డొనాల్డ్ ట్రంప్ రెండోసారి అధికారంలోకి వచ్చాక, "అమెరికన్ ఉద్యోగుల హక్కుల పరిరక్షణ" పేరిట వలస విధానాలను మరింత కఠినతరం చేయడంపై అమెరికాలోని భారతీయ సమాజం ఇప్పుడు తీవ్ర ఆందోళనలో ఉంది. గత రెండు నెలల్లో ట్రంప్ సర్కార్ తీసుకున్న మూడు కీలక నిర్ణయాలు భారతీయ వృత్తి నిపుణుల భవిష్యత్తుపై తీవ్ర ప్రభావం చూపుతున్నాయి.
ముఖ్యంగా, ఎంప్లాయ్‌మెంట్ ఆథరైజేషన్ డాక్యుమెంట్ (EAD) ఆటోమేటిక్ రెన్యువల్ విధానాన్ని ఎలాంటి ముందస్తు ప్రకటన లేకుండా, డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ (DHS) ఆకస్మికంగా నిలిపివేయడం వేలాది మంది భారతీయులను అనిశ్చితిలోకి నెట్టింది. గతంలో, EAD రెన్యువల్ కోసం దరఖాస్తు చేసుకుంటే, ఆ ప్రక్రియ పూర్తయ్యే వరకు పాత పర్మిట్‌పైనే ఉద్యోగం చేసుకునే సౌకర్యం ఉండేది.
కానీ ఇప్పుడు ప్రతి రెన్యువల్‌కు కొత్తగా, క్షుణ్ణంగా పరిశీలన జరిపాకే అనుమతి ఇస్తారు. ఈ రెన్యువల్ ప్రక్రియ పూర్తి కావడానికి దాదాపు 7 నుంచి 10 నెలల సమయం పడుతుంది కాబట్టి, ఈ మధ్య కాలంలో H-1B వీసాదారుల జీవిత భాగస్వాములు, అలాగే ఆప్షనల్ ప్రాక్టికల్ ట్రైనింగ్ (OPT)పై ఉన్న F-1 విద్యార్థులు వంటి వేలాది మంది భారతీయ నిపుణులు ఉద్యోగాలు కోల్పోయే ప్రమాదం ఉంది. ఈ నిర్ణయం వారి వృత్తి జీవితాన్ని ప్రశ్నార్థకంగా మార్చింది.
వలస విధానాలలో ట్రంప్ తీసుకొచ్చిన మరో ముఖ్యమైన మార్పు హెచ్-1బీ వీసా ఫీజును లక్ష డాలర్లకు పెంచడం. సెప్టెంబర్ 19న జారీ చేసిన ఈ ప్రకటన ప్రకారం, కొత్తగా హెచ్-1బీ వీసా కోసం దరఖాస్తు చేసుకునే సంస్థలు ప్రతి ఉద్యోగికి ఏటా 1,00,000 డాలర్లు (సుమారు రూ. 88 లక్షలు) ఫీజు చెల్లించాల్సి ఉంటుంది.
ఈ భారాన్ని ఉద్యోగం ఇచ్చే సంస్థలు భరించాల్సి ఉంటుంది. హెచ్-1బీ వీసాల్లో సుమారు 70 శాతం పొందుతున్న భారతీయులపై ఈ నిర్ణయం అత్యంత తీవ్ర ప్రభావం చూపుతుంది. ఫీజుల పెంపు కారణంగా వాల్‌మార్ట్ వంటి దిగ్గజ సంస్థలు ఇప్పటికే హెచ్-1బీ వీసా అవసరమైన అభ్యర్థుల నియామకాలను తాత్కాలికంగా నిలిపివేశాయి.
అయితే, సెప్టెంబర్ 21, 2025 నాటికి అమెరికాలో ఇప్పటికే ఉన్నవారికి లేదా దేశంలో ఉండి వీసా స్టేటస్ మార్చుకునేవారికి (ఉదాహరణకు, ఎఫ్-1 నుంచి హెచ్-1బీకి మారేవారికి) ఈ నిబంధన వర్తించదని యునైటెడ్ స్టేట్స్ సిటిజన్‌షిప్ అండ్ ఇమ్మిగ్రేషన్ సర్వీసెస్ (USCTS) స్పష్టం చేసింది. అయినప్పటికీ, లక్ష డాలర్ల ఫీజు భారాన్ని భరించేందుకు చిన్న, మధ్య తరహా కంపెనీలు ముందుకు రావడం కష్టమే కాబట్టి, కొత్తగా అమెరికా వెళ్లాలనుకునే భారతీయ టెకీలకు ఇది పెద్ద అడ్డంకిగా మారింది.
చివరికి, గ్రీన్ కార్డు హోల్డర్లు ఎదురుచూసే అమెరికా పౌరసత్వ ప్రక్రియను కూడా ట్రంప్ ప్రభుత్వం కఠినతరం చేసింది. అక్టోబర్ 20 నుంచి అమల్లోకి వచ్చిన ఈ కొత్త విధానంలో, పౌరశాస్త్ర పరీక్ష మరింత కఠినంగా మారింది. గతంలో, దరఖాస్తుదారులు 10 ప్రశ్నలకు 6 సరైన సమాధానాలు చెబితే సరిపోయేది.
కానీ కొత్త నిబంధన ప్రకారం, దరఖాస్తుదారులు 128 ప్రశ్నల నుంచి ఎంపిక చేసిన 20 ప్రశ్నలకు సమాధానాలు చెప్పాలి, అందులో కనీసం 12 ప్రశ్నలకు సరిగ్గా సమాధానం చెబితేనే ఉత్తీర్ణులవుతారు. దీనితో పాటు, దరఖాస్తుదారుల "నైతిక ప్రవర్తన"పై కూడా అధికారులు ప్రత్యేక దృష్టి సారిస్తారు.
ఈ మార్పులు గ్రీన్ కార్డు హోల్డర్ల పౌరసత్వ కలలను కూడా కష్టతరం చేస్తున్నాయి. మొత్తంగా, వలసలను నియంత్రించాలనే లక్ష్యంతో ట్రంప్ ప్రభుత్వం తీసుకుంటున్న ఈ వరుస కఠిన చర్యలు అమెరికాలో స్థిరపడాలని ఆశించే భారతీయ వృత్తి నిపుణులకు మరియు విద్యార్థులకు కొత్త, అసాధ్యమైన సవాళ్లను విసురుతున్నాయి.
