త్వరలో అసెంబ్లీ సమావేశాలు నిర్వహించి మహిళా బిల్లు అంశంపై చర్చిద్దాం..
ఇండియా కూటమి వైఖరిని ప్రజలకు వివరించేందుకు త్వరలో 3 ప్రాంతాల్లో సభలు..
మహిళా రిజర్వేషన్ బిల్లుపై రాష్ట్ర రాజకీయాల్లో మరోసారి చర్చలు వేడెక్కుతున్నాయి. త్వరలో ప్రత్యేక అసెంబ్లీ సమావేశాలు నిర్వహించి ఈ అంశంపై విస్తృతంగా చర్చించాలనే నిర్ణయాన్ని ముఖ్యమంత్రి నారా చంద్రబాబు నాయుడు ప్రకటించారు.
కూటమి నేతలతో నిర్వహించిన టెలీకాన్ఫరెన్స్లో సీఎం మాట్లాడుతూ, మహిళా రిజర్వేషన్ బిల్లును విపక్షాలు వ్యతిరేకిస్తున్న తీరు ప్రజలకు స్పష్టంగా తెలియజేయాల్సిన అవసరం ఉందన్నారు. ముఖ్యంగా కాంగ్రెస్ పార్టీ మరియు ఇతర పక్షాల వైఖరిని అసెంబ్లీ వేదికగా చర్చించి ప్రజల ముందుంచుదామని చెప్పారు.
ఇప్పటికే నిడదవోలులో నిర్వహించిన నిరసన ర్యాలీలో పాల్గొన్నామని గుర్తుచేసిన సీఎం, ఈ అంశంపై ప్రజల్లో అవగాహన పెంచేందుకు మరిన్ని కార్యక్రమాలు చేపడతామని వెల్లడించారు. ఇందులో భాగంగా విశాఖపట్నం, విజయవాడ, తిరుపతిలో మూడు భారీ బహిరంగ సభలు నిర్వహించాలనే నిర్ణయం తీసుకున్నట్లు తెలిపారు.
మహిళా రిజర్వేషన్ బిల్లును ప్రారంభం నుంచే కాంగ్రెస్ వ్యతిరేకిస్తోందని సీఎం విమర్శించారు. అయితే 2023లో ప్రధాని నరేంద్ర మోదీ నేతృత్వంలోని కేంద్ర ప్రభుత్వం ఈ బిల్లును చట్టంగా మార్చిందని పేర్కొన్నారు. ఈ విషయాన్ని మహిళలకు స్పష్టంగా వివరించాల్సిన అవసరం ఉందన్నారు.
ఈ కార్యక్రమాల సమన్వయానికి రాష్ట్రవ్యాప్తంగా ప్రత్యేక కమిటీని కూడా ఏర్పాటు చేశారు. ఈ కమిటీలో పల్లా శ్రీనివాసరావు, మాధవ్, నాదెండ్ల మనోహర్ లను సభ్యులుగా నియమించినట్లు సీఎం వెల్లడించారు. మహిళా రిజర్వేషన్ బిల్లుపై రాజకీయంగా మరింత చర్చను ప్రేరేపించేలా ప్రభుత్వం చర్యలు తీసుకుంటుండగా, రాబోయే అసెంబ్లీ సమావేశాలు కీలకంగా మారనున్నాయి.
