ఆంధ్రప్రదేశ్ రాజధాని అమరావతికి కనెక్టివిటీ మెరుగుపరచడానికి ప్రభుత్వం మరో కీలక అడుగు వేసింది. కృష్ణా పశ్చిమ డెల్టా ప్రధాన కాలువపై రూ.70 కోట్ల వ్యయంతో స్టీల్ వంతెన నిర్మాణ పనులు ప్రారంభమయ్యాయి. ఈ వంతెన పూర్తయితే కరకట్ట మీదుగా వెళ్లే అవసరం లేకుండా నేరుగా అమరావతికి చేరుకునే అవకాశం లభిస్తుంది. అమరావతి డెవలప్మెంట్ కార్పొరేషన్ లిమిటెడ్ (ADCL) ఆధ్వర్యంలో ఈ పనులు వేగంగా సాగుతున్నాయి. మూడు నెలల్లో ప్రాజెక్టును పూర్తి చేయాలని అధికారులు లక్ష్యంగా పెట్టుకున్నారు.
ఈ కొత్త స్టీల్ వంతెనను కేఎల్రావు కాలనీ సమీపంలో నిర్మిస్తున్నారు. ఇది 128 మీటర్ల పొడవుతో, నాలుగు లైన్లతో ఉండనుంది. ప్రస్తుతం పిల్లర్ల నిర్మాణం పీడబ్ల్యూడీ వర్క్షాప్ దగ్గర ప్రారంభమైంది. ఈ బ్రిడ్జి పూర్తయితే వాహనాలు కృష్ణా కరకట్ట ట్రాఫిక్ నుండి బయటపడతాయి. దీంతో వాహనదారులు సమయాన్ని ఆదా చేసుకుంటూ అమరావతికి నేరుగా సీడ్ యాక్సెస్ రోడ్డుమీదుగా చేరుకోవచ్చు.
ఇదే సమయంలో ప్రభుత్వం రెండో వంతెన నిర్మాణానికి కూడా ప్రణాళికలు సిద్ధం చేసింది. ఈ వంతెన 16వ నంబర్ జాతీయ రహదారిని ఉండవల్లి సెంటర్తో అనుసంధానించనుంది. కేఎల్రావు కాలనీ నుండి నేషనల్ హైవేకు రావాలంటే ప్రస్తుతం రైలు మార్గం, డెల్టా కాలువ దాటాల్సి వస్తుంది. ఈ ఇబ్బందిని తొలగించడానికే కొత్త బ్రిడ్జి నిర్మాణం చేపట్టాలని అధికారులు నిర్ణయించారు. త్వరలో ఈ రెండో బ్రిడ్జి నిర్మాణానికి టెండర్లు పిలవనున్నారు.
అదేవిధంగా, సీడ్ యాక్సెస్ రోడ్ పనులు కూడా వేగవంతంగా కొనసాగుతున్నాయి. ఇటీవల పెనుమాక, ఉండవల్లి ప్రాంతాల రైతులు ఈ రహదారి కోసం 12.40 ఎకరాల భూములు ఇవ్వడానికి అంగీకరించడంతో ప్రాజెక్టు వేగం పెరిగింది. ఇంకా 5.6 ఎకరాల భూమిని సేకరించాల్సి ఉంది. ఈ భూముల సేకరణ పూర్తయిన వెంటనే రోడ్డుపై పనులు మరింత వేగవంతమవుతాయని అధికారులు తెలిపారు.
ఈ కొత్త వంతెనలు, సీడ్ యాక్సెస్ రోడ్ పూర్తి అయిన తర్వాత అమరావతికి రాకపోకలు మరింత సులభతరం అవుతాయి. కేవలం కరకట్ట మీదుగా కాకుండా, నేరుగా ఈ కొత్త బ్రిడ్జుల మీదుగా ప్రయాణించవచ్చని అధికారులు చెబుతున్నారు. ఈ ప్రాజెక్టులు పూర్తయితే అమరావతి చుట్టుపక్కల ప్రాంతాల రవాణా సౌకర్యాలు గణనీయంగా మెరుగుపడతాయి, రాజధానితో అనుసంధానం మరింత బలపడుతుంది.
