దక్షిణ మధ్య రైల్వే పరిధిలో పండుగలు, ప్రైవేట్ ఈవెంట్లు, సెలవులు వంటి కారణాలతో ప్రయాణికుల రద్దీ భారీగా పెరిగింది. ఇప్పటికే అనేక ప్రత్యేక రైళ్లను నడిపినా రద్దీ తగ్గకపోవడంతో, అధికారులు మరో నిర్ణయం తీసుకున్నారు. డిమాండ్ను దృష్టిలో ఉంచుకుని కొన్ని ప్రత్యేక రైల్వే సర్వీసులను మరికొంతకాలం పొడిగిస్తూ అధికారిక ప్రకటన విడుదల చేశారు.
కాకినాడ, నరసాపురం, హైదరాబాద్, బెంగళూరు, మైసూరు వంటి ముఖ్య రూట్లలో ప్రయాణికుల సంఖ్య ఎక్కువగా ఉండటంతో మొత్తం 48 ప్రత్యేక రైళ్లను జనవరి వరకు పొడిగించారు. ఇందులో కాకినాడ నుండి మైసూరుకు సోమ, శుక్రవారాల్లో నడిచే 07033 రైలు సర్వీసును డిసెంబర్ 1 నుంచి జనవరి 12 వరకు కొనసాగిస్తారు. అదేవిధంగా మైసూరు నుండి కాకినాడకు మంగళ, శనివారాల్లో నడిచే 07034 రైలును కూడా డిసెంబర్ 2 నుంచి జనవరి 13 వరకు పొడిగించారు. ఇలా ఈ రూట్లో మొత్తం 26 సర్వీసులు అందుబాటులో ఉంటాయి.
నరసాపురం – బెంగళూరు రూట్లో కూడా ప్రత్యేక రైళ్లను పొడిగించారు. నరసాపురం నుంచి SMVT బెంగళూరుకు ప్రతి శుక్రవారం నడిచే 07153 రైలును జనవరి 2 నుంచి జనవరి 9 వరకు కొనసాగిస్తారు. అదే విధంగా బెంగళూరు నుంచి నరసాపురం వైపు శనివారాల్లో నడిచే 07154 రైలును జనవరి 3 నుంచి జనవరి 10 వరకు పొడిగించారు. ఇలా ఈ రూట్లో నాలుగు అదనపు సర్వీసులు అందుబాటులోకి వస్తాయి.
హైదరాబాద్ – భువనేశ్వర్ రూట్లో కూడా ప్రయాణికుల రద్దీ ఎక్కువగా ఉండటంతో సర్వీసులు పొడిగించారు. హైదరాబాద్ నుంచి ప్రతి మంగళవారం నడిచే 07165 ప్రత్యేక రైలును డిసెంబర్ 2 నుంచి జనవరి 27 వరకు, భువనేశ్వర్ నుంచి హైదరాబాద్కు ప్రతీ బుధవారం నడిచే 07166 రైలును డిసెంబర్ 3 నుంచి జనవరి 28 వరకు నడపాలని నిర్ణయించారు. ఈ రూట్లో మొత్తం 18 సర్వీసులు అందుబాటులో ఉంటాయి.
మొత్తం మీద, ప్రయాణికుల డిమాండ్కు అనుగుణంగా వివిధ రూట్లలో ప్రత్యేక రైలు సర్వీసులను పొడగించడం ద్వారా రైల్వే అధికారులు రద్దీని తగ్గించే ప్రయత్నం చేస్తున్నారు. ఈ సర్వీసుల వివరాలు, తేదీలు అధికారికంగా ప్రకటించబడినందున ప్రయాణికులు తమ ప్రయాణాలను సులభంగా ప్లాన్ చేసుకుని ముందుగానే టికెట్లు బుక్ చేసుకోవచ్చు.
