బ్యాంకు మోసం కేసులో రిలయన్స్ గ్రూప్ ఛైర్మన్‌ అనిల్ అంబానీపై ఎన్‌ఫోర్స్‌మెంట్ డైరెక్టరేట్‌ (ఈడీ) మరోసారి చర్యలు ప్రారంభించింది. రూ.17 వేల కోట్ల భారీ రుణ మోసాలకు సంబంధించి కొనసాగుతున్న మనీలాండరింగ్‌ కేసులో భాగంగా ఈడీ ఆయనను విచారించేందుకు పిలిపించింది. నవంబర్ 14న విచారణకు తమ కార్యాలయానికి హాజరు కావాలని నోటీసులు జారీ చేసింది. ఈ కేసులో అనిల్ అంబానీ, ఆయన ఆధ్వర్యంలోని పలు కంపెనీలు ఎస్బీఐ సహా పలు బ్యాంకుల నుంచి తీసుకున్న రుణాలను దుర్వినియోగం చేశారనే ఆరోపణలు ఉన్నాయి.
ఈడీ ప్రకారం, అంబానీ గ్రూప్ కంపెనీలు బ్యాంకుల నుంచి పొందిన నిధులను వ్యాపార అభివృద్ధి పేరుతో వేరే మార్గాల్లో తరలించినట్లు తేలిందని చెబుతోంది. ఈ నిధుల వాడకం చట్టవిరుద్ధంగా ఉండటమే కాకుండా, వాటిని మూడో దేశాల్లోని సంస్థలకు బదిలీ చేసినట్టు దర్యాప్తులో బయటపడిందని ఈడీ వర్గాలు వెల్లడించాయి. ఈ నేపథ్యంలో అనిల్ అంబానీని మళ్లీ విచారణకు పిలిచి, నిధుల తరలింపులో ఆయన ప్రత్యక్ష ప్రమేయం ఉన్నదా లేదా అనే అంశంపై ప్రశ్నించనుంది.
ఇప్పటికే ఈ ఏడాది ఆగస్టులో ఈడీ అధికారులు అనిల్ అంబానీని గంటలకొద్దీ విచారించారు. ఆ సమయంలో ఆయన నుంచి రుణాల స్వీకరణ, వాటి వినియోగం, మరియు గ్రూప్ కంపెనీల మధ్య జరిగిన లావాదేవీలపై వివరాలు సేకరించారు. అనంతరం, ఈడీ దర్యాప్తు బృందం అనిల్ అంబానీకి చెందిన పలు కంపెనీల ఆస్తులను జప్తు చేసింది. ఈ ఆస్తుల విలువ సుమారు రూ.7,500 కోట్లుగా అంచనా వేయబడింది.
ఈ కేసు దేశవ్యాప్తంగా చర్చనీయాంశమైంది. ప్రముఖ వ్యాపారవేత్తగా పేరున్న అనిల్ అంబానీపై ఇలాంటి ఆరోపణలు రావడం పెద్ద సెన్సేషన్‌గా మారింది. బ్యాంకింగ్‌ వ్యవస్థలో పారదర్శకతకు దెబ్బతీసే విధంగా ఈ లావాదేవీలు జరిగాయని ఈడీ అభిప్రాయపడుతోంది. రుణాల ఎగవేతకు సంబంధించి మరిన్ని ఆధారాలు సేకరించే దిశగా దర్యాప్తు విస్తరించింది. నవంబర్ 14న జరగబోయే విచారణలో అంబానీ సమాధానాల ఆధారంగా ఈడీ తదుపరి చర్యలు నిర్ణయించనుంది.
