విశాఖ రైల్వే జోన్: 2026 జూన్ నాటికి కార్యకలాపాలు ప్రారంభం!
చంద్రబాబు ప్లాన్: కొత్త జోన్లో అరకు, కర్నూలు సెక్షన్ల విలీనానికి ప్రతిపాదన….
డెడ్లైన్ ఫిక్స్: రైల్వే జోన్పై కేంద్ర మంత్రికి సీఎం చంద్రబాబు కీలక వినతి…
New Railway Lines: ఆంధ్రప్రదేశ్ ప్రజల చిరకాల స్వప్నం 'దక్షిణ కోస్తా రైల్వే జోన్' ఏర్పాటుపై కీలక అడుగు పడింది. విశాఖలోని వీఎంఆర్డీఏ కార్యాలయంలో ఏర్పాటు చేసిన తాత్కాలిక రైల్వే జోన్ ఆఫీసును ముఖ్యమంత్రి చంద్రబాబు నాయుడు, కేంద్ర రైల్వే మంత్రి అశ్వినీ వైష్ణవ్ కలిసి సందర్శించారు. ఈ సందర్భంగా రాష్ట్రంలోని రైల్వే ప్రాజెక్టుల పురోగతిపై ఉన్నతాధికారులతో కలిసి వారు ప్రత్యేక సమీక్షా సమావేశం నిర్వహించారు.
ఈ సమావేశంలో ముఖ్యమంత్రి చంద్రబాబు గారు ఒక కీలక ప్రతిపాదన చేశారు. 2026, జూన్ 1వ తేదీ నాటికి ఈ కొత్త రైల్వే జోన్ పనులు పూర్తి చేసి, కార్యకలాపాలు మొదలయ్యేలా గెజిట్ నోటిఫికేషన్ విడుదల చేయాలని కేంద్ర మంత్రిని కోరారు. దీనివల్ల రాష్ట్రంలో రైల్వే పరిపాలన వేగవంతం అవుతుందని ఆయన అభిప్రాయపడ్డారు.
అంతేకాకుండా, కొత్త జోన్ పరిధిని మరింత పెంచాలని సీఎం కోరారు. ప్రస్తుతం వేరే జోన్లలో ఉన్న అరకు - కొత్తవలస, కర్నూలు - డోన్ రైల్వే సెక్షన్లను కూడా విశాఖ కేంద్రంగా వచ్చే ఈ కొత్త జోన్లోనే కలపాలని విన్నవించారు. దీనివల్ల ఆయా ప్రాంతాల వెనుకబడిన ప్రజలకు మెరుగైన రవాణా సౌకర్యాలు అందుతాయని, వ్యాపార పరంగా ఆ ప్రాంతాలు అభివృద్ధి చెందుతాయని వివరించారు.
ఆంధ్రప్రదేశ్ను దేశంలోనే అతిపెద్ద లాజిస్టిక్స్ హబ్ (రవాణా కేంద్రం) గా మార్చాలన్నది ప్రభుత్వ లక్ష్యం. అయితే ప్రస్తుతం ఉన్న రైల్వే లైన్ల సాంద్రత సరిపోకపోవడం వల్ల అనుకున్న లక్ష్యాలను చేరుకోవడంలో ఇబ్బందులు ఎదురవుతున్నాయని సీఎం గుర్తుచేశారు. రాష్ట్రంలో ఉన్న ఓడరేవులను (Ports) ఇతర రాష్ట్రాల వ్యాపార కేంద్రాలతో అనుసంధానం చేస్తే ఆర్థికంగా రాష్ట్రం ఎంతో బలపడుతుందని ఆయన సూచించారు.
కేంద్ర మంత్రి అశ్వినీ వైష్ణవ్ గారు స్పందిస్తూ.. ఏపీలో రైల్వే అభివృద్ధికి కేంద్రం కట్టుబడి ఉందని, ప్రాజెక్టులన్నింటినీ వేగంగా పూర్తి చేస్తామని హామీ ఇచ్చారు. ఈ సమీక్షలో దక్షిణ మధ్య, తూర్పు, దక్షిణ కోస్తా రైల్వే జోన్లకు చెందిన ఉన్నతాధికారులు పాల్గొన్నారు.
