Media- ఢిల్లీ రెస్టారెంట్ దుర్ఘటనపై సీఎం రేఖా గుప్తా దిగ్భ్రాంతి…
రంగంలోకి దిగిన డీడీఎంఏ, ఫైర్ రెస్క్యూ బృందాలు!
అగ్నిమాపక నిబంధనలపై పోలీసుల ముమ్మర దర్యాప్తు!
Fire Accident: దేశ రాజధాని న్యూఢిల్లీలో ఈరోజు (జూన్ 3, 2026) ఉదయం ఒక ఘోర ప్రమాదం చోటుచేసుకుంది. దక్షిణ ఢిల్లీలోని మాల్వియా నగర్ పరిధిలో గల హౌజ్ రాణి ప్రాంతంలోని ఐదు అంతస్తుల భవనంలో నడుస్తున్న ‘లెమన్ గ్రీన్’ రెస్టారెంట్ బేస్మెంట్లో ఒక్కసారిగా భారీ అగ్నిప్రమాదం సంభవించింది. ఈ ప్రమాదం కారణంగా దట్టమైన పొగ, మంటలు క్షణాల వ్యవధిలో భవనం మొత్తాన్ని చుట్టుముట్టాయి. ఈ దుర్ఘటనలో దాదాపు 20 మంది సజీవదహనమవ్వగా, చనిపోయిన వారిలో పలువురు విదేశీయులు కూడా ఉన్నట్లు ప్రాథమిక సమాచారం ద్వారా తెలుస్తోంది. మరికొంతమంది తీవ్రంగా గాయపడ్డారు.
ఈ అగ్నిప్రమాదంపై సమాచారం అందుకున్న వెంటనే ఢిల్లీ ఫైర్ సర్వీసెస్ (DFS) అధికారులు రంగంలోకి దిగారు. నెహ్రూ ప్లేస్ ఫైర్ స్టేషన్ డివిజనల్ అధికారి రవీందర్ పర్యవేక్షణలో వాటర్ టెండర్లు, క్యూఆర్వీ వాహనాలతో సహా పలు ఫైర్ ఇంజన్లు ఘటనా స్థలానికి చేరుకుని సహాయక చర్యలు చేపట్టాయి. దట్టమైన పొగతో నిండిపోయిన బేస్మెంట్లో చిక్కుకున్న ముగ్గురితో పాటు భవనం నుండి మొత్తం 37 మందిని ఫైర్ సిబ్బంది చాకచక్యంగా రక్షించారు. క్షతగాత్రులను క్యాట్స్ (CATS) అంబులెన్స్ల ద్వారా తక్షణమే చికిత్స నిమిత్తం సమీప ఆసుపత్రులకు తరలించారు.
ఈ ఘోర ప్రమాదంపై ప్రధానమంత్రి నరేంద్ర మోదీ, ఢిల్లీ ముఖ్యమంత్రి రేఖా గుప్తా తీవ్ర దిగ్భ్రాంతి మరియు విచారం వ్యక్తం చేశారు. మృతుల కుటుంబాలకు ప్రధాని మోదీ పీఎంఎన్ఆర్ఎఫ్ (PMNRF) నుండి రూ. 2 లక్షలు, గాయపడిన వారికి రూ. 50 వేల చొప్పున ఎక్స్గ్రేషియా ప్రకటించారు. ఢిల్లీ విపత్తు నిర్వహణ సంస్థ (DDMA), సివిల్ మరియు పోలీస్ బృందాలు ఘటనా స్థలంలోనే ఉండి సహాయక చర్యలను పర్యవేక్షిస్తున్నాయి. కాగా, ప్రమాదానికి గల ఖచ్చితమైన కారణాలు ఇంకా తెలియరాలేదని, అగ్నిమాపక నిబంధనల ఉల్లంఘనలపై నివేదిక సేకరిస్తున్నామని పోలీసులు స్పష్టం చేశారు.
