- ఫోన్లో సిగ్నల్ లేకపోయినా 112 అనే నంబర్కు కాల్..
- బస్సులోనో, రైలులోనో వెళ్తున్నప్పుడు కాల్స్ మధ్యలో కట్..
Mobile network settings: చాలామంది ప్రయాణాల్లో ఉన్నప్పుడు లేదా ఊళ్లకు వెళ్లేటప్పుడు మొబైల్ సిగ్నల్స్ సరిగ్గా రాక ఇబ్బంది పడుతుంటారు. బస్సులోనో, రైలులోనో వెళ్తున్నప్పుడు కాల్స్ మధ్యలో కట్ అయిపోవడం లేదా ఇంటర్నెట్ అస్సలు స్పీడ్ రాకపోవడం మనం చూస్తూనే ఉంటాం. ఇలాంటి సమస్యలు ఎదురైనప్పుడు కంగారు పడకుండా మన ఫోన్లోనే కొన్ని చిన్న చిన్న మార్పులు చేసుకోవడం ద్వారా నెట్వర్క్ మళ్లీ వచ్చేలా చేసుకోవచ్చు. దీనికోసం పెద్దగా సాంకేతిక తెలియనవసరం లేదు కేవలం ఫోన్ సెట్టింగ్స్ పట్ల కొంచెం అవగాహన ఉంటే సరిపోతుంది.
మీ ఫోన్లో నెట్వర్క్ అకస్మాత్తుగా పోయినప్పుడు చేయాల్సిన మొదటి పని ఏంటంటే, ఫోన్ను ఒక్కసారి ఎయిర్ప్లేన్ మోడ్లో పెట్టడం. ఒక 20 సెకన్ల పాటు ఎయిర్ప్లేన్ మోడ్ ఆన్ చేసి ఉంచి, ఆ తర్వాత దాన్ని ఆఫ్ చేస్తే మీ మొబైల్ మళ్లీ కొత్తగా దగ్గర్లో ఉన్న టవర్ కోసం వెతుకుతుంది. ఇలా చేయడం వల్ల చాలా వరకు సిగ్నల్ సమస్యలు వెంటనే పరిష్కారం అవుతాయి. ఇది పని చేయకపోతే ఫోన్ను ఒక్కసారి రీస్టార్ట్ చేయడం వల్ల కూడా లోపల ఉన్న చిన్న చిన్న సాఫ్ట్వేర్ సమస్యలు పోయి నెట్వర్క్ స్థిరంగా వస్తుంది.
ఒకవేళ సాఫ్ట్వేర్ పరంగా అంతా బాగున్నా సిగ్నల్ రాకపోతే ఒకసారి సిమ్ కార్డును తీసి చెక్ చేసుకోవడం మంచిది. సిమ్ కార్డు స్లాట్లో దుమ్ము చేరినా లేదా కార్డు సరిగ్గా కూర్చోకపోయినా ఫోన్ నెట్వర్క్ను పట్టుకోలేదు. అందుకే సిమ్ కార్డును తీసి మెత్తటి గుడ్డతో క్లీన్ చేసి మళ్లీ జాగ్రత్తగా లోపల పెట్టాలి. ప్రయాణాల్లో ఉన్నప్పుడు ఫోన్ ఆటోమేటిక్గా నెట్వర్క్ వెతుకుతుంది కానీ, కొన్నిసార్లు అది విఫలమైనప్పుడు మనమే సెట్టింగ్స్లోకి వెళ్లి మాన్యువల్గా నెట్వర్క్ను సెలెక్ట్ చేసుకుంటే సిగ్నల్ త్వరగా దొరుకుతుంది.
రైలు లేదా బస్సు ప్రయాణాల్లో కిటికీ దగ్గర కూర్చోవడం వల్ల కూడా నెట్వర్క్ అడ్డంకులు తగ్గుతాయి. లోపల మధ్యలో కూర్చున్నప్పుడు వాహనం బాడీ వల్ల సిగ్నల్స్ సరిగ్గా అందవు, కాబట్టి కిటికీ వైపు ఉండటం వల్ల మొబైల్ టవర్ల నుండి వచ్చే తరంగాలు నేరుగా ఫోన్కు అందుతాయి. అలాగే రైల్వే స్టేషన్లలో దొరికే ఉచిత వైఫైని వాడుకోవడం వల్ల కూడా ఇంటర్నెట్ సమస్యలు ఉండవు. ఇప్పుడు చాలా ఫోన్లలో వైఫై కాలింగ్ సదుపాయం కూడా ఉంది కాబట్టి వైఫై ఉంటే సిగ్నల్ లేకపోయినా క్లారిటీగా మాట్లాడుకోవచ్చు.
అన్నింటికంటే ముఖ్యమైన విషయం ఏమిటంటే, అత్యవసర పరిస్థితుల్లో మన ఫోన్లో సిగ్నల్ లేకపోయినా 112 అనే నంబర్కు కాల్ చేయవచ్చు. ఈ నంబర్ మన సిమ్ కార్డు నెట్వర్క్ మీద ఆధారపడకుండా, అందుబాటులో ఉన్న ఏదైనా ఇతర కంపెనీ టవర్ సహాయంతో కాల్ను కనెక్ట్ చేస్తుంది. ప్రయాణాల్లో ఉన్నప్పుడు ఇలాంటి చిన్న చిట్కాలు పాటిస్తే నెట్వర్క్ సమస్యల వల్ల వచ్చే చికాకులను తగ్గించుకోవచ్చు. ఈ సింపుల్ ట్రిక్స్ వాడటం ద్వారా మన ఫోన్ కనెక్టివిటీ ఎప్పుడూ ఉండేలా చూసుకోవచ్చు.
