దేశంలో ఎలక్ట్రిక్ వాహనాల మార్కెట్ వేగంగా విస్తరిస్తోంది. పర్యావరణహిత వాహనాల వైపు వినియోగదారుల మొగ్గు పెరుగుతున్న నేపథ్యంలో ప్రముఖ ఆటో కంపెనీలు కొత్త కొత్త ఈవీ మోడళ్లను విడుదల చేస్తున్నాయి. అదే సమయంలో ప్రభుత్వాలు కూడా హైవేలపై ఛార్జింగ్‌ స్టేషన్లను ఏర్పాటు చేస్తూ ఎలక్ట్రిక్ వాహనాల వినియోగాన్ని ప్రోత్సహిస్తున్నాయి. ఈ క్రమంలో టాటా మోటార్స్ నుంచి వచ్చిన టియాగో EV ప్రస్తుతం బడ్జెట్‌ రేంజ్‌లో అత్యంత పాపులర్‌ మోడల్‌గా నిలుస్తోంది. తక్కువ ఖర్చుతో ఎక్కువ రేంజ్ ఇవ్వడం, టెక్నాలజీ ఫీచర్ల పరంగా అధిక విలువ కలిగివుండడం దీని ప్రత్యేకత.
టాటా టియాగో EV హ్యాచ్‌బ్యాక్‌ డిజైన్‌లో రూపొందించబడింది. ఇందులో సౌకర్యవంతంగా నలుగురు ప్రయాణించవచ్చు. ఈ కారు రెండు బ్యాటరీ వేరియంట్లలో లభిస్తుంది — 19.2 kWh మరియు 24 kWh. చిన్న బ్యాటరీ వేరియంట్‌ ఒకసారి ఛార్జ్ చేస్తే గరిష్టంగా 250 కిలోమీటర్లు, పెద్ద బ్యాటరీ వేరియంట్‌ 315 కిలోమీటర్ల వరకు ప్రయాణిస్తుంది. అయితే రియల్‌ వరల్డ్‌ పరిస్థితుల్లో స్పీడ్‌, రోడ్డు స్థితిని బట్టి వరుసగా 160 కిలోమీటర్లు, 200 కిలోమీటర్ల వరకు రేంజ్ ఇస్తుందని యూజర్‌ రివ్యూలు చెబుతున్నాయి. ఈ కారు ప్రతి కిలోమీటర్‌కి సగటున ఒక రూపాయి ఖర్చు మాత్రమే అవుతుంది.
పెర్ఫార్మెన్స్‌ పరంగా కూడా టియాగో EV అద్భుతంగా ఉంటుంది. 10 సెకన్లలోనే 0 నుంచి 60 కిమీ వేగాన్ని చేరుకుంటుంది. ఇందులో 10.25 అంగుళాల టచ్‌స్క్రీన్‌ ఇన్ఫోటైన్‌మెంట్‌ సిస్టమ్, ఆండ్రాయిడ్‌ ఆటో, ఆపిల్‌ కార్‌ప్లే కనెక్టివిటీ ఉన్నాయి. అదనంగా ఆటో క్లైమేట్‌ కంట్రోల్‌, రియర్‌ వ్యూ కెమెరా, పార్కింగ్‌ సెన్సార్స్‌, క్రూజ్‌ కంట్రోల్‌, కీలెస్‌ ఎంట్రీ వంటి ఆధునిక ఫీచర్లు అందుబాటులో ఉన్నాయి. భద్రత విషయంలో కూడా కంపెనీ ఎటువంటి రాజీ పడలేదు — డ్యూయల్‌ ఎయిర్‌బ్యాగ్స్‌, ABS, EBD వంటి సేఫ్టీ ఫీచర్లు ప్రామాణికంగా ఉన్నాయి.
ధరల విషయానికి వస్తే, టాటా టియాగో EV ఎక్స్‌షోరూమ్‌ ధర రూ.7.99 లక్షల నుంచి ప్రారంభమవుతుంది. రెండు నెలల వెయిటింగ్‌ పీరియడ్‌ ఉండగా, ఇప్పుడే బుక్‌ చేస్తే రెండు నెలల తర్వాత కారు డెలివరీ లభిస్తుంది. నగరాల్లో ప్రతిరోజూ చిన్న దూర ప్రయాణాలకు, ఆఫీస్‌ కమ్యూట్‌లకు ఈ కారు సరైన ఎంపికగా వినియోగదారులు భావిస్తున్నారు. తక్కువ ఖర్చు, అధిక ఫీచర్లు, స్టైలిష్‌ లుక్‌ — ఇవన్నీ కలిపి టియాగో EVని భారత మార్కెట్లో అత్యంత ప్రాచుర్యం పొందిన ఎలక్ట్రిక్ కార్లలో ఒకటిగా నిలిపాయి.
