ఉగాది వేడుకల్లో మెరిసిన తెలుగు సంస్కృతి..
సంప్రదాయ సోయగాలతో అలరించిన OTS ఉగాది ఉత్సవాలు..
అమెరికాలోని ఓక్లహోమా తెలుగు సంఘం (OTS) ఆధ్వర్యంలో నిర్వహించిన ‘ఉగాది సంబరాలు 2026’ వేడుకలు అంగరంగ వైభవంగా, సంప్రదాయబద్ధంగా ఘనంగా ముగిశాయి. తెలుగు సంస్కృతి, సంప్రదాయాల అందాలను ప్రతిబింబించేలా నిర్వహించిన ఈ వేడుకలకు స్థానిక తెలుగు సమాజం నుండి విశేష స్పందన లభించింది. కుటుంబాలంతా కలిసి హాజరై పండుగ వాతావరణాన్ని మరింత ఉత్సాహంగా మార్చారు.
ఏప్రిల్ 25వ తేదీ శనివారం సాయంత్రం 4 గంటల నుంచి ఓక్లహోమా సిటీలోని హిందూ టెంపుల్లో ఈ కార్యక్రమం ప్రారంభమైంది. ఆలయ ప్రాంగణాన్ని ఉగాది శోభతో అందంగా అలంకరించడం ప్రత్యేక ఆకర్షణగా నిలిచింది. పూలతోరణాలు, రంగవల్లులు, సంప్రదాయ అలంకరణలతో వేదిక పండుగ వాతావరణాన్ని తలపించింది.
ఈసారి ఉగాది వేడుకల్లో ఒక విశేషమైన రికార్డు నమోదైంది. గతంలో ఎన్నడూ లేని విధంగా 105 మందికి పైగా కళాకారులు వివిధ సాంస్కృతిక కార్యక్రమాల్లో పాల్గొని తమ ప్రతిభను చాటుకున్నారు. చిన్నపిల్లల నుంచి పెద్దల వరకు అందరూ ఉత్సాహంగా పాల్గొనడంతో సభా ప్రాంగణం కిక్కిరిసిపోయింది. నృత్యాలు, సంగీత ప్రదర్శనలు, నాటికలు ప్రేక్షకులను ఆకట్టుకున్నాయి.
ఈ భారీ కార్యక్రమాన్ని విజయవంతం చేయడంలో OTS ఎగ్జిక్యూటివ్ కమిటీ సభ్యులు నీహారిక అందవరపు, సుధ, కళ్యాణ్, శ్రీధర్, ప్రవీణ్, కిషోర్, సురేష్, నర్సి గార్లు కీలక పాత్ర పోషించారు. కార్యక్రమాన్ని సాయి కిరణ్ కుమార్, సుధా మెట్టుపల్లి, సింధు, త్రిషలు వ్యాఖ్యాతలుగా సమర్థంగా నిర్వహించి అందరినీ అలరించారు.
నీహారిక అందవరపు, నిహారిక, సౌమ్య, హేమల ఆధ్వర్యంలో రూపొందించిన నృత్య రూపకాలు ప్రేక్షకులను మంత్రముగ్ధులను చేశాయి. అలాగే భార్గవ్, హారిక, యమున, భార్గవి, శిరీష, రోహిణి గార్లు వాలంటీర్లుగా సేవలందించి కార్యక్రమం ఎటువంటి అంతరాయం లేకుండా సజావుగా సాగేలా కృషి చేశారు.
ఈ వేడుక విజయవంతం కావడానికి సహకరించిన ప్రతి ఒక్కరికీ OTS కమిటీ హృదయపూర్వక కృతజ్ఞతలు తెలిపింది. ముఖ్యంగా భారీ సంఖ్యలో హాజరైన తెలుగు కుటుంబాలకు ప్రత్యేక ధన్యవాదాలు తెలియజేసింది. ఈ కార్యక్రమం ఓక్లహోమాలోని తెలుగు వారి ఐక్యతకు, సంస్కృతిపై వారి అభిమానం కు ప్రతీకగా నిలిచింది.
