ఆంధ్రప్రదేశ్ ప్రజలకు దసరా పండుగ సందర్బంగా రాష్ట్ర ప్రభుత్వం బంపరాఫర్లను ప్రకటించింది. లేపాక్షి సంస్థ అక్టోబరు 1 వరకు ప్రత్యేక రాయితీలను అందిస్తున్నట్లు ఛైర్మన్ డాక్టర్ పసుపులేటి హరిప్రసాద్ తెలిపారు. ఈ రాయితీలు తిరుమల మినహా అన్ని లేపాక్షి షోరూంలలో, అలాగే హైదరాబాద్‌లోని షోరూంలలో కూడా అందుబాటులో ఉంటాయి. హస్తకళలపై 15 శాతం, చేనేత వస్త్రాలపై 10 శాతం రాయితీని అందిస్తున్నట్లు ఆయన వెల్లడించారు. ప్రజలు ఈ అవకాశాన్ని వినియోగించుకోవాలని సూచించారు. అదేవిధంగా అన్ని లేపాక్షి విక్రయ కేంద్రాల్లో బొమ్మల కొలువును ఏర్పాటు చేస్తున్నామని, కొండపల్లి, ఏటికొప్పాక బొమ్మలు, ఓడీఓపీ, జీఐ ఉత్పత్తులతో ప్రత్యేకంగా అలంకరించనున్నామని తెలిపారు. కొత్త డిజైన్లతో కూడిన ఆకర్షణీయమైన బొమ్మలు కూడా అందుబాటులో ఉంటాయని హరిప్రసాద్ వివరించారు.
అలాగే ఏపీ ప్రభుత్వం చేనేత కార్మికుల సంక్షేమం కోసం మరో కీలక నిర్ణయం తీసుకుంది. దసరా, దీపావళి పండుగల సందర్బంగా ఆప్కో చేనేత వస్త్రాలపై 40 శాతం రాయితీ ఇవ్వనున్నట్లు రాష్ట్ర హ్యాండ్లూమ్ అండ్ టెక్స్టైల్స్ మంత్రి సవిత ప్రకటించారు. చేనేత వస్త్రాలు తెలుగు సంస్కృతికి ప్రతీకగా నిలుస్తాయని ఆమె పేర్కొన్నారు. రాయితీ వల్ల వినియోగదారులు ఆర్థిక లాభాన్ని పొందడమే కాకుండా నేత కార్మికులకు కూడా సహాయం అందుతుందని అన్నారు. పండుగల సమయంలో ఈ నిర్ణయం వినియోగదారులకు, చేనేత కుటుంబాలకు ఒక వరంలా మారుతుందని మంత్రి చెప్పారు.
చేనేత వస్త్రాల అమ్మకాలు పెంచేందుకు ప్రభుత్వం ఇప్పటికే పలు చర్యలు తీసుకుంటోందని మంత్రి సవిత వివరించారు. రాష్ట్ర, జాతీయ స్థాయిలో చేనేత వస్త్ర ప్రదర్శనలను నిర్వహిస్తున్నామని, ఈ-కామర్స్ వేదికల ద్వారా ఆన్‌లైన్ అమ్మకాలను ప్రోత్సహిస్తున్నామని చెప్పారు. దీని ద్వారా డోర్ డెలివరీ సదుపాయాన్ని కూడా అందిస్తున్నామని ఆమె వెల్లడించారు. చేనేత వస్త్రాలను ప్రోత్సహించడం ద్వారా నేత కార్మికులకు ఉపాధి కల్పించడమే కాకుండా వారి ఆర్థిక పరిస్థితులను బలోపేతం చేస్తామన్నారు. ప్రతి ఒక్కరూ చేనేత వస్త్రాలను ధరిస్తూ నేత కార్మికులకు మద్దతు ఇవ్వాలని ఆమె పిలుపునిచ్చారు.
ఇదిలా ఉండగా, గుంటూరు జిల్లా మంగళగిరిలో ఒక భారీ గోల్డ్ క్లస్టర్‌ను ఏర్పాటు చేసేందుకు రాష్ట్ర ప్రభుత్వం సిద్ధమవుతోంది. మొత్తం 78 ఎకరాల్లో ఈ క్లస్టర్‌ను ఏర్పాటు చేయనున్నారు. దీనికోసం ప్రభుత్వం ఇప్పటికే భూసేకరణ ప్రక్రియను ప్రారంభించింది. తెనాలి సబ్ కలెక్టర్ ఈ భూసేకరణ బాధ్యతలను చూసుకుంటారని అధికారికంగా ఉత్తర్వులు జారీ అయ్యాయి. అదేవిధంగా రాష్ట్ర ఎక్సైజ్ శాఖ డైరెక్టర్ చామకూరి శ్రీధర్‌కు అదనపు బాధ్యతలు అప్పగించారు. ఆయన ఇకపై బెవరేజెస్ కార్పొరేషన్ MDగా, అలాగే డిస్టిలరీస్ అండ్ బ్రూవరీస్ కమిషనర్‌గా కూడా విధులు నిర్వర్తించనున్నారు. ఈ నిర్ణయాలతో రాష్ట్రంలో పండుగ రాయితీలు, చేనేత కార్మికులకు ఊతం, పరిశ్రమలకు పెట్టుబడులు అనే మూడు రంగాల్లో ఒకేసారి కొత్త అవకాశాలు తెరుచుకున్నాయి.
