ఉద్యోగం, వ్యాపారం, చదువు లేదా వ్యక్తిగత కారణాలతో స్వస్థలం విడిచి వేరే ప్రాంతాలకు వెళ్లి స్థిరపడడం ఇప్పుడు సాధారణమైపోయింది. ముఖ్యంగా ఆంధ్రప్రదేశ్ నుంచి పెద్ద సంఖ్యలో ప్రజలు హైదరాబాద్తో పాటు తెలంగాణలోని ఇతర ప్రాంతాల్లో నివాసం ఏర్పరుచుకుంటున్నారు. అయితే, నివాసం మారినా డ్రైవింగ్ లైసెన్స్లో ఉన్న పాత చిరునామాను అప్డేట్ చేయకుండా నిర్లక్ష్యం చేయడం చాలామందిలో కనిపిస్తోంది. మోటారు వాహన చట్టం ప్రకారం డ్రైవింగ్ లైసెన్స్పై ప్రస్తుత నివాస చిరునామా ఉండటం తప్పనిసరి. చిరునామా మార్పును నమోదు చేయకపోతే ట్రాఫిక్ తనిఖీల సమయంలో జరిమానాలు లేదా ఇతర చట్టపరమైన సమస్యలు ఎదురయ్యే అవకాశం ఉంటుంది.
ఈ సమస్యకు పరిష్కారంగా కేంద్ర రోడ్డు రవాణా, రహదారుల మంత్రిత్వ శాఖ డ్రైవింగ్ లైసెన్స్ సేవలను పూర్తిగా డిజిటల్ మార్గంలోకి తీసుకొచ్చింది. ‘పరివహన్’ (Parivahan) పోర్టల్ ద్వారా ఇప్పుడు చిరునామా మార్పు ప్రక్రియను ఆన్లైన్లోనే సులభంగా పూర్తిచేయవచ్చు. దీంతో ఆర్టీవో కార్యాలయాల చుట్టూ తిరగాల్సిన అవసరం లేకుండా, ఇంటి నుంచే దరఖాస్తు చేసుకునే సౌకర్యం కలిగింది. ముఖ్యంగా ఇతర రాష్ట్రాలకు వలస వెళ్లిన వారికి ఈ విధానం ఎంతో ఉపయోగకరంగా మారింది.
చిరునామా మార్పు కోసం దరఖాస్తుదారులు ముందుగా parivahan.gov.in వెబ్సైట్ను సందర్శించాలి. అక్కడ ‘ఆన్లైన్ సర్వీసెస్’ విభాగంలో ‘డ్రైవింగ్ లైసెన్స్ సంబంధిత సేవలు’ ఎంపిక చేసుకోవాలి. అనంతరం తాము ప్రస్తుతం నివసిస్తున్న రాష్ట్రాన్ని (ఉదాహరణకు తెలంగాణ) సెలెక్ట్ చేసి, ‘చేంజ్ ఆఫ్ అడ్రస్’ ఆప్షన్పై క్లిక్ చేయాలి. డీఎల్ నంబర్, పుట్టిన తేదీ వంటి వివరాలు నమోదు చేసిన తర్వాత, అవసరమైన పత్రాలను అప్లోడ్ చేసి నిర్ణీత రుసుమును ఆన్లైన్లో చెల్లించాలి. అప్లికేషన్ సమర్పించిన తర్వాత దాని స్టేటస్ను కూడా అదే పోర్టల్ ద్వారా ట్రాక్ చేయవచ్చు.
ఒక రాష్ట్రం నుంచి మరో రాష్ట్రానికి చిరునామా మార్చుకున్నప్పుడు (ఉదా: ఏపీ నుంచి తెలంగాణకు) పాత ఆర్టీవో కార్యాలయం నుంచి నిరభ్యంతర పత్రం (NOC) తీసుకోవడం తప్పనిసరి. దరఖాస్తుతో పాటు ఫామ్–33, ప్రస్తుత చిరునామా ధ్రువీకరణ పత్రాలు (ఆధార్, పాస్పోర్ట్, విద్యుత్ బిల్లు, అద్దె ఒప్పందం వంటివి), ఒరిజినల్ డ్రైవింగ్ లైసెన్స్ ప్రతులు సమర్పించాలి. కొన్ని సందర్భాల్లో ఇన్సూరెన్స్, పీయూసీ సర్టిఫికెట్ వివరాలు కూడా అడగవచ్చు. ఈ విధంగా ఆన్లైన్ ప్రక్రియను వినియోగించుకుంటే సమయం ఆదా అవడమే కాకుండా, ఎలాంటి మధ్యవర్తులు లేకుండా డ్రైవింగ్ లైసెన్స్ను చట్టబద్ధంగా అప్డేట్ చేసుకునే అవకాశం లభిస్తుంది.
