ఆంధ్రప్రదేశ్ ప్రభుత్వం మరోసారి “ఆరోగ్యమే మహాభాగ్యం” అనే నానుడికి కొత్త అర్థం తీసుకొచ్చే ప్రయత్నం చేస్తోంది. పట్టణాల్లో నివసించే మధ్యతరగతి మహిళల ఆరోగ్య పరిస్థితి ఆందోళన కలిగిస్తోందని తాజాగా వెలువడిన సర్వేలు సూచించాయి. ఈ నేపథ్యంలో మహిళల ఆరోగ్య రక్షణను ప్రధాన లక్ష్యంగా తీసుకుని ప్రభుత్వం ‘సఖి సురక్ష హెల్త్కేర్ స్క్రీనింగ్’ పేరుతో ప్రత్యేక ఆరోగ్య కార్యక్రమాన్ని ప్రారంభించింది. ఈ కార్యక్రమం ద్వారా మహిళలు తమ ఆరోగ్య స్థితిని సులభంగా తెలుసుకోవడంతో పాటు, అవసరమైన చికిత్సలు సమయానికి పొందే అవకాశం ఉంటుంది.
మొదటి దశలో ఈ ప్రాజెక్ట్ను శ్రీకాకుళం జిల్లాలో అమలు చేయాలని ప్రభుత్వం నిర్ణయించింది. అక్టోబర్ 28 నుంచి నవంబర్ 19 వరకు వివిధ పట్టణాల్లో ఉచిత వైద్య పరీక్షలు నిర్వహించనున్నారు. ఈ పరీక్షల్లో 35 ఏళ్లు దాటిన మహిళలకు 16 రకాల వైద్య పరీక్షలు ఉచితంగా చేస్తారు. మధుమేహం, రక్తపోటు, గుండె సంబంధిత వ్యాధులు, థైరాయిడ్, రక్తహీనత, పోషకాహార లోపం వంటి సమస్యలను ముందుగానే గుర్తించి చికిత్స చేయించుకునే అవకాశం కల్పించబడుతుంది.
ఇటీవలి కాలంలో పట్టణ ప్రాంతాల్లో జీవనశైలి మార్పులు, ఒత్తిడి, ఆహార అలవాట్ల కారణంగా మహిళల్లో ఆరోగ్య సమస్యలు పెరుగుతున్నాయని ప్రభుత్వం గుర్తించింది. అందుకే స్వయం సహాయక సంఘాల మహిళలు ఆరోగ్యపరంగా బలంగా, చురుకుగా ఉండేందుకు ఈ కార్యక్రమాన్ని చేపట్టింది. శ్రీకాకుళం, ఆమదాలవలస, పలాస–కాశీబుగ్గ, ఇచ్ఛాపురం ప్రాంతాల్లో సుమారు 2,000 మంది మహిళలు ఈ సేవల ద్వారా లబ్ధిపొందనున్నారని అధికారులు తెలిపారు. స్థానిక వైద్య బృందాలు, మున్సిపల్ అధికారులు కలిసి ఈ ప్రాజెక్ట్ విజయవంతంగా నిర్వహించేందుకు సన్నాహాలు చేస్తున్నారు.
పరీక్షల షెడ్యూల్ కూడా ఇప్పటికే ప్రకటించబడింది. శ్రీకాకుళంలో అక్టోబర్ 28, 29, నవంబర్ 1, 2 తేదీల్లో, ఆమదాలవలసలో నవంబర్ 3, 4న, పలాస–కాశీబుగ్గలో నవంబర్ 14, 15, 17న, ఇచ్ఛాపురంలో నవంబర్ 18, 19 తేదీల్లో వైద్య పరీక్షలు నిర్వహించనున్నారు. ఈ కార్యక్రమం విజయవంతమైతే రాష్ట్రవ్యాప్తంగా అమలు చేయాలని ప్రభుత్వం ఆలోచిస్తోంది. దీంతో భవిష్యత్తులో ఆంధ్రప్రదేశ్ మహిళల ఆరోగ్య సంరక్షణలో ‘సఖి సురక్ష’ కీలక మైలురాయిగా నిలిచే అవకాశం ఉంది.
