- "హెచ్1బీ వీసాలకు భారీ కోత": లక్ష డాలర్ల ఫీజుతో బెంబేలెత్తుతున్న టెక్కీలు.. 87 శాతం తగ్గిన పిటిషన్లు..
- NRI: "భద్రత లేని చోట ఉండలేం": పెరిగిన నేరాలు, సామాజిక ఒత్తిళ్లతో అమెరికాకు గుడ్ బై!
H1B visa: ఒకప్పుడు భారతీయులకు అమెరికా అంటే అది ఒక స్వప్నం, విజయానికి చిరునామా. కానీ నేడు ఆ ‘అమెరికా కల’ క్రమక్రమంగా నీరుగారిపోతోందని అంతర్జాతీయ సంస్థ ‘కార్నెగీ ఎండోమెంట్’ నిర్వహించిన తాజా సర్వే బాంబు పేల్చింది. ఈ సర్వే ప్రకారం, అమెరికాలో నివసిస్తున్న భారతీయ అమెరికన్లలో దాదాపు 40 శాతం మంది ఆ దేశాన్ని శాశ్వతంగా వీడి వెళ్లాలని ఆలోచిస్తున్నట్లు వెల్లడైంది. డొనాల్డ్ ట్రంప్ రెండోసారి బాధ్యతలు చేపట్టిన తర్వాత మారుతున్న రాజకీయ సమీకరణాలు, పెరుగుతున్న ఆర్థిక భారాలు వలసదారుల్లో అభద్రతా భావాన్ని పెంచుతున్నాయి. ముఖ్యంగా 'అమెరికా అమెరికన్లకే' అనే జాతీయవాద నినాదం భారతీయ మేధావులను, వృత్తినిపుణులను తీవ్ర ఆందోళనకు గురిచేస్తోంది. యూగోవ్తో కలిసి నిర్వహించిన ఈ అధ్యయనంలో, అగ్రరాజ్యంలో నెలకొన్న సామాజిక ఉద్రిక్తతలు తమ భవిష్యత్తుపై నీలి నీడలు కమ్ముకునేలా చేస్తున్నాయని మెజారిటీ భారతీయులు అభిప్రాయపడ్డారు.
ప్రస్తుతం అమెరికాలో ఉన్న ప్రతి పదిమంది భారతీయులలో నలుగురు స్వదేశానికి లేదా ఇతర దేశాలకు వెళ్లాలని నిశ్చయించుకోవడానికి ప్రధానంగా మూడు కారణాలు కనిపిస్తున్నాయి. రాజకీయ అస్థిరత కారణంగా 58 శాతం మంది, విపరీతంగా పెరిగిన జీవన వ్యయం వల్ల 54 శాతం మంది, మరియు వ్యక్తిగత భద్రతపై నెలకొన్న నీలినీడల వల్ల 41 శాతం మంది అమెరికాను వీడాలని భావిస్తున్నారు. ప్రస్తుత ట్రంప్ ప్రభుత్వ తీరుపై సుమారు 71 శాతం మంది అసంతృప్తి వ్యక్తం చేయడం గమనార్హం. 2024-25 గణాంకాల ప్రకారం అమెరికా జనాభాలో భారతీయుల వాటా 1.5 శాతమే అయినప్పటికీ, వారు ఆ దేశ ఆర్థిక వ్యవస్థలో కీలక పాత్ర పోషిస్తున్నారు. అయితే, చట్టబద్ధమైన వలసలపై ట్రంప్ ప్రభుత్వం విధిస్తున్న ఆంక్షలు ఈ ప్రతిభావంతులైన వర్గాన్ని విసిగిస్తున్నాయి.
ముఖ్యంగా భారతీయ ఐటీ నిపుణుల జీవనాడి అయిన హెచ్1బీ (H1B) వీసాల విషయంలో నెలకొన్న అనిశ్చితి పెను మార్పులకు దారితీస్తోంది. గత సంవత్సరంతో పోలిస్తే ఈ వీసాల జారీ 25 శాతం మేర తగ్గడం, దానికి తోడు లక్ష డాలర్ల భారీ ఫీజు నిబంధన అమల్లోకి రావడం కార్పొరేట్ కంపెనీలను సైతం వెనక్కి తగ్గేలా చేస్తోంది. ఫలితంగా కొత్త వీసా పిటిషన్లు ఏకంగా 87 శాతం మేర పడిపోయాయి. ఒకవైపు అక్రమ వలసలను అరికట్టే సాకుతో, చట్టబద్ధంగా వచ్చే భారతీయులపై కూడా నిబంధనల భారం మోపడం వల్ల అమెరికా తన ఆకర్షణను కోల్పోతోంది. రానున్న రోజుల్లో హెచ్1బీ వీసాల సంఖ్య మరింత తగ్గే అవకాశం ఉందని నిపుణులు అంచనా వేస్తున్నారు. ఈ పరిణామాల నేపథ్యంలో, భారతీయ నిపుణులు తమ ప్రతిభను స్వదేశీ స్టార్టప్లకు లేదా అనుకూలమైన ఇతర దేశాలకు మళ్లించే అవకాశం ఎక్కువగా కనిపిస్తోంది.
