- అసెంబ్లీలో లో బలం నిరపించుకునే అవకాశం ఇవ్వాలన్న ప్రకాశ్ రాజ్..
- Politics: 118 మంది ఎమ్మెల్యేలు ఉంటేనే ప్రభుత్వ ఏర్పాటు అంటున్న గవర్నర్..
Prakash Raj: తమిళనాడు రాజకీయాల్లో ప్రభుత్వ ఏర్పాటు చుట్టూ నెలకొన్న ఉత్కంఠ ఇప్పుడు న్యాయస్థానాల వైపు మళ్లుతోంది. ఈ పరిణామాలపై నటుడు ప్రకాశ్ రాజ్ స్పందిస్తూ గవర్నర్ నిర్ణయాత్మక తీరును తీవ్రంగా విమర్శించారు. ప్రజల ఆదరణ పొందిన నాయకుడికి శాసనసభ వేదికగా తన బలాన్ని నిరూపించుకునే అవకాశం కల్పించాల్సిన బాధ్యత గవర్నర్పై ఉందని, రాజ్యాంగపరమైన ఈ ప్రక్రియకు అడ్డంకులు సృష్టించడం ప్రజాస్వామ్య స్ఫూర్తికే విరుద్ధమని ఆయన అభిప్రాయపడ్డారు. మెజారిటీ ఉందో లేదో సభలోనే తేలాలని, దానికి ముందే అడ్డంకులు కల్పించడం సమంజసం కాదని ఆయన స్పష్టం చేశారు.
ప్రభుత్వ ఏర్పాటుకు సంబంధించి ఇప్పటికే టీవీకే (TVK) అధినేత విజయ్, గవర్నర్ రాజేంద్ర విశ్వనాథ్ ఆర్లేకర్ను కలిసి విన్నవించినప్పటికీ, సాంకేతిక కారణాలు ఆటంకంగా మారాయి. మ్యాజిక్ ఫిగర్ 118కి అవసరమైన సంఖ్యాబలం ప్రస్తుతానికి లేకపోవడంతో, తగినంత మంది ఎమ్మెల్యేల మద్దతు లేఖలు సమర్పించకుండా ఆహ్వానించలేమని గవర్నర్ తేల్చిచెప్పారు. దీనికి ప్రతిగా, ఫ్లోర్ టెస్ట్ (Floor Test) ద్వారా సభలోనే తన బలాన్ని నిరూపించుకుంటానని విజయ్ పట్టుబడుతున్నారు. ఒకవేళ రాజ్భవన్ నుంచి ఆశించిన స్పందన రాకపోతే, చారిత్రాత్మకమైన ఎస్.ఆర్. బొమ్మై కేసు తీర్పును ఆధారంగా చేసుకుని సుప్రీంకోర్టును ఆశ్రయించేందుకు విజయ్ బృందం న్యాయ నిపుణులతో సంప్రదింపులు జరుపుతోంది.
రాజకీయంగా అవసరమైన ఆరుగురు ఎమ్మెల్యేల మద్దతును కూడగట్టేందుకు విజయ్ వర్గం తెరవెనుక ముమ్మర ప్రయత్నాలు చేస్తోంది. అన్నాడీఎంకేలోని అసంతృప్త నేతలు లేదా స్వతంత్రులు, ఇతర చిన్న పార్టీల ఎమ్మెల్యేలతో చర్చలు సాగిస్తోంది. సంఖ్యాబలంపై స్పష్టమైన హామీ లభిస్తేనే గవర్నర్ నుంచి ఆహ్వానం వచ్చే అవకాశం ఉండటంతో, ప్రస్తుతానికి పరిస్థితి రాజ్భవన్ నిర్ణయం మరియు కోర్టు మెట్ల మధ్య దోబూచులాడుతోంది. విజయ్ వేయబోయే తదుపరి అడుగు తమిళనాట అధికారం ఎవరికి దక్కుతుందనే అంశాన్ని నిర్ణయించనుంది.
