తిరుపతి భక్తుల సౌకర్యార్థం దక్షిణ మధ్య రైల్వే మరో కీలక నిర్ణయం తీసుకుంది. నడికుడి-శ్రీకాళహస్తి మార్గం ద్వారా కొత్త రైలును నడిపేందుకు ఏర్పాట్లు చేసింది. ఈ మార్గంలో న్యూ పిడుగురాళ్ల నుండి శావల్యాపురం వరకు 46 కి.మీ. దూరం కొత్తగా రైల్వే ట్రాక్ నిర్మించబడింది. ఈ మార్గం సాయంతో సికింద్రాబాద్ నుండి తిరుపతి మీదుగా దక్షిణాది నగరాలకు నేరుగా అనుసంధానం కలుగుతుంది.
ఈ నేపథ్యంలో, సెప్టెంబర్ 9 నుంచి నవంబర్ 25 వరకు చెర్లపల్లి నుండి నంద్యాల మీదుగా తిరుపతికి కొత్త వీక్లీ స్పెషల్ ఎక్స్ప్రెస్ రైలు నడపాలని నిర్ణయించారు. రైలు నెంబర్ 07013 మంగళవారం రాత్రి 9.10 గంటలకు చెర్లపల్లిలో ప్రారంభమై మరుసటి రోజు ఉదయం 5.30 గంటలకు నల్గొండ, పిడుగురాళ్ల, మార్కాపురం, గిద్దలూరు వంటి ప్రధాన స్టేషన్లలో ఆగుతూ నంద్యాలకు చేరుకుంటుంది. అక్కడి నుండి ఉదయం 5.35 గంటలకు బయలుదేరి కోయిలకుంట్ల మీదుగా తిరుపతికి చేరుతుంది.
తిరుగు ప్రయాణంలో రైలు నెంబర్ 07014 బుధవారం సాయంత్రం 4.40 గంటలకు తిరుపతి నుండి బయలుదేరుతుంది. అదే రోజు రాత్రి 10.25 గంటలకు నంద్యాలకు చేరుకుని, గురువారం ఉదయం 8 గంటలకు చెర్లపల్లికి చేరుకుంటుంది. ఈ రైలు ద్వారా ప్రత్యేకంగా కర్నూలు జిల్లాలోని ప్రజలకు సౌకర్యం కలుగుతుందని రైల్వే అధికారులు తెలిపారు.
ప్రస్తుతం ఈ రైలు వారానికి ఒకసారి మాత్రమే నడపబడుతుంది. అయితే మొదటగా మూడు నెలలపాటు మాత్రమే ఈ సర్వీస్ కొనసాగనుంది. ప్రయాణీకుల రద్దీ మరియు ఆక్యుపెన్సీని బట్టి, దీనిని మరింత కాలం కొనసాగించే అవకాశం ఉందని తెలుస్తోంది. మంచి స్పందన వస్తే ఈ రైలును రెగ్యులర్ సర్వీస్గా మార్చే ఆలోచనలో రైల్వే శాఖ ఉన్నది.
ఇకపోతే, ఈ మార్గంలో తిరుపతికి వందేభారత్ రైలును కూడా నడపాలన్న డిమాండ్ పెరుగుతోంది. దీనిపై రైల్వే శాఖ ఇప్పటికే కసరత్తు చేస్తోంది. త్వరలోనే తుది నిర్ణయం తీసుకునే అవకాశముందని సమాచారం.
ఈ విధంగా కొత్త రైలు ప్రారంభం కావడంతో తిరుపతి భక్తులు, ముఖ్యంగా రాయలసీమ వాసులు, మరింత సులభంగా, వేగంగా, ఆర్థికంగా ప్రయాణించగలరని రైల్వే అధికారులు ఆశాభావం వ్యక్తం చేశారు.
