రాష్ట్రవ్యాప్తంగా ఉన్న 847 ప్రాథమిక వ్యవసాయ సహకార సొసైటీలకు (PACS) కొత్త కమిటీలను నియమిస్తూ ఆంధ్రప్రదేశ్ ప్రభుత్వం ఉత్తర్వులు జారీ చేసింది. ఈ కమిటీలలో ఛైర్పర్సన్లు, డైరెక్టర్లు, సభ్యులను నియమించి, వీరి పదవీ కాలం 2026 జనవరి 30 వరకు కొనసాగనున్నట్లు స్పష్టంచేసింది.
సహకార శాఖ ప్రత్యేక ప్రధాన కార్యదర్శి బి. రాజశేఖర్ సంతకం చేసిన ఈ ఆదేశాలను సహకార సొసైటీల కమిషనర్కు పంపించారు. కొత్త కమిటీలు బాధ్యతలు స్వీకరించిన తర్వాత సొసైటీల పనితీరును మెరుగుపరచేలా తగిన కార్యాచరణ ప్రణాళికలు సిద్ధం చేయాలని ఆయన సూచించారు.
ప్రాథమిక వ్యవసాయ సహకార సొసైటీలు రైతులకు పంట రుణాలు, ఎరువులు, విత్తనాలు, వ్యవసాయ పరికరాలు వంటి అనేక సేవలను అందిస్తాయి. కాబట్టి కొత్తగా నియమితులైన కమిటీ సభ్యులు రైతులతో మరింత సమన్వయం పెంచి, సమయానికి సహాయం అందించాలని ప్రభుత్వం దిశానిర్దేశం చేసింది.
ఈ నియామకాలతో, కొంతకాలంగా నిర్వాహకులు లేక ఇబ్బందులు ఎదుర్కొంటున్న సొసైటీలకు నూతన ఉత్సాహం వస్తుందని అధికార వర్గాలు భావిస్తున్నాయి.
