ఆంధ్రప్రదేశ్ ప్రభుత్వం గ్రామ, వార్డు సచివాలయాల పనితీరును మరింత సమర్థవంతం చేయడానికి కీలక నిర్ణయం తీసుకుంది. సచివాలయాల పర్యవేక్షణ కోసం మండల, మున్సిపల్, జిల్లా స్థాయిల్లో ప్రత్యేక అధికారులను నియమించేందుకు ప్రక్రియ ప్రారంభించింది. మొదటి దశలో మండల స్థాయి పర్యవేక్షకుల నియామకాన్ని ఈ నెలాఖరులోగా పూర్తి చేయాలని ప్రభుత్వం లక్ష్యంగా పెట్టుకుంది. రాష్ట్రవ్యాప్తంగా 660 మంది డిప్యూటీ మండల పరిషత్ అధికారులను డిప్యుటేషన్పై మండల పర్యవేక్షకులుగా నియమించనున్నారు. ఇటీవల పదోన్నతులు పొందిన గ్రేడ్-1 పంచాయతీ కార్యదర్శులు, జడ్పీ మరియు మండల కార్యాలయ పరిపాలన సిబ్బంది జాబితా ఇప్పటికే సచివాలయాల శాఖకు చేరడం వల్ల ప్రక్రియ వేగవంతం అయ్యింది. వీరి సేవలను గ్రామ, వార్డు సచివాలయాల పర్యవేక్షణలో వినియోగించనున్నారు.
ఇక రెండో దశలో, మున్సిపల్ స్థాయిలో సచివాలయాల పనితీరును పర్యవేక్షించేందుకు మున్సిపల్ శాఖ నుండి డిప్యుటేషన్పై 123 మంది అధికారులను కేటాయించనున్నారు. దీనిపై రెండు శాఖలు ఇప్పటికే చర్చలు జరిపాయి. డిప్యూటీ, అడిషనల్ కమిషనర్లను వార్డు సచివాలయాల పర్యవేక్షణ కోసం పంపాలనే సూచనపై చర్యలు ప్రారంభమయ్యాయి. ఈ జాబితా మరో వారం లేదా పది రోజుల్లో సచివాలయాల శాఖకు చేరే అవకాశం ఉంది. మున్సిపల్ పరిపాలనా అనుభవం ఉన్న అధికారులను పర్యవేక్షణలో ప్రవేశపెట్టడం ద్వారా, వార్డు సచివాలయాల్లో సేవల నాణ్యత పెరుగుతుందని అధికారులు భావిస్తున్నారు.
జిల్లా స్థాయి పర్యవేక్షణకు కూడా ప్రభుత్వం ప్రత్యేక ఏర్పాట్లు చేస్తోంది. జిల్లా పరిషత్ సీఈవో, డిప్యూటీ సీఈవో, జాయింట్ డైరెక్టర్ స్థాయి అధికారులను ఈ బాధ్యతలకు నియమించనున్నారు. ఇందులో 70 శాతం మంది అధికారులు పంచాయతీరాజ్, గ్రామీణాభివృద్ధి శాఖల నుండి, మిగతా 30 శాతం పురపాలక, పట్టణాభివృద్ధి శాఖల నుండి డిప్యుటేషన్పై వస్తారు. ఈ నియామకాలు కూడా ఈ నెలాఖరులోగా పూర్తయ్యే అవకాశముంది. జిల్లాలోని సచివాలయాల కార్యకలాపాలను ఈ ఉన్నతాధికారులు పర్యవేక్షించడం ద్వారా ప్రభుత్వ పథకాల అమలులో పారదర్శకత పెరుగుతుందని ప్రభుత్వం భావిస్తోంది.
అదేవిధంగా, రాష్ట్ర ప్రభుత్వం గ్రామ, వార్డు సచివాలయాలను ఏ, బీ, సీ కేటగిరీలుగా విభజించింది. ఏ కేటగిరీ సచివాలయంలో 6 మంది, బీ కేటగిరీలో 7 మంది, సీ కేటగిరీలో 8 మంది ఫంక్షనరీలు ఉన్నారు. వీరికి సాధారణ (General) మరియు ప్రత్యేక (Special Purpose) బాధ్యతలు అప్పగించారు. ఈ విభజన వల్ల ప్రతి సచివాలయంలో ఉద్యోగుల పనితీరు స్పష్టంగా నిర్వచించబడింది. ఇప్పుడు కొత్తగా ప్రవేశపెట్టిన మూడు దశల పర్యవేక్షణ విధానం ద్వారా, సచివాలయాల సేవలు ప్రజలకు మరింత సులభంగా, వేగంగా చేరాలన్నదే ప్రభుత్వ లక్ష్యం.
