దీపావళి సందర్భంగా చాలామంది కంపెనీలు తమ ఉద్యోగులకు స్వీట్స్, షాపింగ్ వోచర్లు, నగదు బహుమతులు లేదా చిన్న గిఫ్ట్లను ఇస్తుంటాయి. కానీ చండీగఢ్కు చెందిన MITS గ్రూప్ వ్యవస్థాపకుడు, ఛైర్మన్ ఎం.కే. భాటియా చేసిన పనితో దేశం అంతా షాక్ అయ్యింది. ఈసారి ఆయన తన ఉద్యోగులకు పండగ బహుమతిగా మొత్తం 51 లగ్జరీ SUV కార్లను అందించారు. ప్రతి కార్ కొత్త స్కార్పియో SUV మోడల్ కావడం, వాటిని భాటియా స్వయంగా ఉద్యోగుల చేతికి కీలను అందించడం ప్రత్యేకతగా నిలిచింది. ఈ సన్నివేశం సోషల్ మీడియాలో వైరల్ అవ్వగా, భాటియా దాతృత్వం, ఉద్యోగులపై చూపిన ప్రేమ, విశ్వాసం అందరి ప్రశంసలను దక్కించుకుంటోంది.
కంపెనీ ఈ కార్లను అత్యుత్తమ పనితీరు కనబరిచిన ఉద్యోగులకు బహుమతిగా ఇచ్చింది. చండీగఢ్లో జరిగిన దీపావళి వేడుకలో ఉద్యోగులు ఆనందంతో మునిగిపోయారు. భాటియా ఇలాంటి బహుమతులు ఇవ్వడం ఇది మొదటిసారి కాదు. గత రెండేళ్లలో కూడా ఉద్యోగులకు వాహనాలను బహుమతిగా ఇచ్చారు. ఇప్పుడు ఈ చర్య కంపెనీలో ఒక సంప్రదాయంగా మారింది. ఉద్యోగులను ప్రోత్సహించడమే కాకుండా, వారిని కుటుంబసభ్యుల్లా భావించడం వెనుక భాటియా ఉద్దేశం. “ఉద్యోగులే నా కంపెనీ వెన్నెముక” అని ఆయన తరచూ చెబుతారు.
భాటియా వ్యక్తిగత ప్రయాణం కూడా ఎంతో ప్రేరణాత్మకంగా ఉంది. 2002లో తన చిన్న మెడికల్ స్టోర్ భారీ నష్టాలను చవిచూసి దివాలా తీసిన భాటియా, జీవితంలో వెనక్కి తగ్గకుండా పోరాడి 2015లో MITS గ్రూప్ను స్థాపించారు. ఇప్పుడు ఆయన 12 కంపెనీలకు అధిపతిగా ఉన్నారు. భారతదేశం, కెనడా, లండన్, దుబాయ్లలో లైసెన్స్లు పొందిన ఆయన సంస్థ గ్లోబల్ స్థాయికి చేరింది. వ్యాపార విస్తరణ కోసం కొత్త డైరెక్టర్లను నియమిస్తూ, శిల్పా చందేల్ను CEOగా నియమించడం ద్వారా సంస్థ ఎదుగుదలకు కొత్త దిశ చూపించారు.
లింక్డ్ఇన్లో భాటియా ఈ విశేషాన్ని పంచుకుంటూ, “మా టీమ్నే మా శక్తి. గత రెండు సంవత్సరాలుగా ఉద్యోగులకు కార్లను బహుమతిగా ఇస్తున్నాం. ఈ సంవత్సరం కూడా ఆ సంప్రదాయం కొనసాగుతోంది. నా ఉద్యోగులు రాక్స్టార్ సెలబ్రిటీలు” అని పేర్కొన్నారు. ఆయన మాటల్లో ఆత్మీయత, కృతజ్ఞత ప్రతిఫలించింది. ఉద్యోగులను గౌరవించడం, వారి కష్టాన్ని గుర్తించడం వంటి విలువలు ఈ సంస్థ సంస్కృతికి కొత్త ప్రమాణాలు సృష్టిస్తున్నాయి. ఈ దీపావళి సందర్భంగా భాటియా చేసిన ఈ బహుమతులు “ఉద్యోగుల సంతోషమే కంపెనీ విజయానికి మూలం” అనే సందేశాన్ని మరొకసారి గుర్తు చేశాయి.
