అఫ్గానిస్తాన్-పాకిస్తాన్ సరిహద్దు ఉద్రిక్తతలు కొత్త దిశగా మలుపు తిరిశాయి. రెండు దేశాల మధ్య ఇటీవల ఏర్పడిన ఘర్షణల నేపథ్యంలో అధికారాలు బార్డర్లను పూర్తిగా మూసివేశాయి. ఈ నిర్ణయం వాణిజ్య రంగంపై తీవ్ర ప్రభావం చూపుతోంది. ముఖ్యంగా సరిహద్దు రాష్ట్రాల ప్రజలు, వ్యాపారులు పెద్ద నష్టాన్ని ఎదుర్కొంటున్నారు. రెండు దేశాల మధ్య ప్రతిరోజూ వేల టన్నుల పండ్లు, కూరగాయలు, ధాన్యాలు, మందులు, మరియు ఇతర అవసర వస్తువులు రవాణా అవుతుండగా, ఇప్పుడు ఆ రవాణా పూర్తిగా ఆగిపోయింది. ఫలితంగా పాకిస్తాన్‌లో దినసరి అవసరాల ధరలు భగ్గుమంటున్నాయి.
పాకిస్తాన్‌లో ప్రస్తుతం టమాటా ధరలు కిలోకు ₹600 పాకిస్తానీ రూపాయల వరకు చేరాయి. ఇది ఇప్పటివరకు అక్కడ ఎప్పుడూ నమోదు కాని రికార్డు స్థాయి ధరగా నిలిచింది. కేవలం ఒక వారం వ్యవధిలోనే టమాటా ధరలు ఐదు రెట్లు పెరిగిపోయాయి. అంతేకాదు, యాపిల్ వంటి పండ్ల ధరలు కూడా గణనీయంగా పెరిగాయి. ఆహార సరఫరా వ్యవస్థ దెబ్బతిన్న నేపథ్యంలో మార్కెట్‌లో దొరక్కపోవడం, సరఫరా మార్గాలు తెగిపోవడం వలన ఈ పరిస్థితి తలెత్తిందని వ్యాపారులు చెబుతున్నారు.
పాక్ ఆర్థిక వ్యవస్థ ఇప్పటికే తీవ్ర సంక్షోభంలో ఉంది. ఇంధన ధరల పెరుగుదల, డాలర్ మారకపు విలువ ఎగబాకడం, అంతర్జాతీయ రుణ భారం వంటి సమస్యలతో తీవ్రంగా ఇబ్బందులు ఎదుర్కొంటున్న సమయంలో బార్డర్ మూసివేత మరో దెబ్బగా మారింది. అఫ్గాన్ నుంచి పాక్‌కు వచ్చే కూరగాయలు, ధాన్యాలు, పండ్ల సరఫరా ఆగిపోవడంతో సాధారణ ప్రజలు దైనందిన అవసరాలను తీర్చుకోవడం కష్టంగా మారింది.
మరోవైపు అఫ్గానిస్తాన్ లో కూడా పరిస్థితి అంతే ఆందోళనకరంగా ఉంది. పాక్ నుంచి మందులు, బియ్యం, చక్కెర వంటి వస్తువులు పెద్ద మొత్తంలో దిగుమతి అవుతుండగా, వాటి కొరత ఆ దేశంలోనూ ఏర్పడింది. ధరలు రెట్టింపు కావడంతో పేద ప్రజలు తీవ్ర ఇబ్బందులు పడుతున్నారు.
వ్యాపార వర్గాల ప్రకారం, సరిహద్దు మూసివేత కారణంగా రెండు దేశాలు కలిపి రోజుకి కనీసం ఒక మిలియన్ అమెరికన్ డాలర్ల నష్టాన్ని చవిచూస్తున్నాయి. ఈ సమస్య కొనసాగితే రెండు దేశాల ఆర్థిక వ్యవస్థలపై దీర్ఘకాలిక ప్రభావం పడుతుందని వారు హెచ్చరిస్తున్నారు. రాజకీయ కారణాలతో ప్రారంభమైన ఈ వివాదం ఇప్పుడు ప్రజల కడుపుకి తాకింది. ఆహార సంక్షోభం, ధరల ఆకాశాన్నంటడం వల్ల సామాన్య ప్రజలు తీవ్ర ఆందోళనలో ఉన్నారు.
నిపుణుల అభిప్రాయం ప్రకారం, ఇరుదేశాలు తక్షణం చర్చలకు దిగకపోతే పరిస్థితి మరింత దారుణంగా మారే అవకాశం ఉంది. వాణిజ్య మార్గాలు తిరిగి తెరవడం మాత్రమే రెండు దేశాల ఆర్థిక స్థితి, ప్రజల జీవన ప్రమాణాలను కాపాడగలదని వారు సూచిస్తున్నారు. మొత్తానికి, అఫ్గాన్-పాక్ బార్డర్ మూసివేతతో రెండు దేశాలు ఆర్థికంగా నష్టపోతుండగా, ప్రజలు టమాటా ధరతోనే కాదు, జీవన ఖర్చులతో కూడా పోరాడుతున్నారు.
