- తుళ్లూరు వద్ద బసవతారం ఆసుపత్రి నిర్మాణ పనులను ప్రారంభించిన బాలకృష్ణ..
- Politics: అమరావతికి భూములిచ్చిన రైతులు, మహిళలకు ధన్యవాదాలు తెలిపిన బాలకృష్ణ..
Balakrishna: దశాబ్దాలుగా హైదరాబాద్ కేంద్రంగా క్యాన్సర్ బాధితులకు విశేష సేవలు అందిస్తున్న బసవతారకం ఇండో అమెరికన్ క్యాన్సర్ ఆసుపత్రి ఇప్పుడు ఆంధ్రప్రదేశ్కు తన సేవలను విస్తరిస్తోంది. ఏపీ రాజధాని అమరావతి పరిధిలోని తుళ్లూరు వద్ద ఈ నూతన ఆసుపత్రి నిర్మాణ పనులు ఘనంగా ప్రారంభమయ్యాయి. బసవతారకం ఆసుపత్రి చైర్మన్, మేనేజింగ్ ట్రస్టీ మరియు సినీ నటుడు, ఎమ్మెల్యే నందమూరి బాలకృష్ణ స్వయంగా భూమి పూజ చేసి ఈ భారీ ప్రాజెక్టుకు శ్రీకారం చుట్టారు. రాజధాని నిర్మాణం కోసం స్వచ్ఛందంగా భూములిచ్చిన అమరావతి రైతులకు, మహిళలకు ఈ సందర్భంగా ఆయన కృతజ్ఞతలు తెలుపుతూ పాదాభివందనం చేశారు. వారి త్యాగం వల్లే ఇక్కడ అంతర్జాతీయ స్థాయి వైద్య సదుపాయాలు అందుబాటులోకి వస్తున్నాయని ఆయన కొనియాడారు.
ఈ ఆసుపత్రి నిర్మాణ పనుల ప్రారంభోత్సవానికి ఒక ప్రత్యేకత ఉందని బాలకృష్ణ ఈ సందర్భంగా గుర్తు చేసుకున్నారు. పనులు ప్రారంభించిన రోజున స్వాతి నక్షత్రం కావడం, అది తన తండ్రి నందమూరి తారక రామారావు గారితో పాటు తన ఇష్టదైవం నరసింహ స్వామి జన్మించిన నక్షత్రం కావడం విశేషమని ఆయన సంతోషం వ్యక్తం చేశారు. అమరావతిలో నిర్మించబోయే ఈ ఆసుపత్రిలో అత్యాధునిక వైద్య పరికరాలు, అంతర్జాతీయ ప్రమాణాలతో కూడిన చికిత్సా విధానాలను అందుబాటులోకి తీసుకురానున్నట్లు ఆయన వెల్లడించారు. అంతేకాకుండా, హైదరాబాద్లోని బసవతారకం ఆసుపత్రి స్థాపించి 25 ఏళ్లు పూర్తయిన శుభసందర్భంగా జూన్ 22న నిర్వహించబోయే రజతోత్సవ వేడుకలకు రెండు తెలుగు రాష్ట్రాల ముఖ్యమంత్రులతో పాటు కేంద్ర మంత్రులను కూడా ఆహ్వానించనున్నట్లు ఆయన ప్రకటించారు.
అమరావతి రాజధాని అభివృద్ధి అనేది కేవలం హడావుడిగా చేసే పని కాదని, రాబోయే తరాల దీర్ఘకాలిక ప్రయోజనాలను దృష్టిలో ఉంచుకుని అత్యంత పకడ్బందీగా చేస్తున్న ప్రణాళిక అని బాలకృష్ణ స్పష్టం చేశారు. ఈ ప్రాజెక్టులో భాగంగా తొలి దశలో 7 అంతస్తుల భవనాన్ని, 500 పడకల సామర్థ్యంతో నిర్మించనున్నారు. ఇందుకోసం సుమారు రూ. 650 కోట్ల భారీ వ్యయాన్ని కేటాయించినట్లు సమాచారం. 2028 నాటికి ఈ నిర్మాణ పనులను పూర్తి చేసి, ప్రజలకు అందుబాటులోకి తీసుకురావడమే లక్ష్యంగా పెట్టుకున్నట్లు ఆసుపత్రి వర్గాలు వెల్లడించాయి.
