రోజూ టిఫిన్లలోకి చట్నీ చేయడం అంటే చాలామందికి ఒక పెద్ద పనిలా అనిపిస్తుంది. ఉదయం హడావిడిలో చట్నీ చేయడం అంటే చాలా కష్టం. అందుకే చాలామంది నిల్వ పచ్చళ్లు వాడుతుంటారు. కానీ, ఆ పచ్చళ్లు టిఫిన్లలోకి అంతగా రుచించవు.
అందుకే చాలామంది వేడి వేడిగా ఇడ్లీ, దోసె, ఉప్మా, ఊతప్పం లాంటివి చేసినప్పుడు ఒక మంచి పొడి ఉంటే బాగుంటుంది అని అనుకుంటారు. అప్పుడే ఈ నల్ల కారం పొడి గురించి గుర్తు చేసుకోవాలి. ఈ పొడి ఒక్కసారి ఇంట్లో చేసుకుంటే, ఆరు నెలల వరకు హ్యాపీగా వాడుకోవచ్చు. ఇడ్లీ, దోసెలోకి ఈ పొడి వేసుకుని, కొద్దిగా నెయ్యి దట్టించి తింటుంటే.. అబ్బా! ఇంకేమీ అవసరం లేదు అనిపిస్తుంది.
ఈ నల్ల కారం పొడిని చేసుకోవడం చాలా సులభం. దీనికి కావలసిన పదార్థాలు కూడా మన వంటింట్లోనే ఉంటాయి. ఈ పొడిని ఎలా తయారు చేసుకోవాలో, దానికి ఏమేం కావాలో ఇక్కడ చూద్దాం.
కావలసిన పదార్థాలు:
నూనె: 2 స్పూన్లు
ఎండు మిర్చి: 25
మెంతులు: పావు టీ స్పూన్
పొట్టు మినపగుండ్లు: పావు కప్పు
పచ్చి శనగపప్పు: పావు కప్పు
ధనియాలు: పావు కప్పు
జీలకర్ర: 1 స్పూన్
కరివేపాకు: 5 రెమ్మలు
చింతపండు: నిమ్మకాయ సైజు
ఉప్పు: రుచికి సరిపడా
వెల్లుల్లిపాయలు: 8
పసుపు: చిటికెడు
నల్ల కారం పొడి తయారీ విధానం…
ఈ పొడిని తయారు చేయడం చాలా సులభం. ఈ స్టెప్స్ ఫాలో అయితే రుచికరమైన పొడి రెడీ అవుతుంది.
వేయించడం: ముందుగా స్టవ్ ఆన్ చేసి మందపాటి ఐరన్ కడాయి పెట్టుకుని ఒక స్పూన్ నూనె వేసుకోవాలి. నూనె వేడెక్కాక, అందులో 25 ఎండు మిర్చి వేసుకుని వేయించాలి. ఎండు మిర్చిని మీడియం నుంచి లో ఫ్లేమ్లో వేయించుకోవాలి. లేదంటే అవి మాడిపోతాయి. అవి కొద్దిగా నల్లగా మారుతుండగానే తీసి పక్కకు పెట్టుకోవాలి. ఈ రంగు వల్లే ఈ పొడికి నల్ల కారం పొడి అని పేరు వచ్చింది.
దినుసులను వేయించడం: అదే కడాయిలో మరో స్పూన్ నూనె వేసుకుని పావు టీ స్పూన్ మెంతులు వేసుకోవాలి. ముందుగా మెంతులు వేయడం వల్ల చేదు తగ్గుతుంది. ఆ తర్వాత పావు కప్పు పొట్టు మినపగుండ్లు, పావు కప్పు పచ్చి శనగపప్పు, పావు కప్పు ధనియాలు వేసుకుని బాగా వేయించుకోవాలి. ఇవి లోపలి వరకు బాగా వేగేలా చూసుకోవాలి. అవి మంచి వాసన వచ్చే వరకు వేయించుకోవాలి.
జీలకర్ర, కరివేపాకు, చింతపండు: ఇప్పుడు 1 స్పూన్ జీలకర్ర వేసుకుని బాగా వేయించుకోవాలి. అన్ని దినుసులు మంచి రంగులోకి వచ్చిన తర్వాత వాటిని ఒక కప్పులోకి తీసుకుని పక్కన పెట్టుకోవాలి. మళ్లీ అదే పాన్లో ఐదారు రెమ్మల కరివేపాకు వేసుకుని నూనె లేకుండా వేయించుకోవాలి. అలాగే, నిమ్మకాయ సైజులో ఉన్న చింతపండు రెబ్బలు విడదీసి వేసుకుని వేయించి పక్కన పెట్టుకోవాలి.
గ్రైండ్ చేయడం: వేయించుకున్న అన్ని దినుసులు పూర్తిగా చల్లారిన తర్వాత వాటిని మిక్సీ జార్లోకి తీసుకోవాలి. అందులో రుచికి సరిపడా ఉప్పు, 8 వెల్లుల్లిపాయలు, చిటికెడు పసుపు వేసుకుని పల్స్ ఇస్తూ గ్రైండ్ చేయాలి. వెల్లుల్లి పాయలు మెత్తబడే వరకు గ్రైండ్ చేసుకుంటే సరిపోతుంది.
చల్లారిన తర్వాత ఈ కారం పొడిని గాజు సీసాలో నిల్వ చేసుకుంటే ఆరు నెలల వరకు వాడుకోవచ్చు. ఈ నల్ల కారం పొడి ఇడ్లీ, దోసె, వేడి వేడి అన్నంలోకి నెయ్యి వేసుకుని తింటే అద్భుతంగా ఉంటుంది. ఇంకెందుకు ఆలస్యం, మీరు కూడా ఈ కారం పొడిని ట్రై చేసి చూడండి!
