ఉత్తరాంధ్ర (North Andhra) ప్రాంతానికి గుండెకాయ లాంటి విశాఖపట్నం (Visakhapatnam) లో ట్రాఫిక్ సమస్యలు ఎంత తీవ్రంగా ఉంటాయో అందరికీ తెలిసిందే. ముఖ్యంగా గాజువాక హైవే మీదుగా పోర్టు (Port)కు వచ్చే భారీ సరుకు రవాణా వాహనాల (Cargo Vehicles) వల్ల నగరంలో రద్దీ పెరిగి, ప్రమాదాలు (Accidents) కూడా ఎక్కువగా జరుగుతుండేవి. అయితే, ఇప్పుడు ఈ కష్టాలన్నీ తీరే సమయం దగ్గర పడింది.
నేషనల్ హైవేస్ అథారిటీ (NHAI), విశాఖపట్నం పరిధిలోని షీలానగర్ నుంచి అనకాపల్లి జిల్లా సబ్బవరం వరకు ఆరు వరుసల జాతీయ రహదారి 516C నిర్మాణ పనులను వేగవంతం చేసింది. ఈ ప్రాజెక్టుకు ఇప్పటికే రూ.960 కోట్లు మంజూరయ్యాయి. ఈ కొత్త రహదారి నిర్మాణంతో నగరవాసులకు ఎంతో ప్రయోజనం కలగనుంది.
ఈ కొత్త ఆరు వరుసల జాతీయ రహదారి షీలానగర్ నుంచి సబ్బవరం వరకు నిర్మించి, ప్రస్తుతం ఉన్న జాతీయ రహదారికి అనుసంధానం చేస్తారు. ఈ మార్పు వల్ల పోర్టుకు వచ్చే సరుకు రవాణా వాహనాల రూట్లో పెద్ద మార్పు వస్తుంది.
సరుకు రవాణా వాహనాలు ఇకపై గాజువాక హైవే మీదుగా నగరంలోకి ప్రవేశించకుండా, సబ్బవరం వద్ద కొత్తగా నిర్మించిన ఆరు వరుసల మార్గంలో షీలానగర్ వరకు వచ్చి, అక్కడి నుంచి ఎయిర్పోర్ట్ పక్కగా కాన్వెంట్ జంక్షన్ మీదుగా నేరుగా పోర్టుకు చేరుకుంటాయి.
సబ్బవరం వద్ద ఈ కొత్త మార్గాన్ని జాతీయ రహదారికి అనుసంధానం చేస్తూ, అక్కడ ఒక 'ట్రంప్ ఎట్ ఇంటర్ ఛేంజ్' ను ఏర్పాటు చేస్తారు. దీనివల్ల విశాఖ పోర్టు నుంచి కార్గో రవాణా సులభతరం అవుతుంది. ఈ కొత్త రహదారి వల్ల కేవలం ట్రాఫిక్ ఒత్తిడి మాత్రమే కాదు, వ్యాపారాలు, పరిశ్రమలకు కూడా ఎంతో మేలు చేకూరుతుంది.
సరకు రవాణా వాహనాలు నగరంలోకి ప్రవేశించకుండా నేరుగా పోర్టుకు వెళ్లడం వల్ల, నగరంలోని రోడ్లపై వాహనాల రద్దీ గణనీయంగా తగ్గుతుంది. ముఖ్యంగా, గాజువాక హైవేపై ఉండే ట్రాఫిక్ భారం తగ్గి, ప్రయాణికులకు సౌకర్యవంతంగా మారుతుంది.
ప్రస్తుతం గాజువాక హైవేపై సరుకు రవాణా వాహనాలకు ఉదయం 8 నుంచి రాత్రి 8 గంటల వరకు ట్రాఫిక్ ఆంక్షలు ఉన్నాయి. ఈ కొత్త మార్గం అందుబాటులోకి వస్తే, ఆ ఆంక్షలు తొలగిపోతాయి. దీనివల్ల సరుకు రవాణా వాహనాలు 24 గంటలూ నడిచే అవకాశం ఉంటుంది. ఇది వ్యాపారాలకు, పోర్టు కార్యకలాపాలకు చాలా వేగంగా సహాయపడుతుంది.
ఈ కొత్త ఆరు వరుసల జాతీయ రహదారిని కాన్వెంట్ జంక్షన్ నుంచి సబ్బవరం బైపాస్ వరకు సుమారు 13 కిలోమీటర్ల పొడవున విస్తరించనున్నారు.
ఈ మొత్తం ప్రాజెక్టుకు సంబంధించి కేంద్ర మంత్రి నితిన్ గడ్కరీ ఈ ఏడాది జనవరిలోనే నిధులు కేటాయించినట్లు ప్రకటించారు. ఇందులో కాన్వెంట్ జంక్షన్ నుంచి ఆరు లైన్ల రోడ్డును రూ.679 కోట్లతో నిర్మిస్తున్నారు.
ప్రస్తుతం జరుగుతున్న కాన్వెంట్ జంక్షన్ నుంచి షీలానగర్ వరకు ఉన్న రహదారి విస్తరణ పనులకు కొనసాగింపుగా ఈ కొత్త పనులను చేపట్టారు. ఈ హైవే అందుబాటులోకి వస్తే, విశాఖపట్నంలో ట్రాఫిక్ కష్టాలు తీరనున్నాయి. అంతేకాకుండా, విశాఖ పోర్టు నుంచి వివిధ ప్రాంతాలకు అనుసంధానం కూడా పెరుగుతుంది.
