ఆంధ్రప్రదేశ్ ప్రభుత్వం రాష్ట్ర రైతులకు మరో శుభవార్త అందిస్తోంది. ఇప్పటికే రైతు భరోసా, అన్నదాత సుఖీభవ వంటి పథకాల ద్వారా రైతులకు మద్దతు ఇచ్చే రాష్ట్ర ప్రభుత్వం, ఇప్పుడు మునగ పంట సాగుతో మహిళా రైతులను ప్రోత్సహించే కొత్త పథకాన్ని ప్రారంభించింది. ఈ పథకం ఉపాధి హామీ (MGNREGS) పథకం కింద అమలు కానుంది.
మునగ పంట ఆరోగ్యానికి మంచిదిగా పరిగణించబడుతోంది. దీనిని ఆదాయ వనరుగా మార్చడానికి ప్రభుత్వం ప్రత్యేక ప్రణాళికను రూపొందించింది. 2025–26 ఆర్థిక సంవత్సరంలో 12 జిల్లాల్లో పైలెట్ ప్రాజెక్ట్‌గా ప్రారంభించి, తర్వాత రాష్ట్రంలోని మిగతా జిల్లాలకు విస్తరించనుంది.
రెండు సంవత్సరాలపాటు మునగ సాగించే మహిళా రైతులకు రూ.1,49,000 వరకు ఆర్థిక సహాయం అందించనుంది. ఇప్పటివరకు సుమారు 2,177 మంది రైతులు 1,814 ఎకరాల్లో మునగ పంటను సాగించేందుకు ముందుకు వచ్చారు. వీరికి గుంతలు తీయడం, విత్తనాలు నాటడం, నీరు పెట్టడం, పర్యవేక్షణ వంటి పనులకు నిధులు చెల్లించబడతాయి.
ఉపాధి హామీ పథకం కింద మునగ సాగును ప్రోత్సహిస్తూ, మహిళలకు స్థిరమైన ఆదాయం వచ్చేలా ప్రభుత్వం చర్యలు తీసుకుంటోంది. ఒకసారి నాటిన మునగ చెట్లు ఐదు సంవత్సరాలపాటు దిగుబడి ఇస్తాయి. ఒక ఎకరా మునగ పంట ద్వారా సంవత్సరానికి సుమారు రూ.4.5 లక్షల వరకు ఆదాయం వచ్చే అవకాశం ఉందని అధికారులు అంచనా వేస్తున్నారు.
రాష్ట్ర ప్రభుత్వం, తమిళనాడులోని పెరియకులం ఉద్యాన విశ్వవిద్యాలయం సిఫారసు చేసిన PKM రకం మునగ విత్తనాలను ఉపయోగించాలని రైతులకు సూచిస్తోంది. ఎకరానికి సుమారు 4,000 విత్తనాలను నాటితే మంచి ఫలితాలు వచ్చే అవకాశం ఉంది. రైతులు తమ భూమి పాస్‌బుక్, బ్యాంక్ పాస్‌బుక్, ఉపాధి హామీ జాబ్ కార్డ్ వంటి పత్రాలను MPDO కార్యాలయానికి సమర్పించి దరఖాస్తు చేసుకోవచ్చు. ఈ పథకం ద్వారా రైతులకు ఆర్థిక భరోసా మరియు మార్కెట్‌లో సరైన ధరకు పంట అమ్మకం అవకాశాలు కల్పించబడతాయి.
