది. తిరుపతి నగరంలోనే 227 మెట్రిక్ టన్నుల చెత్త లభిస్తుంది. ఇందులో 90 మెట్రిక్ టన్నులను ఈ ప్లాంట్‌కి తరలిస్తారు. మిగతా చెత్తను చంద్రగిరి, పరిసర ప్రాంతాల నుంచి సేకరిస్తారు. ప్లాంట్‌కి రోజుకు 500 కేఎల్‌డీ నీరు అవసరమవుతుందని అధికారులు తెలిపారు. ఈ ప్రాజెక్ట్ పూర్తయితే తిరుపతి పర్యావరణ పరిరక్షణతో పాటు విద్యుత్ ఉత్పత్తిలో కూడా కొత్త దిశను చూపనుంది.
