తృణమూల్ కాంగ్రెస్ పార్టీకి కోర్టులో నిరాశ..
అసిస్టెంట్లను నియమించడం పూర్తిగా ఎన్నికల సంఘం అధికార పరిధిలోనే..
కొలకత్తా: ఓట్ల లెక్కింపు కేంద్రాల్లో పర్యవేక్షకులుగా కేంద్ర ప్రభుత్వ ఉద్యోగులను నియమించడాన్ని వ్యతిరేకిస్తూ దాఖలు చేసిన పిటిషన్పై తృణమూల్ కాంగ్రెస్ పార్టీకి కోర్టులో నిరాశ ఎదురైంది. ఈ పిటిషన్ను కోల్కతా హై కోర్టు తిరస్కరించింది.
ఈ కేసును విచారించిన న్యాయమూర్తి జస్టిస్ కృష్ణా రావు కీలక వ్యాఖ్యలు చేశారు. ఓట్ల లెక్కింపు కేంద్రాల్లో కౌంటింగ్ సూపర్వైజర్లు, అసిస్టెంట్లను నియమించడం పూర్తిగా ఎన్నికల సంఘం అధికార పరిధిలోనే ఉంటుందని ఆయన స్పష్టం చేశారు. రాష్ట్ర ప్రభుత్వ ఉద్యోగుల నుంచైనా, కేంద్ర ప్రభుత్వ ఉద్యోగుల నుంచైనా నియామకం చేయడంలో ఎలాంటి అక్రమం లేదని కోర్టు పేర్కొంది.
కేంద్ర ప్రభుత్వ లేదా కేంద్ర ప్రభుత్వ సంస్థల ఉద్యోగులను కౌంటింగ్ సిబ్బందిగా నియమించడం చట్ట విరుద్ధం కాదని తీర్పులో న్యాయమూర్తి వెల్లడించారు. అయితే, ఈ నియామకాల వల్ల ఎవరైనా అభ్యర్థికి అన్యాయం జరిగిందని తర్వాత రుజువైతే, చట్టపరంగా ఆ ఫలితాన్ని సవాలు చేసే అవకాశం ఉందని కోర్టు గుర్తుచేసింది.
ప్రత్యేకంగా, రెప్రెసెంటేషన్ ఆఫ్ ది పీపుల్ యాక్ట్ లోని సెక్షన్ 100 ప్రకారం, ఎన్నికల ప్రక్రియలో తీసుకున్న నిర్ణయాలు ఒక అభ్యర్థికి అన్యాయ ప్రయోజనం కలిగించి, ప్రత్యర్థి ఓడిపోయినట్లు నిరూపితమైతే, ఆ ఫలితాన్ని కోర్టులో సవాలు చేయవచ్చని తీర్పులో పేర్కొన్నారు.
ఈ నేపథ్యంలో, ఓట్ల లెక్కింపు ప్రక్రియలో పారదర్శకతను కాపాడే బాధ్యత ఎన్నికల సంఘంపై ఉందని, అవసరమైతే చట్టపరమైన మార్గాలు అందుబాటులోనే ఉంటాయని కోర్టు సూచించింది.
