డల్లాస్లో భారతీయ దంపతుల డిపోర్టేషన్…
విదేశీ ప్రయాణాల్లో బంగారానికి లెక్క చూపాల్సిందే..
10 వేల డాలర్ల బంగారం నియమం - అమెరికా వెళ్లేవారు ఈ జాగ్రత్తలు తీసుకోండి…
Customs Rules: ఇటీవల అమెరికాలోని డల్లాస్ విమానాశ్రయంలో ఒక చేదు సంఘటన చోటుచేసుకుంది. తమ పిల్లల పెళ్లి కోసం భారతదేశం నుండి వెళ్లిన ఒక వృద్ధ జంటను అమెరికా అధికారులు విమానాశ్రయం నుండే వెనక్కి పంపించివేశారు (డిపోర్ట్ చేశారు). దీనికి ప్రధాన కారణం వారి వద్ద ఉన్న అధిక మొత్తం బంగారం. ఆ బంగారానికి సంబంధించి కస్టమ్స్ అండ్ బోర్డర్ ప్రొటెక్షన్ (CBP) అధికారులు అడిగినప్పుడు వారు సరైన వివరాలు లేదా రశీదులు చూపించలేకపోయారు. దీనివల్ల అధికారులు వారి ఎంట్రీని నిరాకరించి, వీసాను రద్దు చేయడమే కాకుండా, దేశంలోకి రాకుండా నిషేధం విధించి తిరిగి పంపించేశారు. ఈ వార్త ప్రస్తుతం సోషల్ మీడియాలో విపరీతంగా వైరల్ అవుతూ విదేశాలకు వెళ్లే భారతీయులను ఆందోళనకు గురిచేస్తోంది.
మన భారతీయ సంప్రదాయంలో పెళ్లి అంటేనే బంగారం. అమ్మాయికి, అబ్బాయికి మరియు బంధువులకు ఒంటి నిండా బంగారం ధరించడం ఒక ఆనవాయితీ. ప్రస్తుతం వీసా సమస్యల వల్ల చాలామంది యువకులు పెళ్లిళ్ల కోసం ఇండియాకు రాలేకపోతున్నారు, దానివల్ల తల్లిదండ్రులే అమెరికాకు వెళ్లి అక్కడ పెళ్లిళ్లు చేస్తున్నారు. అయితే, అమెరికాలోని కస్టమ్స్ అధికారులకు మన సంప్రదాయాలు లేదా సెంటిమెంట్లు తెలియవు. వారు కేవలం తమ దేశ నిబంధనలనే చూస్తారు. వయసులో పెద్దవారు కదా అని అధికారులు చూసి చూడనట్లు వదిలేస్తారని అనుకోవడం చాలా పెద్ద పొరపాటు. విమానాశ్రయంలో తనిఖీ చేసినప్పుడు మనం ఇచ్చే సమాధానం సంతృప్తికరంగా లేకపోతే, వారు స్మగ్లింగ్ చేస్తున్నారనే అనుమానంతో కఠిన చర్యలు తీసుకుంటారు.
విదేశీ ప్రయాణాల్లో ముఖ్యంగా అమెరికా వెళ్లేటప్పుడు 10,000 డాలర్ల కంటే ఎక్కువ విలువైన బంగారం లేదా నగదు మీ వద్ద ఉంటే తప్పనిసరిగా డిక్లేర్ చేయాలి. అసలు సేఫ్ సైడ్ ఏంటంటే, మీ దగ్గర ఎంత బంగారం ఉన్నా అధికారులకు ముందుగానే తెలియజేయడం (Declare) మంచిది. మీరు తీసుకెళ్లే ప్రతి నగకు అది పాతదైనా, కొత్తదైనా లేదా ఇంట్లో ఉన్న పాత బంగారాన్ని కరిగించి కొత్తగా చేయించినదైనా సరే, కచ్చితమైన రశీదులు (Receipts) ఉండాలి. ఉంగరాలు లేదా మెడలోని సన్నని గొలుసులు వంటి నిత్యం వాడుకునే వస్తువులను అధికారులు సాధారణంగా పట్టించుకోరు. కానీ, లగేజీలో ఉండే భారీ ఆభరణాలకు లేదా విపరీతంగా వేసుకున్న గాజులు, గొలుసులకు మాత్రం కచ్చితంగా లెక్క చూపాల్సిందే.
చాలామంది గ్రామాల్లోని లేదా తెలిసిన చిన్న చిన్న షాపుల్లో నమ్మకంతో బంగారం చేయించుకుంటారు. అక్కడ సరిగ్గా బిల్లులు తీసుకోరు లేదా కేవలం అంచనా రశీదులతో సరిపెట్టుకుంటారు. కానీ అమెరికా ప్రయాణానికి ఇవి సరిపోవు. మీరు ఒకవేళ పదేళ్ల క్రితం నగలు చేయించుకున్నా, ఇప్పుడు ఆ షాపు యజమాని దగ్గరకు వెళ్లి రశీదు అడిగి తీసుకోవాలి. అధికారులు తమ వద్ద ఉన్న సాంకేతికతతో అది పాత బంగారమా లేక కొత్తదా అని సులభంగా గుర్తించగలరు. ఒక ఏడాది లోపు ఉన్నది కొత్త బంగారం కిందకు వస్తుంది. కాబట్టి ప్రయాణానికి ముందే మీరు తీసుకెళ్లే ప్రతి ఆభరణానికి జిఎస్టి (GST) బిల్లులు లేదా అధికారిక రశీదులు సిద్ధం చేసుకోవడం చాలా ముఖ్యం.
విమానాశ్రయంలో అధికారులు అడిగినప్పుడు భాషా సమస్యల వల్ల లేదా వేగంగా మాట్లాడే ఇంగ్లీష్ అర్థం కాక తప్పుగా సమాధానం చెబితే సమస్యలు కొనితెచ్చుకున్నట్లే అవుతుంది. ఒకవేళ పొరపాటున ఎంట్రీ బ్యాన్ విధిస్తే, అది ఐదేళ్లు లేదా పదేళ్లు ఉండవచ్చు, కొన్నిసార్లు శాశ్వత నిషేధం కూడా విధించవచ్చు. అప్పుడు లాయర్ల సాయంతో ఆ నిషేధాన్ని తొలగించుకోవడానికి (Waiver) చాలా ఖర్చుతో కూడిన ప్రక్రియ చేయాల్సి ఉంటుంది. అందుకే లగేజీ ప్యాక్ చేసేటప్పుడే పచ్చళ్లు, పప్పులతో పాటు బంగారానికి సంబంధించిన రశీదులను కూడా జాగ్రత్తగా సర్దుకోవాలి. తెలియక చేసే చిన్న పొరపాట్లు విదేశీ ప్రయాణాన్ని విషాదంగా మారుస్తాయని ప్రయాణికులు గుర్తించుకోవాలి.
