ఆంధ్రప్రదేశ్లో పాలనను మరింత ప్రజాకేంద్రీకృతంగా మార్చేందుకు ముఖ్యమంత్రి చంద్రబాబు నాయుడు కీలక నిర్ణయం తీసుకున్నారు. ప్రజా సమస్యల పరిష్కారంలో జాప్యానికి తావు లేకుండా ‘జీరో టాలరెన్స్’ విధానంతో పనిచేయాలని జిల్లా కలెక్టర్లకు స్పష్టమైన ఆదేశాలు జారీ చేశారు. వచ్చే జనవరి నెల నుంచి జిల్లాల్లో ఆకస్మిక తనిఖీలు చేపట్టి, అధికారుల పనితీరును ప్రత్యక్షంగా పరిశీలిస్తానని సీఎం వెల్లడించారు. ప్రజల ఫిర్యాదుల పరిష్కారంలో అలసత్వం వహిస్తే ఎలాంటి మినహాయింపులు ఉండవని ఆయన హెచ్చరించారు.
కలెక్టర్లతో నిర్వహించిన ఉన్నతస్థాయి సమీక్ష సమావేశంలో చంద్రబాబు మాట్లాడుతూ, ప్రజల నుంచి వచ్చే ఫిర్యాదులను ఆర్థిక, ఆర్థికేతర అంశాలుగా వర్గీకరించి, ప్రతి సమస్యకు నిర్దిష్ట గడువులో పరిష్కారం చూపాలని సూచించారు. ఏ శాఖ నుంచి ఎక్కువ ఫిర్యాదులు వస్తున్నాయో విశ్లేషించి, అక్కడ పాలనలో లోపాలను సరిదిద్దుకోవాలని ఆదేశించారు. గ్రీవెన్సులు ఎక్కువగా ఉంటే పాలనలో సమస్యలున్నట్లేనని, ఫిర్యాదులు తగ్గితేనే నిజమైన పరిపాలన ఫలితాలు కనిపిస్తాయని చంద్రబాబు స్పష్టం చేశారు. వచ్చే త్రైమాసికానికి ‘జీరో గ్రీవెన్సులు’ సాధించడమే లక్ష్యంగా పని చేయాలని సూచించారు.
నగరాలు, పట్టణాల్లో నెలకొన్న మురుగు కాలువల సమస్యపై కూడా సీఎం ప్రత్యేకంగా దృష్టి సారించారు. రాబోయే మూడు నెలల్లోగా రాష్ట్రవ్యాప్తంగా అన్ని పట్టణాల్లో మురుగు కాలువలను పూర్తిస్థాయిలో శుభ్రం చేసేలా కార్యాచరణ రూపొందించాలని అధికారులకు ఆదేశించారు. వర్షాకాలానికి ముందే డ్రైనేజీ సమస్యలను పరిష్కరించకపోతే ప్రజలు తీవ్ర ఇబ్బందులు పడతారని, దీనిపై నిర్లక్ష్యం తగదని చంద్రబాబు స్పష్టం చేశారు. పారిశుధ్య సమస్యలు ప్రజల ఆరోగ్యంపై నేరుగా ప్రభావం చూపుతాయని గుర్తు చేశారు.
అదేవిధంగా తాగునీటి సరఫరాపై కూడా ముఖ్యమంత్రి కఠిన ఆదేశాలు జారీ చేశారు. రాష్ట్రంలో ఎక్కడైనా తాగునీటి కొరత ఏర్పడితే వెంటనే స్పందించి సమస్యను పరిష్కరించాలని జలవనరుల శాఖను ఆదేశించారు. నీటి భద్రతపై పెద్ద మాటలు చెప్పే పరిస్థితిలో ప్రజలకు తాగునీటి ఇబ్బందులు ఉండకూడదని ఆయన తేల్చిచెప్పారు. కూటమి ప్రభుత్వం ప్రజల సమస్యలను తక్షణమే పరిష్కరించే బాధ్యతతో పనిచేస్తోందని, ఇకపై పాలనలో స్పష్టమైన మార్పులు కనిపిస్తాయని చంద్రబాబు నాయుడు పేర్కొన్నారు.
