ఆంధ్రప్రదేశ్లో గ్రామ, వార్డు సచివాలయాల్లో పనిచేస్తున్న పశుసంవర్ధక సహాయకుల (AHA) నియామకాల్లో పెద్ద వివాదం వెలుగులోకి వచ్చింది. గత ప్రభుత్వ కాలంలో కొందరు నకిలీ విద్యా ధ్రువపత్రాలను సమర్పించి ఈ ఉద్యోగాల్లో చేరారని ఆరోపణలు వచ్చాయి. రాష్ట్ర పశువైద్య మండలి (Veterinary Council) ఈ అంశాన్ని సీరియస్గా తీసుకుని ప్రాథమికంగా వందలాది మందిపై అనుమానాలు గుర్తించింది. దీంతో ఉద్యోగుల్లో పెద్ద ఎత్తున టెన్షన్ నెలకొంది.
పశుసంవర్ధక సహాయకుల పోస్టులకు పదో తరగతి విద్యతో పాటు పశువైద్యం లేదా డెయిరీ రంగాల్లో డిప్లొమా తప్పనిసరి అర్హత. అయితే, తొలి నోటిఫికేషన్లలో తగిన అభ్యర్థులు దొరకకపోవడంతో మరింత అవకాశాలు కల్పించారు. ఈ పరిస్థితిని కొందరు దుర్వినియోగం చేసుకుని, పొరుగు రాష్ట్రాల కొన్ని అనుమానాస్పద విద్యాసంస్థల నుంచి నకిలీ డిప్లొమా, వోకేషనల్ సర్టిఫికెట్లు తెచ్చుకుని ఉద్యోగాలు పొందినట్లు ఆరోపణలు ఉన్నాయి.
ఈ వ్యవహారం కొత్త ప్రభుత్వ దృష్టికి రాగానే, పశువైద్య మండలి పెద్ద ఎత్తున విచారణ ప్రారంభించింది. వివిధ వర్గాల నుంచి వచ్చిన ఫిర్యాదులు, సమాచారం ఆధారంగా అధికారులు పత్రాలను పరిశీలిస్తున్నారు. మొదటి దశలోనే నకిలీ ధ్రువపత్రాలు ఉపయోగించి ఉద్యోగాలు సంపాదించిన వారు అధిక సంఖ్యలో ఉన్నట్లు గుర్తించారు. ఈ కేసులో పూర్తి వివరాలు బయటకు వస్తే, చాలామంది ఉద్యోగాలు రద్దు అయ్యే అవకాశం ఉందని చర్చ జరుగుతోంది.
ఈరోజు పశువైద్య మండలి కీలక సమావేశం నిర్వహిస్తోంది. ఇందులో రాష్ట్రవ్యాప్తంగా ఉన్న AHA ఉద్యోగులను పిలిపించి, వారి విద్యా ధ్రువపత్రాలను పూర్తిగా వెరిఫై చేయనున్నారు. వారు చదివిన కళాశాలలు, ఆ కాలేజీలకు గుర్తింపు ఉందా, సర్టిఫికెట్లు నిజమా కాదా అనే విషయాలు ఒక్కొక్కటిగా చెక్ చేయబోతున్నారు. నకిలీ పత్రాలు సమర్పించినట్లు తేలితే, వెంటనే చర్యలు తీసుకునేలా అధికారుల ప్రణాళిక ఉంది.
ఈ వ్యవహారం వెలుగులోకి రావడంతో గ్రామ, వార్డు సచివాలయాల్లో పనిచేస్తున్న పలువురు ఉద్యోగుల్లో ఆందోళన నెలకొంది. నకిలీ సర్టిఫికెట్లు ఇచ్చి ఉద్యోగాలు పొందిన వారికి మాత్రమే కాకుండా, నిజాయితీగా పనిచేస్తున్న ఉద్యోగులపై కూడా ప్రభావం పడుతుందేమో అన్న భయం కనిపిస్తోంది. మొత్తంగా ఈ వివాదం రాష్ట్రంలో పెద్ద చర్చనీయాంశంగా మారింది. ఇప్పుడు ప్రభుత్వం, మండలి తీసుకునే తుది నిర్ణయం ఏంటి అన్నది ఆసక్తిగా మారింది.
