తెలుగు ప్రేక్షకులు ఆసక్తిగా ఎదురుచూస్తున్న బిగ్ బాస్ తెలుగు సీజన్ 9 ఈ సాయంత్రం 7 గంటలకు గ్రాండ్‌గా ప్రారంభంకానుంది. గత ఎనిమిది సీజన్లలా కాకుండా, ఈ సీజన్‌ను మరింత వినూత్నంగా తీర్చిదిద్దినట్లు నిర్వాహకులు వెల్లడిస్తున్నారు. ఇప్పటికే విడుదలైన ప్రోమోలు, ప్రచార వీడియోలు ప్రేక్షకుల్లో కొత్త ఉత్సుకతను రేపాయి.
ఈసారి బిగ్ బాస్ హౌస్ ఒకే రూపంలో ఉండదు. డబుల్ హౌస్ కాన్సెప్ట్తో ప్రేక్షకుల ముందుకు రాబోతోంది. ఒక హౌస్ లగ్జరీగా, ఆధునిక సౌకర్యాలతో మెరిసిపోతే, మరొక హౌస్ సాధారణంగా, సింపుల్ లైఫ్‌స్టైల్‌ను ప్రతిబింబించేలా తయారైంది. ఈ కొత్త కాన్సెప్ట్ వల్ల కంటెస్టెంట్లలో కూడా అసూయ, ఆకర్షణ, పోటీ మరింత పెరిగే అవకాశం ఉంది. ఎవరికి లగ్జరీ హౌస్ దక్కుతుంది? ఎవరికి సింపుల్ హౌస్? అన్నదానిపై ప్రేక్షకులు ఆసక్తిగా ఎదురుచూస్తున్నారు.
ఇప్పటివరకు బిగ్ బాస్ తెలుగు సీజన్లలో ఎక్కువగా సెలబ్రిటీలు మాత్రమే హౌస్‌లోకి వెళ్లారు. కానీ ఈసారి సెలబ్రిటీలు – కామనర్స్ కలయికను ప్రేక్షకులు చూడనున్నారు. మొత్తంగా 14 మంది కంటెస్టెంట్లు హౌస్‌లోకి వెళ్లనున్నారని సమాచారం. ఇందులో నటులు, గాయకులు, సోషల్ మీడియా ఇన్ఫ్లూయెన్సర్లు, సాధారణ ప్రజలు ఉంటారని తెలుస్తోంది. ఈ కలయికతో హౌస్‌లో మరింత భిన్న వాతావరణం నెలకొంటుందని నిర్వాహకులు భావిస్తున్నారు.
ప్రారంభం తర్వాత కూడా షోలో ఎప్పటికప్పుడు కొత్త ఆటగాళ్లు ఎంట్రీ ఇవ్వడం బిగ్ బాస్ ప్రత్యేకత. ఈ సీజన్‌లో కూడా వైల్డ్ కార్డ్ ఎంట్రీలు ఉండనున్నాయి. ఎప్పుడైనా కొత్త వ్యక్తులు ప్రవేశించి ఆటలో కొత్త మలుపులు తీసుకురావడం ఖాయం. లేటెస్ట్‌గా విడుదలైన ప్రోమోలో కంటెస్టెంట్లకు ఇచ్చిన బాక్స్‌ను తీసుకెళ్లవద్దని చెప్పిన తర్వాత ఒకరు వెనక్కి వెళ్ళిన సన్నివేశం చూపించారు. ఆ వ్యక్తి నటుడు భరణి అని టాక్ నడుస్తోంది. భరణి వెనక్కి వెళ్లిపోవడం నిజమేనా? లేక ఇది బిగ్ బాస్ టీమ్ వేసిన ఒక మైండ్ గేమ్ మాత్రమేనా? అన్నది ఇప్పటివరకు సస్పెన్స్‌గానే ఉంది.
ప్రతి సీజన్‌కి తెలుగు ప్రేక్షకులు విపరీతమైన స్పందన ఇస్తారు. ఈసారి కొత్త కాన్సెప్ట్, కొత్త ముఖాలు రావడంతో మరింత ఆసక్తి పెరిగింది. ముఖ్యంగా సోషల్ మీడియాలో ఇప్పటికే అభిమానులు తమకు నచ్చిన కంటెస్టెంట్లపై చర్చలు ప్రారంభించారు. ఎవరెవరు స్ట్రాంగ్‌గా నిలుస్తారు? ఎవరు తొలివారంలోనే బయటకు వెళ్తారు? అనే గాసిప్‌లు జోరందుకున్నాయి. ప్రతి సీజన్‌లో హోస్ట్ ఎంట్రీ ప్రత్యేక ఆకర్షణగా నిలుస్తుంది. ఈసారి కూడా గ్రాండ్ ఎంట్రీతో హోస్ట్ ప్రేక్షకులను అలరించనున్నారు. ఆయన స్టేజ్ ప్రెజెన్స్, హాస్యం, టైమింగ్‌ షోకు మరింత బలం చేకూరుస్తుంది.
బిగ్ బాస్ తెలుగు సీజన్ 9 మొదటి రోజు నుంచే ట్విస్టులతో ప్రేక్షకులను ఆకట్టుకునేలా సిద్ధమవుతోంది. డబుల్ హౌస్ కాన్సెప్ట్, సెలబ్రిటీలు – కామనర్స్ కలయిక, వైల్డ్ కార్డ్ ఎంట్రీలు అన్నీ కలిపి ఈ సీజన్ మరింత ఆసక్తికరంగా మారబోతుందని అభిమానులు నమ్ముతున్నారు. భరణి వెనక్కి వెళ్లిన ఎపిసోడ్ నిజమేనా? లేక బిగ్ బాస్ వేసిన ఓ ట్రాప్ మాత్రమేనా? అన్నది ఈ రాత్రి బయటపడనుంది.
