ఆంధ్రప్రదేశ్ నుంచి దేశీయ, అంతర్జాతీయ గగన సర్వీసులు వేగంగా విస్తరిస్తున్నాయి. ఇటీవలే అనేక నగరాలకు కొత్త విమాన సర్వీసులు ప్రారంభమయ్యాయి. తాజా సమాచారం ప్రకారం విజయవాడ నుంచి సింగపూర్కు ఇండిగో విమాన సంస్థ నూతన అంతర్జాతీయ సర్వీసును ప్రారంభించనుంది. నవంబర్ 15న మొదలయ్యే ఈ సర్వీసు ద్వారా ఏపీ ప్రజలు కేవలం నాలుగు గంటల్లోనే సింగపూర్ చేరుకునే అవకాశం ఉంది. ఈ సర్వీసుతో రాష్ట్ర ప్రజలకు విదేశీ ప్రయాణం మరింత సులభతరం అవుతుందని అధికారులు వెల్లడించారు.
ఇండిగో సంస్థ నిర్ణయించిన ప్రకారం ఈ విమాన టికెట్ ధర రూ.8 వేలుగా నిర్ణయించారు. ఈ విమానం ఉదయం సింగపూర్ నుంచి బయలుదేరి భారతీయ కాలమానం ప్రకారం ఉదయం 7.45 గంటలకు విజయవాడ విమానాశ్రయానికి చేరుకుంటుంది. అక్కడి నుంచి తిరిగి ఉదయం 10.05 గంటలకు బయలుదేరి మధ్యాహ్నం 2.05 గంటలకు సింగపూర్లోని ప్రసిద్ధ చాంగి విమానాశ్రయానికి చేరుకుంటుంది. కేవలం నాలుగు గంటల్లోనే ప్రయాణం పూర్తవ్వడం ప్రయాణికులకు సమయపరంగా ఎంతో సౌకర్యవంతంగా మారనుంది. ఇప్పటికే ఈ సర్వీసుకు సంబంధించిన టికెట్ల అమ్మకాలు ప్రారంభమయ్యాయి.
ఈ విమాన సర్వీసులు వారానికి మూడు రోజులు—మంగళవారం, గురువారం, శనివారం నడుస్తాయి. ప్రారంభ దశలో బోయింగ్ విమానాల్లో 180 నుంచి 230 సీట్ల సామర్థ్యంతో ప్రయాణికులకు సేవలు అందించనున్నారు. ప్రయాణికుల స్పందన, రద్దీ ఆధారంగా రోజువారీ సర్వీసులు ప్రారంభించే ఆలోచనలో ఇండిగో ఉంది. గతంలో 2018 డిసెంబర్ నుంచి 2019 జూన్ మధ్య నడిచినప్పుడు ఈ సర్వీసులకు అద్భుతమైన స్పందన లభించింది. అప్పుడు సింగపూర్ నుంచి విజయవాడకు వచ్చే విమానాల్లో 90 శాతం, విజయవాడ నుంచి సింగపూర్ వెళ్లే విమానాల్లో 80 శాతం సీట్లు నిండిపోయాయి.
ఆ అనుభవంతోనే ఇప్పుడు ఇండిగో మరోసారి ఈ సర్వీసులను పునఃప్రారంభిస్తోంది. రాష్ట్ర రాజధాని ప్రాంతమైన విజయవాడ నుంచి నేరుగా సింగపూర్కు కనెక్టివిటీ అందించడం ద్వారా వ్యాపార, పర్యాటక, విద్యా ప్రయాణాలు మరింత వేగవంతం కానున్నాయి. ప్రత్యేకించి విదేశాల్లో చదువుకునే విద్యార్థులు, వ్యాపార ప్రయోజనాల కోసం తరచుగా సింగపూర్ వెళ్లే ప్రయాణికులకు ఈ సర్వీసు ఎంతో ఉపయోగకరంగా మారనుంది. ఏపీ నుంచి విదేశీ గగన సర్వీసుల విస్తరణ రాష్ట్ర అభివృద్ధికి, ఆర్థిక కార్యకలాపాల పెరుగుదలకు దోహదపడనుంది.
