కరోనా మహమ్మారి (Covid-19) మానవాళిపై చూపిన ప్రభావం గురించి ఎంత చెప్పినా తక్కువే. అయితే, ఈ వైరస్ ప్రభావం కేవలం సోకిన వ్యక్తికే పరిమితం కాదని, ఏకంగా వారి తర్వాతి తరంపైనా పడొచ్చన్న ఒక కొత్త అధ్యయనం ఇప్పుడు ప్రపంచవ్యాప్తంగా తీవ్ర ఆందోళన కలిగిస్తోంది. ఈ పరిశోధనలో వెలుగులోకి వచ్చిన షాకింగ్ విషయాలు ఏమిటంటే: గర్భధారణకు ముందు తండ్రికి కొవిడ్-19 సోకితే, పుట్టబోయే పిల్లల మెదడు ఎదుగుదల మరియు మానసిక ఆరోగ్యంపై ప్రతికూల ప్రభావం పడుతుందట.
ఈ సంచలన అధ్యయనం వివరాలను ప్రపంచ ప్రఖ్యాత సైన్స్ జర్నల్ 'నేచర్ కమ్యూనికేషన్స్' ప్రచురించింది. ఆస్ట్రేలియాలోని మెల్బోర్న్ యూనివర్సిటీకి చెందిన ఫ్లోరే ఇన్‌స్టిట్యూట్ ఆఫ్ న్యూరోసైన్స్ పరిశోధకులు ఈ అధ్యయనాన్ని నిర్వహించారు.
వారి పరిశోధన ప్రకారం, కోవిడ్-19కు కారణమయ్యే సార్స్-కోవ్-2 (SARS-CoV-2) వైరస్, తండ్రి శుక్రకణాల్లో ఏకంగా అణుస్థాయిలో మార్పులు తీసుకువస్తోందని తేలింది. మానవులపై ప్రభావం ఎలా ఉంటుందో తెలుసుకునేందుకు, పరిశోధకులు మొదట ఎలుకలపై ప్రయోగాలు చేశారు. ఈ ప్రయోగాల్లో వచ్చిన ఫలితాలు నిజంగా ఆలోచించదగినవిగా ఉన్నాయి:
పరిశోధకులు మొదట మగ ఎలుకలకు కరోనా వైరస్ సోకేలా చేశారు. అవి పూర్తిగా కోలుకున్న తర్వాత, ఆరోగ్యంగా ఉన్న ఆడ ఎలుకలతో జత కట్టించారు. ఆశ్చర్యకరంగా, కరోనా బారినపడిన తండ్రి ఎలుకలకు పుట్టిన పిల్లలన్నింటిలోనూ అధిక స్థాయిలో ఆందోళన (Anxiety) లక్షణాలు కనిపించాయి.
ముఖ్యంగా, ఆడ పిల్ల ఎలుకల మెదడులోని హిప్పోక్యాంపస్ (Hippocampus) భాగంలో జన్యువుల పనితీరులో మార్పులు గుర్తించారు. జ్ఞాపకశక్తి, భావోద్వేగాలు, ఆందోళన వంటివాటిని నియంత్రించడంలో ఈ భాగం చాలా కీలకం. ఈ కీలక భాగమే దెబ్బతినడం ఆందోళన కలిగిస్తోంది.
తండ్రి నుంచి పిల్లలకు ఈ ప్రభావం ఎలా సంక్రమిస్తుంది అనే విషయాన్ని కూడా పరిశోధకులు స్పష్టం చేశారు. తండ్రి శుక్రకణాల్లోని కొన్ని ఆర్ఎన్ఏ (RNA) అణువులను కరోనా వైరస్ మార్చేయడమే దీనికి కారణమని పరిశోధకులు తేల్చారు.
ఈ ఆర్ఎన్ఏ అణువులు మెదడు అభివృద్ధికి సంబంధించిన జన్యువులను నియంత్రిస్తాయి. వీటిలో మార్పులు రావడం వల్ల పిల్లల నాడీ వ్యవస్థ (Nervous System) ఎదుగుదలపై ప్రతికూల ప్రభావం పడుతోందని అధ్యయన సహ రచయిత్రి డాక్టర్ కరోలినా గూబర్ట్ తెలిపారు. అంటే, కరోనా వైరస్ పరోక్షంగా తర్వాతి తరం జన్యువ్యవస్థపై దాడి చేస్తోందన్నమాట.
ప్రస్తుతానికి ఈ అధ్యయనం ఎలుకలపైనే జరిగినప్పటికీ, దీని ఫలితాలను తేలికగా తీసుకోలేమని పరిశోధక బృందానికి నేతృత్వం వహించిన ప్రొఫెసర్ ఆంథోనీ హన్నన్ హెచ్చరించారు.
"ఒకవేళ ఈ ఫలితాలు మనుషులకు కూడా వర్తిస్తే, ప్రపంచవ్యాప్తంగా లక్షలాది మంది పిల్లలు, వారి కుటుంబాలపై తీవ్ర ప్రభావం పడుతుంది. ఇది ప్రజారోగ్యానికి పెను సవాల్‌గా మారవచ్చు" అని ఆయన అభిప్రాయపడ్డారు. కొవిడ్ తర్వాతి తరంపై ఎలాంటి దీర్ఘకాలిక ప్రభావాలు చూపుతుందో తెలుసుకునేందుకు మనుషులపై తక్షణమే అధ్యయనాలు చేపట్టాలని పరిశోధకులు పిలుపునిచ్చారు.
ఈ నేపథ్యంలో, పిల్లల్ని కనాలని ప్లాన్ చేసుకుంటున్న పురుషులు, గతంలో తమకు కొవిడ్ సోకి ఉంటే, ముందుగా వైద్య సలహాలు తీసుకోవడం మంచిదని నిపుణులు సూచిస్తున్నారు. కరోనా ప్రభావాన్ని ఏ విధంగానూ అంచనా వేయలేకపోతున్నామనేది ఈ అధ్యయనం మరోసారి నిరూపించింది.
