శాసనసభలో ప్రజా సమస్యల హోరు…
ప్రజాస్వామ్య స్ఫూర్తితో ఏపీ శాసనసభ సమావేశాలు…
ప్రశ్నోత్తరాలతో ప్రారంభమైన సభ…
AP Assembly: ఆంధ్రప్రదేశ్ శాసనసభ సమావేశాలు ఇవాళ ఉదయం 9 గంటలకే ప్రారంభం కానున్నాయి. సభ మొదలవ్వగానే ఎప్పటిలాగే ప్రశ్నోత్తరాల సమయం ఉంటుంది. ప్రజలు ఎదుర్కొంటున్న అనేక ఇబ్బందులపై మంత్రులను ఎమ్మెల్యేలు తెలుసుకోనున్నారు. ముఖ్యంగా క్షేత్రస్థాయిలో ఉన్న సమస్యలను ప్రభుత్వం దృష్టికి తీసుకెళ్లేందుకు ఈ సమయాన్ని ప్రజాప్రతినిధులు వాడుకోనున్నారు. ఈసారి సమావేశాల్లో ప్రజలకు సంబంధించిన అంశాలకే పెద్దపీట వేయాలని ప్రభుత్వం భావిస్తోంది.
ఇవాళ సభలో చర్చకు వచ్చే అంశాలు చాలా సీరియస్గా ఉన్నాయి. ఎమ్మిగనూరులో కోర్టు ఏర్పాటు ఆవశ్యకతపై సభ్యులు మాట్లాడనున్నారు. అలాగే నెల్లిమర్ల ప్రాంతంలో ప్రజలు ఎదుర్కొంటున్న విద్యుత్ సమస్యలు, పవర్ కట్స్ వంటి విషయాలు చర్చకు రానున్నాయి. వీటితో పాటు గత ప్రభుత్వాల హయాంలో నిర్మించిన రాజీవ్ గృహకల్ప, వాంబే హౌసింగ్ కాలనీల పరిస్థితి దారుణంగా ఉంది. అక్కడ డ్రైనేజీ, గోడల పగుళ్లు వంటి మరమ్మతులపై ప్రత్యేకంగా చర్చించనున్నారు.
రాష్ట్రవ్యాప్తంగా ఇటీవల పలు హాస్టళ్లలో విద్యార్థులు ఫుడ్ పాయిజన్ బారిన పడటం కలకలం రేపింది. ఈ ఘటనలపై ప్రభుత్వం సీరియస్గా ఉంది. అసెంబ్లీలో దీనిపై లోతుగా చర్చించి, భవిష్యత్తులో ఇలాంటివి జరగకుండా ఎలాంటి జాగ్రత్తలు తీసుకోవాలో ప్రభుత్వం వివరించనుంది. విద్యార్థుల ఆరోగ్యం విషయంలో అలసత్వం వహించిన అధికారులపై చర్యలు తీసుకోవాలని ఎమ్మెల్యేలు డిమాండ్ చేసే అవకాశం ఉంది.
ముఖ్యమంత్రి నారా చంద్రబాబు నాయుడు ఈసారి అసెంబ్లీ నిర్వహణపై స్పష్టమైన ఆదేశాలు ఇచ్చారు. ప్రతిరోజూ మధ్యాహ్నం 12 గంటల నుంచి 2 గంటల వరకు కేవలం ప్రభుత్వ పథకాలు, అభివృద్ధి కార్యక్రమాలపైనే ప్రత్యేక చర్చ జరగాలని ఆయన సూచించారు. దీనివల్ల సంక్షేమ పథకాలు ప్రజల్లోకి ఎంతవరకు వెళ్తున్నాయి, ఎక్కడైనా ఆటంకాలు ఉన్నాయా అన్నది స్పష్టంగా తెలుస్తుందని సీఎం భావిస్తున్నారు. కీలక అంశాలపై లోతైన చర్చ జరగాలని ఆయన పట్టుబడుతున్నారు.
అసెంబ్లీ సమావేశాల సమయంలో మంత్రులు, ఎమ్మెల్యేలు ఎవరూ బయట తిరగకూడదని, అందరూ సభలోనే ఉండాలని చంద్రబాబు గట్టిగా ఆదేశించారు. ప్రజల సమస్యలపై చర్చ జరుగుతున్నప్పుడు వారి ప్రతినిధులుగా ఎమ్మెల్యేలు అందుబాటులో ఉండటం కనీస బాధ్యతని ఆయన గుర్తు చేశారు. అధికారులు, మంత్రులు కూడా పూర్తి సమాచారంతో సభకు రావాలని, సభ్యులు అడిగే ప్రశ్నలకు సమాధానాలు ఇవ్వాలని సూచించారు.
