- ఇరాన్తో శాంతి చర్చల కోసం పాకిస్థాన్ వెళ్లాల్సిన దూతలను అడ్డుకున్న అధ్యక్షుడు..
- Gulf: అన్ని కార్డులు మా చేతిలోనే ఉన్నాయంటూ సోషల్ మీడియాలో పోస్ట్…
America Iran War: వాషింగ్టన్లోని హిల్టన్ హోటల్లో శనివారం రాత్రి జరిగిన వైట్హౌస్ కరెస్పాండెంట్స్ అసోసియేషన్ వార్షిక విందులో అమెరికా అధ్యక్షుడు డొనాల్డ్ ట్రంప్ను లక్ష్యంగా చేసుకుని జరిగిన కాల్పుల ఘటన ప్రపంచవ్యాప్తంగా సంచలనం సృష్టించింది. ఈ దాడి ప్రయత్నం జరిగిన కొద్దిసేపటికే, ఇరాన్తో జరగాల్సిన కీలకమైన శాంతి చర్చలను ట్రంప్ ఆకస్మికంగా రద్దు చేయడం అంతర్జాతీయ రాజకీయాల్లో తీవ్ర ఉద్రిక్తతలకు దారితీసింది. 31 ఏళ్ల కోల్ థామస్ అలెన్ అనే వ్యక్తి ఆయుధాలతో భద్రతా వలయాన్ని ఛేదించుకుని దూసుకురావడంతో కలకలం రేగింది. ఈ క్రమంలో నిందితుడు జరిపిన కాల్పుల నుంచి ఒక సీక్రెట్ సర్వీస్ ఏజెంట్ బుల్లెట్ప్రూఫ్ జాకెట్ ధరించడం వల్ల ప్రాణాపాయం నుంచి బయటపడ్డారు. ఈ ఘటన ఇరాన్పై సాధించబోయే విజయాన్ని ఏమాత్రం అడ్డుకోలేదని, తన పంతం మరింత పెరిగిందని ట్రంప్ ఘాటుగా స్పష్టం చేశారు.
దాడి అనంతరం మీడియాతో మాట్లాడిన ట్రంప్, ఇరాన్ శాంతి చర్చల విషయంలో తన కఠిన వైఖరిని ప్రదర్శించారు. పాకిస్థాన్ వేదికగా జరగాల్సిన రాయబారుల చర్చలను రద్దు చేసినట్లు ప్రకటిస్తూ, ఇరాన్ పంపిన ప్రాథమిక ప్రతిపాదనలు తనకు ఏమాత్రం సంతృప్తినివ్వలేదని పేర్కొన్నారు. ప్రయోజనం లేని చర్చల కోసం గంటల తరబడి విమాన ప్రయాణాలు చేయాల్సిన అవసరం లేదని, చర్చల రద్దు ప్రకటించిన పది నిమిషాలకే ఇరాన్ నుంచి మరో మెరుగైన ప్రతిపాదన రావడం తన దౌత్య విజయమని ఆయన అభివర్ణించారు. ఫిబ్రవరి 28న ఇజ్రాయెల్తో కలిసి ఇరాన్పై జరిపిన దాడుల అనంతరం ప్రారంభమైన ఈ యుద్ధ వాతావరణం, తాజా పరిణామాలతో మళ్లీ మొదటికి చేరింది.
ఇరాన్ అంతర్గత రాజకీయాల్లో తీవ్ర గందరగోళం నెలకొందని, ఆ దేశ నాయకత్వానికే అధికారం ఎవరి దగ్గర ఉందో తెలియని పరిస్థితి ఏర్పడిందని ట్రంప్ తన ‘ట్రూత్ సోషల్’ వేదికగా ఎద్దేవా చేశారు. ప్రస్తుతం అన్ని రాజకీయ, సైనిక ప్రయోజనాలు అమెరికా వైపే ఉన్నాయని, ఇరాన్ చర్చలు జరపాలనుకుంటే నేరుగా తనకే ఫోన్ చేయాలని ఆయన సవాల్ విసిరారు. ప్రస్తుతం క్షేత్రస్థాయిలో కాల్పుల విరమణ అమల్లో ఉన్నప్పటికీ, చర్చల రద్దు మరియు తాజా దాడి ప్రయత్నం ఇరు దేశాల మధ్య మళ్ళీ యుద్ధ మేఘాలు కమ్ముకునేలా చేశాయి.
