విజయవాడ నగర శివార్లలో మావోయిస్టుల అకస్మాత్తు కదలికలు భద్రతా వ్యవస్థను ఒక్కసారిగా ఉలిక్కిపడేలా చేశాయి. అత్యంత విశ్వసనీయమైన సమాచారాన్ని అందుకున్న కేంద్ర, రాష్ట్ర ప్రత్యేక దళాలు సంయుక్తంగా విస్తృత ఆపరేషన్ నిర్వహించాయి. కానూరు కొత్త ఆటోనగర్లోని ఓ భవనాన్ని గుట్టుగా ఆశ్రయం కేంద్రంగా మార్చుకుని కార్యకలాపాలు నిర్వహిస్తున్న 27 మంది మావోయిస్టులను ఈ దాడిలో అదుపులోకి తీసుకున్నారు. ఈ దాడిలో ఆక్టోపస్, గ్రేహౌండ్స్తో పాటు కేంద్ర బలగాలు కూడా పాల్గొనడం ఈ ఆపరేషన్కు ప్రత్యేక ప్రాధాన్యతను తీసుకొచ్చింది.
పోలీసుల వివరాల ప్రకారం, ఛత్తీస్గఢ్కు చెందిన ఈ మావోయిస్టుల బృందం సుమారు పది రోజుల క్రితమే విజయవాడకు వచ్చినట్లు తేలింది. స్థానికులకు తనను కూలీ కార్మికులమని చెప్పి ఆటోనగర్ ప్రాంతంలో ఓ భవనాన్ని అద్దెకు తీసుకున్నారు. అయితే, వారి కదలికలు అనుమానాస్పదంగా ఉన్నాయని నిఘా వర్గాలు గమనించాయి. అందిన సమాచారాన్ని పట్టుకుని బలగాలు మంగళవారం తెల్లవారుజామున ఆ ప్రాంతాన్ని పూర్తిగా ముట్టడించి మెరుపుదాడి చేశారు. ఈ ఆపరేషన్లో 12 మంది మహిళలు, నలుగురు కీలక స్థాయి నాయకులు, 11 మంది మిలీషియా సభ్యులు, సానుభూతిపరులను అరెస్ట్ చేసినట్లు అధికారులు ధృవీకరించారు.
విచారణలో భాగంగా మావోయిస్టులు నగర శివార్లలో నాలుగు చోట్ల ఆయుధాలు, పేలుడు పదార్థాలు, కమ్యూనికేషన్ పరికరాలతో డంప్లను ఏర్పాటు చేసినట్లు సంచలన విషయాలు వెలుగులోకి వచ్చాయి. దీంతో బలగాలు వెంటనే అప్రమత్తమై ఆటోనగర్ పరిసరాల్లో భారీ స్థాయిలో శోధనా చర్యలు ప్రారంభించాయి. డంప్లు గుర్తించేందుకు, స్వాధీనం చేసుకోవడానికి ప్రత్యేక బృందాలు పనిచేస్తున్నాయి. ఇదే సమయంలో మావోయిస్టులకు ఆశ్రయం కల్పించిన భవన యజమాని గత నెలన్నరుగా విదేశాల్లో ఉన్నట్లు గుర్తించారు. దీంతో భవనాన్ని చూసుకునే వాచ్మేన్ను అదుపులోకి తీసుకుని పోలీసులు విచారణ వేగవంతం చేశారు.
ఏజెన్సీ, అటవీ ప్రాంతాల్లోనే తరచుగా కనిపించే మావోయిస్టులు ఇప్పుడు వ్యూహం మార్చి నగరాల్లో గూడు ఏర్పరచుకోవడం భద్రతా వ్యవస్థకు కొత్త సవాలుగా మారింది. ముఖ్యంగా విజయవాడ వంటి కీలక నగరంలో స్థావరం ఏర్పరచుకునేందుకు చేసిన ప్రయత్నం పెద్ద ఎత్తున దృష్టిని ఆకర్షించింది. నగర వాతావరణంలో కలిసిపోయి తమ నెట్వర్క్ను విస్తరించే లక్ష్యంతోనే ఈ కదలికలు జరిగాయని అనుమానిస్తున్నారు. ఈ ఘటన నేపథ్యంలో విజయవాడలో భద్రత కట్టుదిట్టం చేయగా, అరెస్టయిన వారిని మరింత లోతుగా విచారించి వారి నెట్వర్క్ను పూర్తిగా ఛేదించేందుకు చర్యలు వేగవంతమయ్యాయి.
