కేంద్ర వ్యవసాయ శాఖ మంత్రి శివరాజ్ సింగ్ చౌహాన్పై పాకిస్తాన్ గూఢచార సంస్థ ఐఎస్ఐ నిఘా పెట్టినట్టు వచ్చిన ఇంటెలిజెన్స్ సమాచారం దేశవ్యాప్తంగా కలకలం రేపుతోంది. ఈ సమాచారం నేపథ్యంలో కేంద్ర ప్రభుత్వం వెంటనే స్పందించి ఆయన భద్రతను మరింత కట్టుదిట్టం చేసింది. ఇప్పటికే జడ్ ప్లస్ కేటగిరీ భద్రత ఉన్నప్పటికీ, తాజా హెచ్చరికలతో అదనపు అప్రమత్తత చర్యలు చేపట్టింది. కేంద్రమంత్రి సంబంధిత కీలక సమాచారాన్ని ఐఎస్ఐ ఏజెంట్లు సేకరిస్తున్నారని కేంద్ర హోం మంత్రిత్వ శాఖకు నివేదికలు అందినట్టు అధికార వర్గాలు వెల్లడించాయి.
ఈ హెచ్చరికల ఆధారంగా కేంద్ర హోం శాఖ మధ్యప్రదేశ్ డైరెక్టర్ జనరల్ ఆఫ్ పోలీస్కు (డీజీపీ) ప్రత్యేక లేఖ రాసింది. సమాచారం అందిన వెంటనే రాష్ట్ర, కేంద్ర భద్రతా సంస్థలు అలర్ట్ అయ్యాయి. శివరాజ్ సింగ్ చౌహాన్ భద్రతా ఏర్పాట్లను సమీక్షించి మరింత పటిష్టం చేయాలని అధికారులకు ఆదేశాలు జారీ చేశారు. ఆయన నివాసాలు, ప్రయాణ మార్గాలు, బహిరంగ కార్యక్రమాలన్నింటిలోనూ ఎలాంటి భద్రతా లోపాలు లేకుండా చర్యలు తీసుకోవాలని స్పష్టంగా సూచించారు.
అదనపు భద్రతా చర్యల్లో భాగంగా భోపాల్లోని 74 బంగ్లాలో ఉన్న శివరాజ్ సింగ్ చౌహాన్ నివాసం (B8) వద్ద భారీగా బారికేడ్లు ఏర్పాటు చేశారు. అలాగే ఢిల్లీలోని ఆయన అధికారిక నివాసం వద్ద కూడా భద్రతను గణనీయంగా పెంచారు. మధ్యప్రదేశ్ చీఫ్ సెక్రటరీతో పాటు ఢిల్లీ పోలీసుల స్పెషల్ కమిషనర్ (సెక్యూరిటీ)కు కూడా ఈ విషయంలో తగిన ఆదేశాలు ఇచ్చారు. కేంద్ర భద్రతా ఏజెన్సీలతో సమన్వయం చేసుకుని ఈ భద్రతా సమీక్ష చేపట్టినట్టు అధికారులు తెలిపారు.
ప్రస్తుతం శివరాజ్ సింగ్ చౌహాన్కు ఉన్న జడ్ ప్లస్ భద్రత దేశంలోనే అత్యున్నత స్థాయి రక్షణగా పరిగణించబడుతుంది. సాధారణంగా ఈ భద్రతలో ఎలైట్ కమాండోలు సహా సుమారు 55 మంది శిక్షణ పొందిన సిబ్బంది ఉంటారు. తాజా హెచ్చరికల నేపథ్యంలో అదనపు బలగాలను మోహరించారా లేదా అనే అంశంపై ప్రభుత్వం స్పష్టత ఇవ్వలేదు. అయితే ఎలాంటి అవాంఛనీయ ఘటనలు జరగకుండా అన్ని ముందస్తు చర్యలు తీసుకోవాలని కేంద్ర హోం శాఖ స్పష్టంగా ఆదేశించిందని అధికార వర్గాలు పేర్కొన్నాయి.
