ఆంధ్రప్రదేశ్ ప్రభుత్వం విశాఖపట్నం ప్రాంత అభివృద్ధిని దృష్టిలో పెట్టుకుని మూడు జిల్లాల్లో భూసమీకరణ (Land Pooling) చేపట్టాలని నిర్ణయించింది. విశాఖపట్నం, విజయనగరం మరియు అనకాపల్లి జిల్లాల్లో మొత్తం 1941.19 ఎకరాల భూమిని భూసమీకరించనుంది. ఇందుకు సంబంధించి మున్సిపల్ శాఖ ఇప్పటికే అధికారిక ఉత్తర్వులు జారీ చేసింది.
విశాఖ జిల్లా లోని ఆనందాపురం, పద్మనాభం మండలాల్లో 1132.09 ఎకరాలు, విజయనగరం జిల్లాలో డెంకాడ, భోగాపురం మండలాల్లో 25.41 ఎకరాలు, అనకాపల్లి జిల్లాలోని సబ్బవరం మరియు అనకాపల్లి మండలాల్లో 783.69 ఎకరాల భూమిని సేకరించనున్నారు. ఈ ప్రక్రియను విజయనగరం, భీమునిపట్నం, అనకాపల్లి ఆర్డీవోలు పర్యవేక్షించనున్నారు.
ముఖ్యమంత్రి చంద్రబాబు నాయుడు అభివృద్ధి దిశగా నిర్ణయం తీసుకున్నారు. ఆయన విశాఖపట్నాన్ని రాష్ట్ర ఆర్థిక రాజధానిగా అభివృద్ధి చేయాలని ధృఢ సంకల్పంతో ఉన్నారు. ఇప్పటికే టీసీఎస్, కాగ్నిజెంట్ వంటి ఐటీ కంపెనీలు మరియు లులు గ్రూప్ లాంటి సంస్థలు విశాఖలో పెట్టుబడులకు ముందుకొచ్చాయి. ₹20,000 కోట్ల పెట్టుబడులకు నాలుగు సంస్థలు ప్రతిపాదనలు ఇచ్చిన నేపథ్యంలో, ఈ భూసమీకరణ చర్య ఆ ప్రాజెక్టుల కోసం ప్రాధమిక అడ్డంకులను తొలగించనుంది.
ఇకపోతే, అమరావతిలో రెండో దశ భూసమీకరణపై కూడా రాష్ట్ర ప్రభుత్వం దృష్టి సారించింది. తొలిదశలో ఎదురైన లోపాలను సరిదిద్దిన తరువాతనే రెండో దశ ప్రారంభించనున్నట్లు మంత్రి నారాయణ తెలిపారు. ఇది భవిష్యత్ అవసరాల దృష్ట్యా అమరావతిని కూడా సమగ్రంగా అభివృద్ధి చేయాలనే ప్రభుత్వ సంకల్పానికి ఉదాహరణ. ఇవన్నీ కలిపి చూస్తే, రాష్ట్రంలో సమతుల అభివృద్ధికి ఈ చర్యలు దోహదపడతాయని అంచనా.
