అమెరికాలో ట్రంప్ సర్కారు వచ్చిన తర్వాత గ్రీన్కార్డులు, వీసాల జారీ, వలసపోవడం కష్టతరంగా మారాయి. అయితే.. వీటిల్లో వీసాలు, గ్రీన్కార్డుల జారీలో జాప్యం వల్ల ఇప్పుడు ఆ దేశ కార్పొరేట్ రంగంపై దుష్ప్రభావం చూపడం మొదలుపెట్టింది.
వివిధ రంగాల్లోని కార్పొరేట్ లీడర్లు, సీనియర్ అధికారి ఉద్యోగ అనుమతులు ముగియడం.. వాటి పునరుద్ధరణ వెంటనే జరగకపోవడంతో వారు పదవుల నుంచి వైదొలగాల్సి వస్తోంది. ముఖ్యంగా శాశ్వత నివాసం కల్పించే గ్రీన్కార్డ్ల జారీలో జాప్యం వల్ల.. సక్రమమార్గంలో దేశంలోకి వచ్చి కొన్నేళ్లుగా వివిధ కంపెనీల్లో పని చేస్తున్నవారు కూడా వెళ్లిపోయేటట్లు చేస్తోంది.
అమెరికాలోనే అతిపెద్దదైన మెట్రోపాలిటన్ ర్యాపిడ్ ట్రాన్సిట్ అథారిటీ సీఈవో కొల్లిన్ గ్రీనవుడ్ జులై 17న పదవి నుంచి వైదొలిగారు. ఆయనకు ఉద్యోగ అనుమతి కాలవ్యవధి ముగిసిపోవడం.. గ్రీన్కార్డ్ జారీలో జాప్యంతో ఆయన తన పదవిలో కొనసాగడం అసాధ్యంగా మారింది.
దీంతో ముందస్తు పదవీ విరమణను ఆయన ఎంచుకొన్నారు. ఆయన స్వస్థలం కెనడా. తమ సీఈవోకు గ్రీన్కార్డ్ త్వరలోనే వస్తుందని మార్టా చెప్పినా.. పదవిని వీడేందుకే గ్రీన్వుడ్ మొగ్గు చూపారు.
వాస్తవానికి గ్రీన్వుడ్ మార్టా సీఈవోగా 2022 జనవరిలో బాధ్యతలు స్వీకరించారు. ఆయన వచ్చిన తర్వాత సంస్థ ఆర్థిక పరిస్థితి మరింత మెరుగుపడింది. ఆయన ఉద్యోగ అనుమతికి సంబంధించిన పత్రాలు జూన్ 18నే ముగిసిపోయాయి.
అయినా కానీ, ఆయన గ్రీన్కార్డ్ వచ్చేవరకు కెనడా వీసాపై అమెరికాలో కొనసాగుతారని మార్టా పేర్కొంది. అమెరికా రవాణారంగంలో పలువురు ప్రముఖ అధికారులు రాజీనామాల పరంపరలో గ్రీన్ వుడి కూడా ఒకటి. వీరిలో చాలామంది కార్యనిర్వహణ సవాళ్లు, వలస గడువుల వంటి కారణాలతో ఉద్యోగాలను వదిలేశారు.
అమెరికాలో గ్రీన్కార్డు కోసం దరఖాస్తు చేసుకొన్న భారతీయులు.. ప్రాసెసింగ్లో తీవ్రమైన జాప్యాన్ని ఎదుర్కొంటున్నారు. ప్రస్తుతం అమెరికాలో వలసల పెండింగ్ దరఖాస్తులు 1.13 కోట్లకు చేరాయి. ఈ స్థాయిలో పెండింగ్లో ఉండటం ఓ రికార్డు. ఇక ఈ ఏడాది రెండో త్రైమాసికంలో మరో 16 లక్షల కొత్త దరఖాస్తులు వచ్చి చేరనున్నాయి.
ఇటీవల అమెరికా వలస సేవా సంస్థ విడుదల చేసిన డేటాలో ఈ వివరాలున్నాయి. రెండో త్రైమాసికంలో ప్రాసెస్ చేసిన దరఖాస్తుల సంఖ్య కూడా తగ్గింది. గతేడాది 3.3 మిలియన్లు చేయగా.. ఈసారి 2.7 మిలియన్లకే పరిమితమైంది. ఇక గ్రీన్కార్డ్ దరఖాస్తుదారులు వాడే ఫారమ్ ఐ-90 సగటు వేచి ఉన్న సమయం 0.8 నెలల నుంచి 8 నెలలకు చేరింది. ఫారమ్ ఐ-765ల్లో దాదాపు 2 మిలియన్ల దరఖాస్తులు పెండింగ్లో ఉన్నాయి.
