ఆంధ్రప్రదేశ్లో రేషన్ కార్డుదారులకు ఒక కీలక హెచ్చరిక జారీ అయ్యింది. మంత్రి నాదెండ్ల మనోహర్ ప్రకటించిన ప్రకారం, వరుసగా మూడు నెలలు రేషన్ తీసుకోకపోతే ఆ రేషన్ కార్డు రద్దు అవుతుంది. అయితే, కార్డు రద్దైన తర్వాత కూడా దగ్గరలోని సచివాలయానికి వెళ్లి సమాచారం ఇచ్చినట్లయితే, తిరిగి యాక్టివేట్ చేసుకునే అవకాశం ఉంటుంది.
రాష్ట్రంలో ప్రస్తుతం 29,762 రేషన్ షాపుల ద్వారా ప్రతినెలా 4.42 కోట్ల మందికి సరుకులు పంపిణీ చేస్తున్నారు. వృద్ధుల ఇళ్లకు రేషన్ సరుకులు చేరేలా ప్రత్యేక చర్యలు తీసుకుంటున్నామని ప్రభుత్వం తెలిపింది. ఇప్పటికే దేశంలోనే 96.5% ఈ-కేవైసీ పూర్తి చేసిన ఏకైక రాష్ట్రం ఆంధ్రప్రదేశ్ అని మంత్రి చెప్పారు.
అక్టోబర్ 31 వరకు ఉచితంగా స్మార్ట్ రేషన్ కార్డులు అందిస్తామని, నవంబర్ 1 నుంచి రుసుము చెల్లించి పోస్టు ద్వారా కూడా పొందవచ్చని నాదెండ్ల మనోహర్ వెల్లడించారు. అలాగే, స్మార్ట్ కార్డుల్లో తప్పులు ఉన్నవారు ఈ గడువులోపు సచివాలయాల్లో దరఖాస్తు చేసుకుని సరిచేసుకోవచ్చని చెప్పారు. త్వరలోనే ‘మనమిత్ర’ వాట్సాప్ ద్వారా కూడా ఈ సేవలు పొందవచ్చని వివరించారు.
ఆధార్ వివరాల ఆధారంగా ముద్రించిన స్మార్ట్ రేషన్ కార్డుల్లో కొంత తప్పులు వచ్చినప్పటికీ, అవన్నీ సరిచేసి కొత్త కార్డులు ఉచితంగా ఇస్తామని ప్రభుత్వం హామీ ఇచ్చింది. ఇప్పటికే నాలుగు విడతల్లో 1.45 కోట్ల స్మార్ట్ కార్డులు పంపిణీ జరుగుతున్నాయి. దాంతో రేషన్ తీసుకోవడంలో ఇబ్బందులు ఎదురైతే షాపు వద్ద ఉన్న QR కోడ్ను స్కాన్ చేసి నేరుగా పౌరసరఫరాల శాఖకు ఫిర్యాదు చేయవచ్చని తెలిపారు.
ప్రభుత్వం అమలు చేస్తున్న ఈ చర్యల వల్ల రేషన్ వ్యవస్థలో పారదర్శకత పెరుగుతుందని, ప్రజలు డిజిటల్ సదుపాయాలను సులభంగా ఉపయోగించుకోగలరని అధికారులు ఆశాభావం వ్యక్తం చేశారు. అలాగే, వైట్ రేషన్ కార్డు కలిగిన వారికి మాత్రమే ప్రభుత్వ పథకాలు వర్తిస్తాయని మంత్రివర్యులు గుర్తు చేశారు. దీంతో, అర్హులైన ప్రతి ఒక్కరూ తప్పకుండా ఈ అవకాశాన్ని వినియోగించుకోవాలని సూచించారు.
